Tanınmağa deyil, sevilməyə üstünlük verirəm

Vüsal Əliyev: “Mən bu sənətə gələndə hərə özünə bir heyvan adı qoymuşdu. Mən də buna şou deyil, zoo-biznes dedim”

O, bir zamanların, el dilində desək, populyar ulduzu idi... “Dayan ürəyim”, “Gəl anam” kimi mahnıları dillər əzbərinə çevrilmişdi. Onun albomları əl-əl gəzirdi. Söhbət müasir texnologiyanın inkişaf etdiyi bu dövrdə əksər tamaşaçıların yaddaşından zaman-zaman silinən Vüsal Əliyevdən gedir.

Ötən gün Vüsal Əliyev “Kaspi”-nin suallarını cavablandırdı. İfaçı bizimlə söhbətində gündəmdən danışdı və şou-biznesin çirkin cəhətlərindən şikayətləndi.

- Vüsal bəy, uzun müddətdir ki, sizi efirlərdə, gündəmdə görə bilmirik. Bunun xüsusi bir səbəbi varmı?

- Mən heç zaman efir və gündəm üçün çalışmamışam. Hər zaman tamaşaçıların yaddaşında qalmağa cəhd göstərmişəm. Belə ki, yanvarda 17-ci albomum işıq üzü görəcək. 17 ildir ki, sənətdəyəm və hər ilimə bir albom düşür. Düzdür, qəbul edirəm ki, əvvəllər daha məşhur idim. O zamanlar albomumuz işıq üzü görəndə efirlərdə böyük təmtəraqla qarşılanırdı. Öncədən həmin albomun təqdimatı olurdu. Ancaq indi vəziyyət əvvəlki kimi deyil. İndi bu barədə yalnız saytlarda qısa bir məlumat verilir və bununla da kifayətlənirlər. Bu 17 ildə 17 dəfə televiziyada görünməmişəm. Bu müddət ərzində heç vaxt radiolarda mahnım səslənməyib. Heç vaxt üzdə olan müğənni olmamışam. Əvvəllər televiziyada elanlar gedirdi ki, filankəsin albomu çıxacaq, dayanacaqlarda mahnılar səslənirdi. İndi şəhərimiz abadlaşıb və bu cür reklamlara son qoyulub. Artıq disk satışı yoxdur. Hər kəs mahnıları internetdən götürür. Heç vaxt gündəmdə olmadığım üçün elə bilirlər ki, sənətdən uzaqlaşmışam. Amma əslində mən heç boş dayanmıram.

- Klip məsələsində də tənbəllik edirsiniz. Nə üçün bu qədər passivləşmisiniz?

- Bəli, o barədə çox passivəm (gülür). Boynuma alıram. Ümumilikdə götürdükdə 7 klipim olar, ya olmaz. Ancaq yuxarıda qeyd etdiyim albomumda 170-ə yaxın mahnı yer alacaq. Albomun üzərində “17+17=170 bəstə” yazılacaq. Klipə gəlincə isə, ötən il “Susqun” adlı klip çəkdirmişəm. O da çox yayımlanmadığı üçün elə də tanınmadı.

- Bu gün şou-biznesin özü də kateqoriyalara bölünüb. Siz özünüzü hansı kateqoriyaya aid hesab edirsiniz?

- Müğənni var ki, gündəm üçün çalışır. Bütün işini ona görə hazırlayır. Mahnılarını gedəcəyi toylara görə yazdırır. Mən heç zaman oynadan müğənnilərdən olmamışam. Hər zaman mahnılarımda düşündürən repertuara yer ayırmışam. Toylara gedəndə, 99-cu ildə oxuduğum “Ana” və ya lirik mahnılarımı tələb edirlər. Mahnılarımın sözlərində heç vaxt bayağılıq olmayıb. Mahnını yaddaşda saxlayan onun sözləri olub. 17 ildə ən azı reklamla, efirlərə çıxmağımla yaddaşlarda qalmışamsa, bu gün kateqoriyalardan söhbət etməyə belə dəyməz. Mən efirdə heç kimi yamsılamıram. Özümə xas oxu tərzim var. Bir sözlə, şou-biznesdə Vüsal Əliyevin öz dəsti-xətti var.

- Toylar demişkən, Vüsal Əliyev toylara neçəyə gedir?

- Bu mənim ən yaralı yerimdir. Məni hər kəs toyuna pulsuz apara bilər.

- Necə?

- İndinin özündə də mənim pulsuz getdiyim toylar pul ilə getdiyim toylardan qat-qat çoxdur. Çünki çevrəm çox böyükdür. Əgər bir insanla oturub bir stəkan çay içmişəmsə və ya kimləsə duz-çörək kəsmişəmsə, o insanla toy haqqında söhbət edə bilmərəm. Düzdür, elə insanlar da var ki, bu gün bir tikə çörək kəsir, sabah isə oğlunun toyuna dəvət edir. Amma artıq bunu onların Allahı bilər. Baxmayaraq ki, pul bu gün hamı üçün, xüsusilə də mənim üçün vacibdir. Mən heç zaman mənəviyyatımı pula satanlardan olmamışam. Bunu hər kəs bilir. Hərdən deyirəm ki, “İrandan mal gətirib ziyana qoymuram ki. Allahın verdiyi səsdir, aza da, çoxa da Allah bərəkət versin”.

- Deyəsən verdiyim sualdan yayınmağa çalışırsınız.

- (Gülür) Bilirsiniz, 100 dollara da klip çəkmək olar, bir milyona da. Baxır toyu danışacağın insanlara. Elə toylar olub ki, onlara pulsuz getmişəm. Hər qiymətə toylara gedirəm. Kimin nəyə gücü çatıbsa, onun qəlbinə dəyməmişəm. Heç kimə deməmişəm ki, bu qədər verməlisən. Pula görə özümü insanların gözündən heç zaman salmamışam. Adam var ki, iş yerinə bir ay hər gün gedib-gəlir, heç üç yüz manat maaş almır. Biz yarım saatın içərisində 300 manatdan çox pul qazanırıqsa, buna görə Allaha şükür etməliyik. İnsan gərək naşükür olmasın.

- Nə üçün yaradıcılığınızda xarici mahnılara yer ayırmırsınız?

- Öz mahnılarımızı salamat şəkildə tamaşaçılara təqdim edim, qalsın xarici mahnılar (gülürük).

- Hesab edirsiniz ki, yerli mahnıları salamat şəkildə ifa edə bilmirsiniz?

- Bizdə salamat şəkildə nə var ki? Bir tamaşaçı kimi verilişlərə kənardan baxanda, onların elə də inandırıcı olmadığını hamımız görürük. Etiraf edirəm ki, Azərbaycan telekanallarına yalnız futbol olandan-olana baxıram. Efirlərimizdə gedən heç bir verilişdən xəbərim yoxdur. Yeni albomum çıxacağı üçün son zamanlar bəzi verilişləri izləməyə çalışıram.

- Kanallara dəvət olunmursunuz deyə baxmırsınız, yoxsa doğrudanmı verilişlərimiz sizin diqqətinizi çəkmir?

- Deməzdim ki, verilişlərə dəvət olunmuram. Mən istəyirəm ki, getdiyim verilişlərdə mövzu mənim mahnılarımdan ibarət olsun. Əgər hər hansı bir qalmaqala görə məni verilişlərə dəvət edirlərsə, həmin verilişdə iştirak etməyim yersizdir. Belə verilişlər mənə lazımdırmı? Reytinq xatirinə efirdə çıxıb qalmaqal yaratmağın mənası yoxdur. Artıq nə ar, nə namus, nə abır - heç biri qalmayıb. Reytinq xatirinə hər şey edirlər. Elə reklam mənə lazım deyil. Mən tanınmağa deyil, sevilməyə üstünlük verirəm. Bu gün tanınmaq çox asandır. Hər hansı bir insanı efirdə hər gün göstərsələr, hamı onu tanıyacaq, ancaq o sevilməyəcək. Onun sevilməyi hərəkətindən, nitqindən, özünü aparmağından asılıdır. Efirə çıxım məni görsünlər deyə verilişlərə çıxmağı lazımlı hesab etmirəm. Allah elə tanınmağa lənət etsin. Mənim üç albomum çıxmışdı, bütün respublika mahnılarımı dinləyirdi. Ancaq xalq mənim üzümü hələ görməmişdi.

- Sizin mahnıları bayağı adlandıran insanlara münasibətiniz necədir?

- O sözü mənə deyən adamı axtarıram (gülür). Görəsən, o insanın özü necə insandır ki, başqasına lağ edir? Hər kəs kompyuter arxasında şirə dönür. “Youtube”-da istifadəyə verilən mahnıları “dislike” edirlər. Əslində tamaşaçıların fikirləri mənə çox maraqlıdır.

- Vüsal Əliyev özünü şou-biznesin nümayəndəsi hesab edirmi?

- Mən heç zaman şou-biznesdə yer almamışam. Bir onu bilirəm ki, mən bu sənətə gələndə hərə özünə bir heyvan adı qoymuşdu. Mən də buna şou deyil, zoo-biznes dedim. Bu aləm mənlik deyil. Məndə ulduz xəstəliyi yoxdur. Çox utancaq insanam. Özümü adi insanlardan heç də seçmirəm. 17 ildə Allah şahiddir ki, heç bir toyda fonoqram oxumamışam. Heç bir toya disk aparmamışam. Telefonlarıma da məndən başqa heç kim cavab verməyib. Yanımda məndən başqa köməkçim olmayıb. Sosial şəbəkələrdəki profillərimin də istifadəçisi özüməm. Mənə ünvanlanan bütün suallara və zənglərə özüm cavab verirəm. Tamaşaçının bir SMS-i mənim ən pis günlərimdə elə dayaq olub ki, onu sözlə əvəz edə bilmərəm. Heç zaman digər ifaçılar kimi deməmişəm ki, mənim sosial şəbəkələrimi prodüser idarə edir. İnsan həyata bir dəfə gəlir. Mən o SMS-ləri oxumayacağamsa, onlar mənim içimdə hansısa hissləri oyatmayacaqsa, o profilləri nə üçün açmışam ki? Yenə də deyirəm ki, bu sənətə pul yığmaq üçün gəlməmişəm. Nə şouya, nə də onun biznesinə heç vaxt meylim olmayıb.

Xəyalə Rəis

Kaspi.-2014.-16 dekabr.-S.12.