Yeni mövsümün serial aləmi

Telekanallar yeni mövsümdə hansı serialları nümayiş etdirəcək?

Artıq istirahət mövsümünü də başa vurduq. Yeni mövsümün gəlişi daha çox televiziyalarda hiss olunur desək, heç də yanılmarıq. Adətən böyük auditoriya qazanmağa, tamaşaçı diqqəti çəkməyə çalışan telekanallar belə vaxtlar yeni layihələrlə və verilişlər, seriallarla tamaşaçıların görüşünə gəlirlər. Bu baxımdan televiziya işçiləri yay mövsümündə istirahət etməklə yanaşı, həm də yeni seriallar, kinolar, layihələr üzərində əmək sərf edirlər. Tamaşaçı da öz növbəsində indidən izləyəcəkləri seriallar və verilişlərlə maraqlanıb, öz maraq dairələrinə uyğun olanı diqqətlərində saxlamağa çalışırlar.

Biz də bütün bunları nəzərə alaraq yeni mövsümdə telekanallarımızda nümayiş olunacaq seriallarla maraqlandıq. Öyrəndik ki, bu mövsüm tamaşaçılarımız bəzi kanallarda ötən ildən qalan serialların ardını izləməkdə davam edəcəklər. Müxtəlif kanallara yeni seriallar təqdim olunsa da onların nümayişinə noyabr ayından start veriləcək. Belə ki, serialları hazırlayan prodakşınlar serialın ilk bölümlərini çəkib telekanallara təqdim etməyi planlaşdırırlar. Yeni çəkilən serialın ilk bölümlərini izləyən telekanallar isə bu aydan etibarən izləyicilərinin zövqünə uyğun serialları yayıma buraxacaqlarını bildirirlər.

Bu mövsüm də yeniliklərlə...

İlk olaraq ATV telekanalında reytinq toplayan və uzun müddətdir ki, kiçik komanda ilə tamaşaçıların sevimlisinə çevrilən “Bacanaqlar” serialından başladıq. Serialın baş rejissoru Ramin Hacıyev bizimlə söhbətində hər mövsümdə olduğu kimi, bu mövsümdə də köklü dəyişikliklər olacağını qeyd etdi. Onun sözlərinə görə növbəti həftədən efirdə nümayiş olunacaq bölümdə, ilk olaraq serialın adı dəyişiləcək: “Yeni mövsümdən serialın ssenarisində böyük dəyişikliklər olacaq. Bizim baş qəhrəmanlarımız Talehlə Qismət həyat yoldaşlarından ayrılıb, başqa xanımlarla ailə həyatı quracaqlar. Taleh Mətanət xanımla ailə həyatı qurduqdan sonra onun başı bəlalardan açılmayacaq. Əslində çox məsum görünən bu xanım ailəyə daxil olduqdan sonra qayınanası, baldızı və həyat yoldaşı Taleyin həyatını bir növ cəhənnəmə çevirəcək. Artıq Qismətlə Taleh bacanaq olmadıqları üçün serialın adı “Köhnə bacanaqlar” adlandırmağı məsləhət bildik”.

Rejissorunun sözlərinə görə, serial əvvəlki axarı ilə davam edəcək: “Serialda əvvəlki aktyorlar rol alacaq. Bundan əlavə komandaya 8 aktyor əlavə etdik ki, onların ifası ilə növbəti həftələrdə tanış olmaq imkanınız olacaq. Onu da qeyd edim ki, çəkiliş məkanında yeniliklər də etdik. Çəkilişlər tamam başqa bir məkanda aparılır”.

Ötən mövsümdən həftənin bazar günü 21:00 da efirə nümayiş olunan serial öz vaxtını dəyişməyib. Artıq çəkilişlərə start verilib. Demək olar ki tamaşaçılara təqdim olunacaq serialın ilk bölümü hazırdır.

Ramin Hacıyevin sözlərinə görə, tamaşaçıları ekran qarşısında əyləşdirmək üçün yeni bir serial nümayiş etdirirlər ki, onlar seriala baxmaqdan yorulmasınlar: “Bu il də serialda bir çox yeniliklər olacaq. Mən deyərdim ki, əgər aktyorları dəyişsək bu, tamamilə yeni bir serial olacaq. Serialda ssenari və dekorasiya dəyişib deyə insana sanki başqa serial təsiri bağışlayacaq. Ümid edirəm ki, bu mövsüm də tamaşaçıların sevgisini qazana biləcəyik”.

Daha sonra «Xəzər» televiziyasında yayımlanan “Bir ailəm var” serialının baş rejissoru Rüfət Şahbazova yeni mövsümdəki dəyişikliklərlə bağlı müraciət etdik.

Rejissorun verdiyi məlumata görə, serialı yeni mövsümdə tərk edən aktyor hələ ki, olmayıb. Belə ki, serialda Elnur Kərimovun canlandırdığı Samir obrazı dünyasını dəyişib: “Yeni mövsümdən 4 nəfər yeni xarakterli obraz seriala daxil oldu. Aktyor heyətindən əlavə serialın çəkiliş məkanı tamamilə dəyişib. Buna səbəb isə efir vaxtımızın həftədə 5 gün olmasıdır. Seriala tələbat yaxşıdır deyə, onun nümayişini həftədə 5 dəfə əlavə ediblər. Oxucularınızın diqqətinə çatdırım ki, həftə içi hər gün saat 22:20-də efirdə olacağıq”.

“Bir ailəm var” serialı sentyabrın 8-dən etibarən yeni bölümləri nümayiş olunacaq. Əvvəllər çəkiliş zamanı 5-6 məkandan istifadə olunurdusa indi 20 məkandan istifadə olunacaq. Serialın çəkilişi paytaxtın kənarında da həyata keçiriləcəyi nəzərdə tutulur.

Serialın ssenarisində ana xətt öz aktuallığını qoruyub saxlayacaq. Serial ötən mövsümdən qaldığı yerdən genişlənmiş formada davam edəcək. Mövzuya köməkçi xətlər daxil olacaq. Belə ki, 5 paralel süjet xətti ilə serialı davamı çəkiləcək. Hansı xətt daha çox güclənərsə onunla da mövsüm ərzində o xətt üzərində işləniləcək.

Telekanallarımızda yeni seriallar

“Oskar” prodakşının rəhbəri, “Toy gecəsi”, “Məhkuмlar” serialının quruluşçu rejissoru və serialın baş prodüseri Yaşar Əhmədov bizimlə söhbətində yeni serial çəkilişlərinə başladığını, ancaq hələ efirlərdə yayımlanmayacağını bildirdi. Onun sözlərinə görə üzərində işlədiyi serial melodrama janrındadır: “ATV kanalında nümayişi nəzərdə tutulan serialın nümayişini noyabr ayı üçün planlaşdırırıq. Çəkilişlər yeni başladığı üçün şərti olaraq “Səni ürəyim sevdi” qoymuşuq. Ola bilər ki, müzakirələr zamanı adda dəyişikliklər olsun. Serialda Nazir Rüstəmov, Şəlalə Şahvələdqızı, Anar Heybətov və tanınmış istedadlı aktyorlar iştirak edəcəklər. Serialın mövzusu bir qədər fərqli və maraqlı olacaq. Ssenarinin ana xəttində sevgi durur. Ailəyə kənardan olan müdaxilələr nəticəsində parçalanmaya qədər gəlməsi sonda həqiqətin meydana çıxması olacaq”.

Bu mövsümdən Space televiziyasında yeni serial izləmək şansımız olacaq. Belə ki, bu mövsüm Space televiziyasında “Səadət” serialı nümayiş olunacaq. Hazırda serialın çəkiliş prosesi gedir. Serialda İncəsənət və Mədəniyyət Universitetinin tələbələri, gənc rejissorlar, Xalq artisti Vaqif Mustafayevin tələbələri, Anar Məmmədəliyev və Elvin Rüstəmlinin bir gənc kadrlar iştirak edirlər.

Qeyd edək ki, filmin bədii rəhbəri, Vüqar Təhməzovun da seenaristlər, Tural Bakuvi və Ramal Rəsula məxsusdur.

Başqa bir yeni serial isə Hüseynbala Mirələmovun romanı əsasında çəkilən “Gənlik paltarı” serialıdır. Serialın ssenari müəllifi Əyyub Qiyas, rejissoru Elşən Heydərovdur. Əyyub Qiyasın sözlərinə görə tamaşaçılar fərqli bir serial görəcəklər: “Mən serialın ssenarisini yazıram və prodüserəm. Serial Hüseynbala Mirələmovun “Gəlinlik paltarı” romanı əsasında çəkilir. Elə serial da “Gəlinlik paltarı” adlanacaq. Baş rollarda əməkdar artist İlqar Cahangir və aktrisa Ülfət Bəşir çəkilir”.

“Eşq aşiqlər üçün əzab, vüsalına çatanlar üçün imtahandır. Bura vüsalın başlandığı, sevginin bitdiyi yerdir” şüarı ilə oktyabrdan efirə gedəcək serialın hansı kanalda nümayiş olunacağı hələlik gizli saxlanılır.

Yerli televiziyalarla yanaşı Azərbaycan tamaşaçısı Türk seriallarına da maraq böyükdür. İzləyicilərin qonşu telekanalın seriallarına marağını nəzərə alaraq Türkiyədə bu mövsüm nümayiş olunacaq serialları da araşdırdıq. Odur ki, Türkiyə telekanallarında biri-birindən maraqlı “Bana Artık Hicran De”, “Benim Adım Gültepe”, “Reaksiyon”,

“Aşktan Kaçılmaz”, “Yılanların Öcü”, “Ah Neriman”, “Emanet”, “Kadim Dostum” kimi yeni seriallar nümayiş olunacaq.

Beləliklə, müraciət etdiyimiz rejissorların sözlərinə görə, bu il Azərbaycan tamaşaçıları ötən mövsümdən fərqli, bugünkü izləyicilərin zövqlərini oxşaya biləcək səviyyədə seriallar təqdim olunacaq. Nə deyirik, yaşayarıq görərik.

Xəyalə Rəis

Kaspi. - 2014.- 3 sentyabr.- S. 12.