“Təhsil, milli mühit, milli ruh: istiqamətlər, nəticələr”

Azərbaycan Dövlət Pedaqoji Kollecində bu mövzuda elmi-praktik konfrans keçirilib

“Milli dəyərləri şüurlu surətdə sevən, Vətəninə xidməti həyat qayəsi hesab edən vətəndaşlar yetişdirmək məktəbin, müəllimin ən müqəddəs vəzifəsidir. Bu o deməkdir ki, müəllim öyrətmək istədiyi hər bir mövzu və məsələni dərindən bilməlidir. Təhsildə də hər hansı islahat və təzəlik müəllim hazırlığına yeni tələblərə gəlib çıxır və bunların həyata keçirilməsi ilə bitir. Biz müəllim hazırlığına milli dəyərlərimizin, milli həyat gücümüzün yenidən yaradılması məsələsi kimi baxmalıyıq. Çünki biz təhsildən, onun islahatından nə gözləyiriksə, müəllim onun canlı və yaradıcı daşıyıcısı olmalıdır”. Bu barədə bu gün Azərbaycan Dövlət Pedaqoji Kollecində (ADPK) keçirilən “Təhsil, milli mühit, milli ruh: istiqamətlər, nəticələr” mövzusundakı ümumrespublika elmi-parktik konfransında təhsil müəssisəsinin direktoru, Yeni Azərbaycan Partiyası (YAP) Qadınlar Şurasının sədri, filologiya üzrə elmlər doktoru, professor Nurlana Əliyeva bildirib.

O, məktəblərdə milli mühitin yaradılmasına diqqət çəkərək, bunu hər bir müəllimin, məktəb rəhbərinin, bütün kollektivin vəzifəsi kimi qələmə verib. Qeyd edib ki, bu, müəllimin zahiri görkəmində, şagirdlərin geyimində, keçirilən mədəni-kütləvi tədbirlərin məzmununda, mahiyyətində, məktəbin daxili nizam-intizamında, müəllimin etik davranış qaydalarında, müəllim-tələbə münasibətlərinin həssaslığında, zərifliyində, ayrı-ayrı fənlər üzrə dərslərin müxtəlif metod və üsullarında, fənn kabinetlərinin, bütövlükdə məktəbin tərtibatında öz əksini tapır. Kollec direktoru bildirib ki, öz işinin mahiyyətini dərk edən, bilik və tərbiyənin vəhdətini anlayan, ixtisasını hər zaman təkmilləşdirən, yenilikləri tətbiq edən müəllim əsl vətəndaş olmasa, onun milli ruhda vətəndaş yetişdirməsi də mümkün deyil. N.Əliyevanın sözlərinə görə, müəllim Vətənini, dövlətini, torpağının hər qarışını sevən bir ziyalı olmalıdır.

ADPK direktoru deyib ki, milli ənənələrimiz, mənəvi-əxlaqi keyfiyyətlərimiz xalqımızın həyat gücünü, gələcək arzularını əks edən dəyərlərimizdir: “Biz sürətlə tərəqqi edən bir millət kimi dünya sivilizasiyası dəyərlərinin köklü əhəmiyyətini də bilirik. Milli dəyərlər heç zaman bəşəri dəyərlərə, xüsusilə Qərb sivilizasiyasının nailiyyətlərinə zidd deyildir. Bu nailiyyətlərə arxa çevirsək, tərəqqi edə bilmərik. Ulu öndər Heydər Əliyev də müasir Azərbaycanı azad, demokratik, liberal dəyərlərə bağlı açıq bir cəmiyyət kimi inkişaf etdirməyi bizə vəsiyyət etmişdir. Biz təhsilimizdə islahat aparanda bundan sonra da qabaqcıl ölkələrin təcrübəsindən, elmi, texniki və pedaqoji nailiyyətlərindən istifadə etməliyik”.

Azərbaycan Dövlət Pedaqoji Universitetinin (ADPU) kafedra müdiri, filologiya üzrə elmlər doktoru, professor Zahid Xəlil “Uşaq ədəbiyyatının milli ruhun oyanmasına təsiri” mövzusunda çıxış edib. O, konfrans öz işinə başlamazdan əvvəl müəllimlərlə birlikdə kollecdəki sinif otaqlarını gəzdiklərini, bu təhsil ocağındakı mövcud şəraitlə daha yaxından tanış olduqlarını dilə gətirib. Bildirib ki, müşahidə edilənlər kollecin daim özünü təkmilləşdirdiyini sübut edir: “İnkişaf üçün bu başlıca şərtdir. Milli-mənəvi dəyərləri yaradan, qoruyan anadır. Bu kollec isə həmin anaları, ziyalı Azərbaycan qadınını, gələcəyin ailə başçılarını yetişdirir, onlara təhsil verir. Kolleclə tanışlıq zamanı tələbələrin əl işləri ilə də tanış olduq, yaratdıqları sənət əsərlərini gördük, bişirdikləri düşbərədən daddıq. Bütün bunlar onu deməyə əsas verir ki, bu kollecdə təhsil alan övladlarımız hərtərəfli yetişməkdədirlər. Bu hadisə onu deməyə əsas verir ki, kollecdə Azərbaycan xalqının milli-mənəvi dəyərləri ən yüksək səviyyədə qorunur, gələcək nəsillərə çatdırılır”.

Konfransda Təhsil Problemləri İnstitutunun baş elmi məsləhətçisi, pedaqogika üzrə elmlər doktoru, professor Vidadi Xəlilov “Gənclərdə milli ənənələr, mütaliə, virtual aləm təfəkkürünün formalaşması prosesində məktəbin və ailənin rolu”, Kollecin IV kurs tələbəsi Aygün Paşazadə “Məktəb milli mühitin beşiyidir” mövzularında çıxışlar ediblər.

Çıxışlardan sonra ADPK-nin III və IV kurs tələbələri “Milli dəyərlərimiz nəsillərdən nəsillərə” mövzusunda mülahizələrlə çıxış ediblər. Tələbələr ümummilli lider Heydər Əliyev, Prezident İlham Əliyev və Azərbaycanın birinci xanımı Mehriban Əliyevanın hərtərəfli fəaliyyətini özündə əks etdirən faktları da dilə gətiriblər. Eyni zamanda müstəqil Azərbaycanın inkişafından, Cənubi Qafqaz regionunun lider dövləti olmasından söhbət açıblar. Bundan başqa, kollecin tələbələri pianinonun müşayiəti ilə “Ey qüdrətli Azərbaycan” musiqisini səsləndiriblər.

Konfransa Yasamal Rayon İcra Hakimiyyətinin Başçısı İbrahim Mehdiyev yekun vuraraq, Azərbaycanda həyata keçirilən islahatlardan, ulu öndər Heydər Əliyev siyasi kursunun layiqli davamçısı, Prezident İlham Əliyevin rəhbərliyi altında uğurla davam edən inkişafımızdan söhbət açıb. O, ADPK-nin fəaliyyətinə də toxunaraq bildirib ki, hazırda bu müəssisə öz tələbələrinə bakalavr səviyyəsində təhsil verir. İcra başçısı bunu kollecin və onun rəhbərliyinin uğuru kimi qələmə verib: “Nurlana xanım 25 ildir ki, bu təhsil müəssisəsində çalışır. Ona görə də kollecin bugünkü uğurlarında onun böyük payı var. Mən fəxrlə qeyd etmək istəyirəm ki, Kollec rayonumuzdakı təhsil müəssisələri arasında ən qabaqcıllardan biridir. Burada gələcək ailələrin başçıları, əsl Azərbaycan xanımları yüksək və hərtərəfli təhsil alır, kamil vətəndaş kimi yetişirlər. Heç şübhəsiz onlar da gələcəkdə cəmiyyətimizin, dövlətimizin inkişafına öz töhfələrini verəcəklər. Bütün bunlar ümumilikdə Azərbaycan dövlətinə və xalqına layiqli xidmətdir”.

Bununla da konfrans öz işinə yekun vurub. Onu da əlavə edək ki, konfrans öz işinə başlamazdan əvvəl iştirakçılar kollecin foyesindəki sərgi ilə tanış olublar. Burada kollecin “Təsviri incəsənət müəllimliyi” və “Texnologiya müəllimliyi” ixtisası üzrə təhsil alan tələbələrinin əl işləri nümayiş olunub. Eyni zamanda kollecin foyesində açıq dərs topluları, təhsil müəssisəsinin müəllimlərinin, o cümlədən Nurlana Əliyevanın müəllifi olduğu kitablar da qonaqlara nümayiş olunub. Daha sonra qonaqlar kollecin siniflərini gəzərək açıq dərslərlə tanış olub, tələbə və müəllimlərlə yaxından ünsiyyət qurub, Heydər Əliyev Muzeyi, kitabxana ilə tanış olublar.

Rufik İSMAYILOV

Kaspi.-2015.-19 noyabr.-S.10.