“My name is İntiqam” tamaşaçı rəğbəti ilə qaşılandı

Komediya filminin qala gecəsində iştirak edənlər onu bəyəndiklərini bildirdilər

Noyabrın 28-də Nizami Kino Mərkəzində “My name is İntiqam” milli komediya filminin qala- gecəsi keçirildi. Gecəyə rejissorlardan tutmuş, tanınmış müğənnilərə qədər bir çoxları qatılmışdı. Adətən xarici aktyorların gəlişinə belə hazırlaşsaq da, bu dəfə yerli filmimizin nümayişini səbirsizliklə gözləyirdik. Gecəyə qatılanlar arasında əvvəlki qala gecələrindən fərqli olaraq, qışqırıb hay-küy salan yeniyetmələr deyil, sənət adamları, elit təbəqənin nümayəndələri üstünlük təşkil edirdi.

Nəhayət ki, bizə deyilən vaxtdan 1 saat sonra filmin yaradıcı heyəti alqışlarla kinoteatra daxil oldu, foyedə mətbuatın suallarını cavablandırıb filmi tamaşaçılarla bərabər izləməyə keçdilər.

Film Lənkəran rayonunda yaşayan saf bir oğlanın - Ağalarov İntiqamın həyatından bəhs edir. Belə ki, ucqar bir bölgədə yaşlı bir nənə öz nəvəsinin ingilis dilində oxuduğu mahnını “Youtube”-a yerləşdirir. Həmin video izlənmə rekordu qırır. Şirkətlərin biri isə ən çox izlənilən filmə böyük pul mükafatı təqdim edir. Məsələ də bundan sonra başlayır. İntiqamın pullarına sahib çıxmaq istəyən varlı iş adamı onun başını aldatmaq üçün müxtəlif üsullara əl atsa da, niyyəti boşa çıxır.

Filmdə Lənkəran Dövlət Dram Teatrının aktyorları da iştirak edir. Filmin ssenari müəllifi Fariz Əliyev, Ənvər Abbasovdur, aktyorlar Müşviq Şahverdiyev, İlkin Misgərli, Teymur Məmmədov, Aysel Bayramova və digərləri əsas rollarda çəkilib. Emil Abdullayevin rejissorluğu ilə çəkilən film bitdikdən sonra tamaşaçılar tərəfindən uzun müddət ayaq üstündə alqışlandı. Daha sonra yaradıcı heyət üzvləri səhnəyə çıxıb çəkiliş zamanı başlarına gələn maraqlı hadisələrdən danışdı. Syoma rolunun ifaçısı İlkin Misgərlinin zalda əyləşən rejissorlara səslənərək onun homoseksual rolundan başqa da maraqlı obrazlar yarada biləcəklərini deməsi zalda gülüşlə qarşılandı.

Təqdimatdan sonra filmin qəhrəmanı Müşfiq Şahverdiyev bizə Azərbaycanda Türkiyə filmlərinin qala gecələrinin keçirildiyini, öz filmlərimizə isə belə tədbirlər təşkil olunmadığını vurğuladı: “Biz bir ilkə imza atdıq. Hesab edirəm ki, gecə hər kəs üçün maraqlı keçdi. Heç də türklərin qala gecəsindən geri qalmadı. Gördüyünüz kimi, təqdimata xeyli tamaşaçı toplanıb. Qala gecəsi üçün nə lazımdırsa təşkil etmişdik və gözlədiyimizdən də artıq tamaşaçılar gəldi. Film də yaxşı qarşılandı. Tamaşaçılar film haqqında yaxşı fikirlər söyləyirlər. Camaat gəlir, baxanların sayı çoxdur. Bu mənim üçün və Azərbaycan filmini sevənlər üçün sevindirici xəbərdir. Azərbaycan filmi bu gün inkişaf edirsə, biz buna sevinməliyik. Mən filmimiz haqqında əslində tənqid də gözləyirdim. Amma hələ belə bir şey eşitməmişəm, amma film nümayişə çıxmamışdan qabaq gözləyirdim. Göründüyü kimi, kütlə filmi qəbul etdi. Çox narahat idim ki, baxan insanlar filmimizi necə qəbul edəcəklər. Yəqin ki, bəyənməsəydilər və axın az olsaydı, tənqid edənlər də olacaqdı. Bəlkə də bundan sonra olacaq, amma hələ ki sakitlikdi”.

M.Şahverdiyev filmi haqqında ağızdolusu danışdı: “Filmin uğuru kollektivin yaxşı olmasından asılıdır. Eləcə də normal büdcə olmalıdır. Film sahəsində ən önəmli məsələ onu işin mütəxəssisinə tapşırmaqdır. Hərə çiyninə bir kamera alıb, film çəkməməlidir. Bu işdə məqsəd olmalıdır. Mən bu işə pul qazanmaq məqsədilə başlamamışam. Çünki bilirəm ki, bu gün Azərbaycan kinosundan pul qazanmaq tam real deyil. Rejissorumuz Emil Abdullayev Türkiyədə təhsil alıb. O, gözlədiyimizin 5 qatını bizə verdi, şükür Allaha. Bir balaca çatışmazlıqlarımız da ola bilər. Bu bizim ilk işimizdi. Mən deyərdim ki, əskikliklərimizi görən adamlar da gəlib bu filmə baxsınlar. Biz növbəti filmlərimizdə onsuz da onları yığışıdıracağıq. İnşallah, daha da güclənəcəyik”.

Gələcək planlardan danışan M.Şahverdiyev bildirdi ki, məqsədləri Azərbaycanda film biznesi yaratmaqdır: “Türklər və başqa millətlər film sahəsində loru sözlə desək, at oynadırlar. Biz niyə öz filmlərimizə baxmayaq? Mən komedik filmlər tərəfdən deyirəm ki, Müşfiqin və komandamın məqsədi odur ki, belə filmlərin inkişafını ayağa qaldıraq. Təbii ki, bu, tək bizimlə olmayacaq. Digər dostlarımız da bizlərlə bərabər olmalıdırlar. Onlar da filmlər çəkməlidirlər. İlkin Həsənli, Fərda Amin, Elməddin Cəfərov çəkirlər. Onların da işləri uğurlu olsun. Təki, Azərbaycanda filmlərimiz inkişaf eləsin. Mənim bir arzum da odur ki, aktyorlar toylardan uzaq olsunlar. Özümə də aktyorluğa aid işlərlərlə məşğul olmağı arzulayıram”.

“Bacanaqlar” serialının rejissoru, aktyor Ramin Hacıyev qala gecəsində iştirak etdikdən sonra öz fikirlərini “Kaspi” ilə bölüşdü: “Filmi çox bəyəndim. Yaxşı ki, belə filmlər çəkilir. Yay mövsümündən bəri heç kim istirahət etmir, işləyir. Müşfiqin aktyor kimi plastikası çox gözəldir. Filmdə iştirak edən bütün yaradıcı kollektivi təbrik edirəm. Lənkəran Teatrının aktyoru isə mənim diqqətimi daha çox çəkdi. Düzdür, bir az qurşaqdan aşağı zarafatlar çox idi. Ümumilikdə götürdükdə, film haqqında təəssüratlarım çox yaxşıdır. Filmin ssenari müəllifləri “Bacanaqlar”, eləcə də bir sıra serialların ssenari müəllifləridir. Onlar, həmçinin bu yaxınlarda nümayiş olunacaq “Xoxan” və “Bozbash picture”-nin də ssenaristləridir. Onlarda heç zaman plagiat olmur. Sevinirəm ki, Azərbaycanda belə filmlər çəkilir. Müşfiqə və onun komandasına uğurlar azrulayıram”.

Stund Up və gülüş ustası Fərda Xudaverdiyev dekabrın 8-də onların hazırladıqları “Xoxan” filminin də qala gecəsinin keçiriləcəyini xatırladaraq, izlədiyimiz film haqqında öz təəssüratlarını bölüşdü: “Film çox maraqlı idi. Əsas odur ki, “My name is İntiqam” bizi güldürməyi bacardı. Filmi gülüş ustası kimi deyil, bir tamaşaçı olaraq izlədim. Filmdə olan rayon səhnələri, keçidlər mənim çox xoşuma gəldi. Film gec nümayiş olunduğu üçün özümüzü bir az yorğun hiss etdik. Filmin sonlarına yaxın çox yorulduq. İlk yarım saat çox əyləncəli keçdi”.

F.Xudaverdiyev “Xoxan” filmini izlədiyimiz zaman iki film arasındakı fərqi görəcəyimizə bizi əmin etdi: “Mən deyərdim ki, zarafatın səviyyəsinə görə “Xoxan” filmi “My name is İntiqam”-dan daha güclü filmdir. Zarafatın da özünə görə bir çəkisi var. Adını zarafat qoyub onu çəkisizliyə aparmaq olmaz. Bizdə daha çox çəkili zarafatdır. Bir də durum komedi, yəni vəziyyətə görə tamaşaçı gülür. Əsasən də bu olmamalıdır”.

Qeyd edək ki, qala gecəsində Azərbaycan tamaşaçısının keyfiyyətli yerli filmlər və onların təqdimat mərasimlərinə çox susadığını hiss etdik. Bu yanğıya nəhayət, su səpilməyə başlanıldığına yalnız sevinmək və bu işi görənlərə həvəs, stimul vermək lazımdır. Bir də, inanırıq ki, hər növbəti iş, özündən əvvəlkindən bir addım da olsa, daha irəli gedəcək.

Xəyalə Rəis

Kaspi.- 2014.- 2 dekabr.- S.12.