Hamısı maraqlı repertuar vəd edir

Mədəniyyət mərkəzləri yeni mövsümə yeni layihələrlə başlayırlar

Qızmar, isti yay günlərinə əlvida deyib, yeni mövsümü salamlamaq ərəfəsindəyik. Yeni mövsüm yeniliklərlə zəngin yeni iş ili deməkdir. İsti yay aylarında öz guşəsinə çəkilib, qapılarını qapayan mədəniyyət mərkəzləri yeni layihələr və zəngin repertuar proqramları ilə geri dönməyə hazırlaşırlar.

Biz də bu mövsümdə mədəniyyət mərkəzlərinin tamaşaçılara təqdim edəcəkləri layihələrlə bağlı onlara müraciət etdik. Öyrəndik ki, mədəniyyət mərkəzləri yaxşıca dincəldikdən sonra maraqlı repertuarla mövsümü açmaq niyyətindədirlər.

İlk olaraq Heydər Əliyev Sarayının bu mövsümlük repertuarı ilə maraqlandıq. Sarayın mətbuat xidmətinin rəhbəri Anar Fərəczadənin bizə verdiyi məlumata görə, bu dəfə də zəngin proqramla tamaşaçıların görüşünə gələcəklər: “Hər il yeni konsert mövsümünə böyük məsuliyyətlə, yüksək səviyyədə hazırlaşan Heydər Əliyev Sarayı bu dəfə də öz adət-ənənəsinə sadiq qaldı. Yeni mövsüm sentyabrın 19-da “İsti payızın sərin nəğmələri” adlı geniş proqramla açılacaq. Konsertdə ölkənin tanınmış sənətçiləri Səbinə Babayeva, Səlim Abbasov, Sevda Yahyayeva, Nurlan Növrəsli, Günay İbrahimli, Murad Sadıx, Amil Həsənoğlu, Kənan Qədimov, Pərviz Abdullayev, Nicat Məhərrəmov, Nicat Cəfərzadə, Elçin Cəfərov, Gülay Qədirova, Elnur Zeynalov, “Cəngi” rəqs ansamblı və başaqları iştirak edəcəklər. Bunlardan əlavə, yeni mövsümdə də Saray bir çox yubileylər və dövlət tədbirlərinə ev sahibliyi edəcək”.

Saray sentyabrın 25-də Rusiya estradasının populyar müğənnisi Dima Bilan, 28-də rusiyalı müğənni Elena Vaenqa, 10-14 dekabr tarixlərində “Bu şəhərdə”, 25 oktyabrda Ani Lorak 31 oktyabrda Andrey Makareviç, 15-16 noyabrda uşaqlar üçün yeni "Luntik və onun dostları" tamaşasına, 23 noyabrda Lara Fabian, 3-5 dekabr tarixlərində Qriqoriy Leps kimi məşhurlara səhnə verəcək. “Sadaladığım ifaçılarla bərabər yeni mövsümdə bir çox digər yerli və əcnəbi ulduzların konsertlərinin keçirilməsi də planlaşdırılır” – deyə müsahibimiz vurğuladı.

Qeyd edək ki, açılış konserti saat 19:00-da başlayacaq. Biletlərin qiyməti 10 manatdan – 30 manata qədərdir. Biletləri şəhərimizin kassalarından əldə etmək olar.

Ötən mövsüm vətəndaşların ziyarət etdiyi məkanlardan biri də Azərbaycan Xalça Muzeyi olurdu. Amma bu mövsümdə həmin vətəndaşlar məkanını dəyişməli olacaqlar. Ötən həftə müasirliyi və orijinal görkəmi ilə də diqqəti cəlb edən Xalça Muzeyi qapılarını sevimli ziyarətçilərinin üzünə açıq elan etdi. Belə ki, Xalça Muzeyinin məkanı dəyişdirildi və muzeyin dənizkənarı bulvardakı yeni binası istifadəyə verildi. Bükülmüş xalça şəklində olan muzey binası öz qapılarını seyrçilərin üzünə açdı. 13300 eksponat və əşyanın saxlanıldığı muzeydə Azərbaycanın 7 əsas məktəbini - Quba, Bakı, Şirvan, Gəncə, Qazax, Qarabağ və Təbriz xalça məktəbini təmsil edən sənət nümunələri var. Muzeyə giriş orta məktəb şagirdləri üçün 1 manat, tələbələr üçün 2 manat, ölkə vətəndaşları üçün 5 manat, xarici turistlər üçün 10 manat müəyyənləşdirilib. Muzeylə əməkdaşlıq edəcək turizm şirkətləri üçün endirimli qiymətlər nəzərdə tutulub.

Uşaqların və böyüklərin əyləncə dünyası olan Bakı Dövlət Sirkinin mətbuat katibinin rəhbəri Mahir Hümbətovla əlaqə saxladıq. Onun sözlərinə görə, mövsümün açılış günü tam olaraq dəqiqləşdirilməyib. Mövsümün hər zamankı kimi digər mədəniyyət mərkəzlərindən daha gec açılacağı gözlənilir. Xarici sirk ustaları ilə müqavilə bağlanılandan sonra mətbuata dəqiq məlumat veriləcək. Təxminən yeni mövsümün açılışı oktyabrın axırlarına nəzərdə tutulub.

Nizami Kino Mərkəzində isə bu mövsüm də biri-birindən maraqlı yerli və xarici filmlər nümayiş olunacaq. Mərkəzin mətbuat xidmətinin rəhbəri Arzu Əhədovanın verdiyi məlumata görə, bu mövsüm yeni filmlərin premyeraları, dünyanın müxtəlif ölkələrindən ən maraqlı yeni filmlərin nümayişi gözlənilir: “Hələlik dəqiqləşən odur ki, bu mövsüm Fellinin filmlərindən ibarət İtaliya filmləri festivalının keçirilməsi planlaşdırılıb. Bundan əlavə, Milli retro filmlərin nümayişi də plana daxil edilib. Yəni Azərbaycanın köhnə yerli filmləri silsiləsi şəkildə Kino mərkəzində böyük ekranda tamaşaçıların ixtiyarına buraxılacaq. Ötən mövsüm hər həftə repertuarımız mütləq şəkildə bir milli film daxil etmişdik, bu il də o ənənəyə sadiq qalacağıq. Onu da nəzərinizə çatdırım ki, ötən mövsümün fevralın sonunda milli filmlərimizi pulsuz nümayiş etdirirdik. Sentyabrın sonlarına yaxın bir daha yerli filmlərimizi pulsuz şəkildə tamaşaçılara təqdim etməyi düşünürük”.

Arzu xanımın sözlərinə görə, isti yay günlərində belə Nizami Kino Mərkəzi qapılarını tamaşaçılarının üzünə bağlamayıb. Yayda həftədə 2-3 dəfə filmlər nümayiş olunub.

Yeni mövsümdə tamaşaçıların istirahət etdikləri məkanların sırasına teatrlar da daxildir. Paytaxtımızdakı teatrlar sentyabrın 15-dən etibarən mövsümü açıq elan edəcək. Teatr mövsümünün açılışı isə simvolik olaraq Şəki şəhərində baş tutacaq. Belə ki, sentyabrın 10-dan Azərbaycan milli peşəkar teatrının 142-ci mövsümünün təntənəli açılış mərasimi Şəki şəhərində baş tutacaq. Sentyabr ayının 11-dən isə Şəki şəhərində I Beynəlxalq Teatr Festivalı öz işinə start verəcək. Festival Mədəniyyət və Turizm Nazirliyi, Azərbaycan Teatr Xadimləri İttifaqı və Şəki Şəhər İcra Hakimiyyətinin birgə təşkilatçılığı ilə keçiriləcək. Azərbaycanda fəaliyyət göstərən aparıcı teatrların iştirakı nəzərdə tutulmuş festivalda Qazaxıstan, Kalmık və bir sıra başqa xarici ölkələrin teatr kollektivlərinin iştirakı da nəzərdə tutulub. Həmçinin tədbir çərçivəsində Azərbaycanın görkəmli komediya aktyoru Lütfəli Abdullayevin büstünün də açılışı gözlənilir.

Xəyalə Rəis

Kaspi. - 2014.- 6-8 sentyabr.- S. 7.