Anlamaq dərdi

Etibar Etibarlı

Köhnə,

sağalmaz dərddir

Anlamaq dərdi”.

Sən çox fakir eləmə.

Bir də, bacın qurban,

ta içmə...

Sona VƏLİYEVA.

Varmı “köhnə dərd”in təzə əlacı,

Axı, anlamadan

yaşamaq olmur?!

Əbədi yoldaşır bizə, ay bacı,

Çarəsiz bir dərddir,

daşımaq olmur!

Daim şər əlində

xeyir qan qusur,

Bahar nələr çəkib sərt rüzigardan?!

Gah Nəsimi olub,

gah Həllac Mənsur—

Soyulub dabandan,

asılıb dardan!

Cəllad kötüyünün vahiməsindən

Qorxub həqiqəti

dananlar olub!

Ölməz Bruno tək əqidəsindən

Dönməyib tonqalda

yananlar olub!

Qələmi süngüdür,

amalı bəlgə…

Dərdi şərab kimi içib şairlər!

Ölməmiş yüz dəfə,

min dəfə bəlkə

Sirat körpüsündən keçib şairlər!

Dərd var--

bir cavabsız sualdır hələ,

Talesiz Hadinin hanı məzarı?

Nargində

Müşfiqə atılan güllə

Boyadı al qana

mavi Xəzəri!

Bu gün ağıl verir

Qərb qoca Şərqə,

İblis qəhqəhəsi qulaq batırır!

Necə anlamayaq?!

Dərdə bax, dərdə--

Meymun layla çalıb, fili yatırır!...

Düşünən başların

qan bahasına

Neçə yol dəyişib donu dünyanın!

Bir ovuc qanan da

çəkilsə qına,

Dönər cəhənnəmə sonu dünyanın!...

Ömür payımızda

əzab var, yaş var,

Şairlər doğulur acılar üçün.

Anlamaq dərdinə

düçür qardaşlar

Qoy ölsün dərd çəkən bacılar üçün!...

Kaspi.-2014.-11-13 yanvar.-S.18.