“Tamaşaçılar mənə səhnəmizin Karmeni deyirlər”

Azərbaycanın əməkdar artisti, Azərbaycan Dövlət Akademik Opera və Balet Teatrının solisti Fidan Hacıyeva aprelin 19-da Heydər Əliyev Sarayında solo konsert proqramı ilə çıxış edəcək.

Bu barədə “Kaspi” yə danışan Fidan Hacıyeva Heydər Əliyev Sarayındakı

“Sevgili canan” konsertinin fərqli üslubda olacağını vurğuladı. Sənətçi konsert boyu səhnədə Opera və Balet Teatrının 150 nəfərdən ibarət Simfonik Orkestrinin onu müşayiət edəcəyini dedi: “Bu konsert operanın sintezi və pop-caz qrupunun birləşməsi olacaq. Bu, opera üslubunda ilk belə sintezdir. Konsertin birinci hissəsində tamaşaçılara tanış əsərlər səslənəcək, ikinci hissədə isə sırf romanslar olacaq. Konsertin dirijoru Azərbaycan Dövlət Akademik Opera və Balet Teatrının baş dirijoru Cavanşir Cəfərovdur. Konsert üçün Amerikada təhsil almış oranjemançı Allahyar Rzayev tərəfindən yeni partituralar yazılıb. Konsert boyu hər ifa zamanı arxada quraşdırılmış LED ekranda yeni çəkdiyimiz video-çarxlar göstəriləcək. Bu solo çıxış üçün bütün dostlarım birləşib və mən hər birinə təşəkkür edirəm”.

Konsertdə F.Hacıyevanın tərəf müqabilləri də olacaq.

İfaçı konsert boyu geyimlərinin çox maraqlı olacağını da qeyd etdi: “Konsert zamanı hər obrazın öz geyimi olmalıdır. Hər bir mahnıya ayrı-ayrı video-çarxlar çəkiləcək. Bu video-çarxların hər biri klip şəklindədir. Bir sirri də açıqlamaq istəyirəm, qızım moda ilə çox yaxından maraqlanır və bu sahəyə həvəsi böyükdür. Qızım konsertimə bir paltar dizayn etmək istəyini dedi. Düşünürəm ki, yaxşı olsa, həmin gün qızımın bir libasını da geyinəcəyəm”.

Biz də öz növbəmizdə müğənniyə uğurlar arzulayıb, ona suallarımızı ünvanladıq.

O adı mənə çox yaraşdırırlar

- Fidan xanım, bu gün opera sənətinə maraq hansı səviyyədədir?

– Operaya maraq mən istədiyim səviyyədə deyil. Bu gün opera sənətində, sözün əsl mənasında, çox gözəl əsərlər var. Hər bir teatrın olduğu kimi operanın da öz tamaşaçısı olur. Opera Teatrı tamaşaçı cəhətdən problem yaşamır. Demək olar ki, yeni operalar, yeni repertuar, yeni tamaşalar yaranmaqdadır. Teatrın solisti olaraq əlimdən gələni tamaşaçılara təqdim etməyə çalışıram.

– İndi Azərbaycanda opera ifaçıları azlıq təşkil edir. Onlar da o qədər məşhur deyillər. Bəlkə buna görə sənətçilərimiz opera sənətindən uzaq düşürlər...

– Bəli, doğrudan da, bu gün Azərbaycanda opera sənətçiləri kifayət qədər məşhur deyillər. Amma onlar azlıq təşkil edir fikri ilə razılaşmıram, opera ifaçıları heç də digər aktyorlardan az deyil. Operaya üz tutan ifaçıların əksəriyyəti də gənclərdir. Onların çox gözəl səsləri var. Ancaq sizin qeyd etdiyiniz kimi, təəssüflər olsun ki, kifayət qədər məşhur deyillər. Bununla belə, onların heç birinin reklama ehtiyacı yoxdur.

– Fidan xanım, yaradıcılığınızda “Karmen”i zirvə hesab etmək olarmı?

– Bəli, “Karmen” mənim opera yaradıcılığımın zirvəsidir. Ən sevimli, zirvəyə yüksələn, mənə daha çox məşhurluq gətirən operamdır. “Karmen” operasının həyatımda mühüm rolu olub. Tamaşaçılar mənə səhnəmizin Karmeni deyirlər. Karmen xanım deyə müraciət edirlər. O adı mənə çox yaraşdırırlar. İnsanların qəlblərində Karmen kimi qalmışam. Bu mənə çox xoşdur.

Efirə balaca körpəmlə də çıxmışam

- Siz ailə quran zaman tamaşaçılar sizin sənətinizlə deyil, daha çox evlənəcəyiniz adamla marqlandılar, bunun səbəbi nədir?

– Mənim yoldaşım əcnəbidir. İki vətəndaşlığı var. Ola bilsin ki, ona görədir. İnsanlar sənət adamlarının həyatı ilə maraqlanır, bilmək istəyirlər. Mən həmişə ailə həyatımla bağlı suallara cavab vermişəm, tamaşaçılardan heç nəyi gizlətməmişəm. Ancaq çalışmışam ki, sənətimdən daha çox danışım. Soruşanda, təbii ki, cavab verirəm. Heç kimin suallarını cavabsız qoymuram. Hətta elə olub ki, efirə balaca körpəmlə də çıxmışam. Heç nəyi gizlətməyi sevmirəm.

– Daha çox xarici ölkələrdə konsertləriniz olur. Orada sizi tanıyırlarmı?

– Bəli. Çalışıram ki, öz sənətimizlə Azərbaycan musiqisini tanıdam. Londondakı konsertimiz çox möhtəşəm keçdi. 7 dildə ifa etdim. Çalışdım ki, Azərbaycan musiqisini layiqli səviyyədə xarici vətəndaşlara təqdim edim. Mənə elə gəlir ki, bu məqsədimə nail oldum. Çox gözəl konsert oldu. Bir azərbaycanlı qızı kimi musiqimizi dünyada layiqlincə tanıtmaq mənim borcumdur. Böyük sənət adamlarının mahhnıların sözlərindən zövq almaları üçün bir neçə əsəri ingilis dilinə tərcümə etmişəm. Bu konsertin bir özəlliyi də Londondakı konsertin nümayişinin ilk dəfə burada olmasıdır. Çox ölkələrdə konsert proqramı ilə çıxış etmişəm. Yaponiya, Almaniya, Avstriya, İtaliyada, İngiltərə, Rusiya və Türkiyənin bir çox şəhərlərində solo konsertlərim olub. Əsas məqsədim Azərbaycan musiqisini dünyaya çatdırmaqdır.

– Hazırda Azərbaycanda opera sənətinin durumu sizi qane edirmi?

– İndi vəziyyət yaxşıdır. Opera teatrında gözəl səslərimiz var. Bizim teatrda çox gözəl tamaşalar oynanılır. Ekranlarda klassik musiqilərə az yer verilməsi isə məni qane etmir. Klassik musiqi mədəniyyətinə qayğıyla yanaşmaq lazımdır. Xalqımıza bu musiqiləri də sevdirmək gərəkdir.

– Həm sənətin yüksəkliyində durmaq, həm ev xanımı olmaq sizin üçün çətin deyil ki?

– Hər şeyə vaxt tapmağa çalışıram. Vaxtım çox azdır. İstirahətə vaxtım olmur. Axşamlar telefonlarımı söndürürəm. Ailəmlə vaxt keçirirəm. Çox sənət adamları məclislərdə olurlar. Mən çalışıram ki, axşamlar evdə olum. Konsertlərim olanda vaxtında gedirəm və vaxtında da evimdə uşaqlarımın içində oluram. Gecə uşaqlarımın üstünü özüm örtməliyəm. Mən öz üzərimdə çox çalışıram. Mənimlə işləyən insanlar bilirlər ki, məndə bir dəqiqə boş dayanmaq yoxdur. Bütün günü çalışıram. Öz dostlarıma çox çalışmalarını məsləhət görürəm. Çox çalışın, nə isə edin, o zaman qabağa gedəcəksiniz. Belə bir söz var – “Səndən hərəkət, məndən bərəkət”. Hərəkət zamanı bərəkəti görəcəksiniz. Mənim üçün öz üzərimdə çalışmaq həmişə birinci yerdədir.

– Uşaqlarınızı gələcəkdə musiqi sahəsində görmək istəyərsinizmi?

– Uşaqlarımın musiqiyə istəkləri olsa, niyə də olmasın. Mən onlara kömək edərəm. Özləri müəyyən etsinlər.

Allahıma yalvarıram ki, mənə güc versin

– Sizin yoldaşınız milliyətcə ingilisdir. Azərbaycanda daha çox nə xoşuna gəlir?

– O, artıq neçə illərdir Azərbaycanda yaşayır. Özünü azərbaycanlı sayır. Deyir ki, artıq məndə ingilislik qalmayıb. Adət-ənənələrimizi, istiqanlılığımızı çox bəyənir. Artıq Azərbaycan dilində danışır. Muğamımızı çox sevir. Bizim rəqslərimiz, yeməklərimiz, bayramlarımız xoşuna gəlir.

– Uşaqlarınız evdə daha çox hansı dildə danışırlar?

– Azərbaycan dilində danışırlar. Ona görə ki, biz hamımız Azərbaycan dilində danışırıq. Rus dilində bilmirlər. Azərbaycan və ingilis dilini bilirlər.

– Siz qeyd etmisiz ki, opera sənətinin inkişafı üçün xarici dilləri bilmək lazımdır. Hansı dilləri bilirsiniz?

- İngilis dilində təmiz danışıram. İtalyan, rus, bir az da fars dilində bilirəm. Ona görə də bütün dillərdə oxuyuram. Çox çalışqan insanam. Bütün günü kitablar oxuyuram.

– Fidan Hacıyeva özünü həyatda güclü insan hesab edirmi?

– Çox kövrək insanam. Amma bu sənətlə bağlı məsələlərdə çox güclüyəm. Özümü güclü insan hesab edirəm. Mübarizəyə həmişə hazıram. Ancaq öz sənətimlə, işimlə. Heç vaxt heç kimə fikir vermirəm. Həmişə öz işimlə məşğul oluram. Allahıma yalvarıram ki, mənə güc versin. Öz sənətimlə həmişə vətənimə qulluq etməyə hazıram. Bəzi insanlar mənə deyir ki, niyə başqa ölkədə yaşamırsan. Mən öz vətənimdə yaşamaq istəyirəm. Ömrümü ölkəmizdə və dünyada Azərbaycan musiqisini tanıtmağa həsr etmək istəyirəm.

– Çətin anlarınızda kimə müraciət edirsiniz?

– Allahıma dua edirəm. Heç vaxt yaxınlarıma çətinliklərimin olduğunu demirəm. Dualar çox kömək olur. Mənə pislik edən insanlara heç nə eləmirəm. Allahımdan kömək istəyirəm. Onların öz cəzalarını çəkdiklərini görürəm.

– Paxıllıqlara çox məruz qalmısız?

– Paxıllıqları görmürəm. Görmək də istəmirəm. Hər bir insan sənətdədirsə, zirvədədirsə, onu sevənlər də, sevməyənlər də olur. Bu artıq tarixin sınağından keçmiş bir faktdır.

– Qarşıdakı konsertlərdən başqa hansı yaradıcılıq planlarınız var?

– Teatrda yeni tamaşalarımız olacaq. Novruz Aslanovdan mahnım var, həmin mahnıya klip çəkiləcək. Cahangir Qurbanovun mahnıları üzərində də çalışacağıq.

Xəyalə Rəis

Teatrşünas

Kaspi.-2014.-18 aprel.-S.12.