İsraildə “Xocalıya Ədalət“ fotosərgisi açıldı

Fevralın 3-də ilk dəfə olaraq İsrailin mərkəzində yerləşən Lod şəhər sakinləri Azərbaycanın müasir tarixinin ən kədərli və qanlı səhifələrindən biri ilə - qanlı Xocalı qətliamı ilə tanış oldular.

Azərbaycan-İsrail Beynəlxalq Assosiasiyasının ("Azİz") mətbuat xidmətindən verilən məlumata görə, fotosərgi Heydər Əliyev Fondunun və Lod şəhəri bələdiyyəsinin dəstəyi ilə bu assosiasiya tərəfindən təşkil olunub.

Xocalı faciəsinə həsr olunmuş tədbirdə əslən Azərbaycandan olan insanlar, həm də orta yaşlılar, gənclər və yeniyetmələr iştirak edirdi. Tədbiri Azərbaycan-İsrail Beynəlxalq Assosiasiyasının İdarə Heyətinin üzvü, advokat İlana Laytman açıb. Onu qeyd edək ki Laytman bu tədbirin təşəbbüskarıdır və eyni zamanda "Yəhudi Evi" partiyasının fəal üzvlərindəndir və Lod şəhəri çoxlu Azərbaycan əsilli insanların yaşadığı bir məkandır.

Sonra çıxış edən Azərbaycan Mədəniyyət Mərkəzinin rəhbəri Yeganə Salman qeyd edib ki, misli görünməmiş vəhşiliklə törədilmiş Xocalı soyqırımı XX əsrin ən qorxunc faciələrindən biridir. “Azərbaycanın ən qədim yaşayış məntəqələrindən biri – Xocalı şəhəri bir gecədə yerlə-yeksan edilərək yandırılıb. Bu faciə bütün bəşəriyyətə qarşı törədilmiş cinayətdir. Erməni silahlı birləşmələrinin əməlləri nəticəsində 613 nəfər qətlə yetirilmiş, 487 adam əlil olmuş, 1275 dinc sakin–qocalar, uşaqlar, qadınlar əsir götürülərək görünməmiş işgəncələrə, təhqirlərə məruz qalmışlar”- deyə, Salman deyib.

Xocalıya həsr olunmuş fotosərginin açılışına gələn İsrail parlamentinin deputatı Şuli Mualem tədbir iştirakçıları qarşısında çıxış edərək, sərgidə gördüklərindən öz hiddətini gizlədə bilməyib. "İnanıram ki, Xocalıya ədalət zəfər çalacaq və azərbaycanlı qaçqınların hüquqları bərpa olunacaq, Xocalıda həlak olanların xatirəsi xalqın yaddaşında həmişəlik qalacaq" – deyə israilli millət vəkili qeyd edib.

Fotosərgidə çıxış edən Lod şəhərin meri Yair Revivo qeyd edib ki, Xocalı soyqırımına həsr olunmuş bu sənədli şəkillər, dözülməz, dəhşətli səhnələr Azərbaycan xalqının ürəyində sağalmaz bir yara açıb. "Mən Azərbaycana qarşı Ermənistanın işğalçı siyasətini kəskin şəkildə pisləyirəm və qardaş Azərbaycan xalqına dəstəyimi bildirmək istəyirəm" – deyə Yair Revivo bildirib.

İsrail parlamentinin deputatı Şuli Mualem, Lod şəhərin meri Yair Revivo və digər sərgiyə gələnlər qonaqlar Xocalı faciəsi qurbanlarının xatirə Kitabına ürək sözlərini yazıb.

Kaspi.-2014.-5 fevral.-S.6.