Çalışmaq və öyrənməyə açıq olmaq uğurun açarıdır

İlham Məmmədli: “Kənardan verilən stimul da lazımdır, ancaq əsas olan insanın özünə verdiyi motivasiyadır”

Onun fikrincə, çalışmaq və daim öyrənməyə açıq olmaq hər zaman, hər bir sahədə uğurun açarıdır. İnsanın özünə verdiyi motivasiyanı da vacib sayır. Deyir ki, kənardan verilən stimul da lazımdır, amma əsas olan insanın özünə verdiyi motivasiyadır. Müsahibimiz MADO kafe və restoranlar şəbəkəsinin marketinq üzrə meneceri İlham Məmmədlidir.

- İlham bəy, siz balaca olanda marketinq sözü hələ Azərbaycana gəlib çıxmamışdı. O vaxt kim olmaq istəyirdiniz?

- O vaxt məni daha çox valideynlərim yönləndirməyə çalışır, prokuror, həkim olmağımı istəyirdilər. Mənsə futbolçu olmaq istəyirdim.

- Bəs necə oldu, futbolçu olmaq arzunuzu marketoloqla əvəzlədiniz?

- Ətrafımdakı dostlar bu yönə istiqamətlənməyimə səbəb oldu. Həm də marketinq Azərbaycanda inkişaf edən yeni, lazımlı bir sahə idi. Buna görə mən də marketinq ixtisası üzrə təhsilimi davam etdirməyə qərar verdim.

- İlk işinizi necə xatırlayırsınız?

- Üçüncü kursu bitirdikdən sonra “Delta Group” Şirkətinin Bismak Qida Sənaye Kompleksində brend menecerinin köməkçisi kimi işə başladım, sonra “Totem” reklam agentliyində çalışdım. Amma təcrübə keçmək üçün aşağı kurslarda oxuyanda “Azenco”, “Pepsi” şirkətlərində də çalışmışam.

- Necə oldu MADO-da işə başladınız?

- Əsgərlikdən qayıdandan sonra iş üçün bir neçə yerə CV göndərdim. MADO-dan çağırdılar.

- İşlədiyiniz restoranlar şəbəkəsinə hansı qatqılarınız olub?

- Onu qeyd edim ki, MADO-Azərbaycanın tarixində marketinq vəzifəsində ən uzun müddət çalışan şəxsəm. Əgər burada iki ildən artıq bir müddətdir çalışıramsa, demək, hansısa qatqılarım olub. Qısa desəm, müxtəlif korporativ sosial məsuliyyət layihələri, sponsorluqlar, kampaniyalar, müştəri məmnuniyyətinin artırılmasına yönəlik sorğular və s.

- MADO-nun digər restoranlardan fərqi nədədir?

- Hər bir şirkətin öz hədəf qrupu, müştəri seqmenti var. Düzdür, bütün kafelər rəqibdir, amma hər bir restoranın hədəf kütləsi fərqlidir. Şirniyyatlarımız bizi fərqləndirən tərəfimizdir. MADO-nu əsas sevdirən onun şirniyyatları, künəfəsi, maraş dondurması, paxlavasıdır. Düzdür, MADO-nun da dadlı yeməkləri var, ancaq MADO-nu insanlar daha çox şirniyyat evi kimi tanıyır.

- İlham bəy, yaxşı marketoloq olmağın yolları nədən keçir?

- Yaxşı marketoloq olmaq üçün öncə yaxşı təhsil almalısan. Vacib deyil ki, universitet təhsili olsun, özünüzü kitablarla, seminarlarla, təlimlərlə, gündəlik trendləri izləməklə inkişaf etdirə bilərsiniz. Daima təhsil almaq, öyrənmək lazımdır. Yaxşı marketoloqun özünü göstərməsi üçün sağlam rəqabət bazarının olması da vacibdir. Müasir texnologiyalardan istifadə, gündəlik trendləri tutmaq, gələcəyi 2-3 il öncədən görmək qabiliyyətin də olmalıdır.

- Azərbaycanda, deyəsən, şirkət rəhbərlərinin əksəriyyəti marketinq şöbəsinə o qədər də önəm vermir...

- Elədir, Azərbaycan şirkətlərində işlər yaxşı gedəndə marketinqə o qədər də fikir verilmir, işlər düyünə düşən kimi marketoloqlar axtarılır. Düşünürəm ki, hər zaman marketinqə önəm verilməlidir. Hətta qlobal, milyardlarla gəliri olan şirkətlərin belə marketinqə ehtiyacı var, bu sahəyə kifayət qədər pul ayırırlar. İnanıram ki, bizdə də yavaş-yavaş marketinq sahəsi öz yerini tutacaq.

- Marketinq şöbəsinin işlərinin yaxşı getməsi müştərilərlə birbaşa ünsiyyətdə olan işçilərdən – satıcılar, ofisiantlar, satış menecerlərindən –asılıdır. MADO-da qarsonlar necə motivasiya edilir?

- Marketinq şöbəsi şirkətdə olan digər bütün şöbələrlə sıx əlaqədədir. Hansısa şöbənin işi yaxşı getmirsə, birbaşa marketinqə təsir edir. Buna görə marketinqin şirkətdə bütün şöbələrlə əlaqəsi yaxşı olmalıdır.

Qarsonları işə İnsan resursları üzrə menecerimiz götürür. Təlim menecerimiz isə onlara təlim keçir. Əgər bizim qarson peşəkar təlim keçməsə, insan resursları üzrə menecerimiz peşəkar qarsonları işə götürməsə, müştəriyə pis xidmət göstəriləcək və müştəri narazı gedəcək. Bu isə birbaşa marketinqin işinə təsir göstərəcək. Buna görə də biz digər şöbələrlə əlaqəli işləməyə çalışırıq.

Qarsonlar üçün müxtəlif motivasiya proqramları hazırlanır. Onların qarşısında müxtəlif satış hədəfləri qoyulur. O hədəfləri keçdikdən sonra bonuslar, hədiyyələr verilir, ayda bir neçə dəfə kollektiv şəkildə əyləncə mərkəzlərinə göndərilirlər. Çünki müştərilərlə birbaşa təmasda olan onlardır. İşimiz onlardan keçir. Əgər mətbəxdə yemək gec hazırlanırsa, müştəri heç vaxt arxa bölümdə nələr baş verdiyini düşünmür, sifarişi gec gətirdiyinə görə qarsonu günahlandırır, söz birbaşa mətbəxdə işləyənlərə deyil, qarsonlara deyilir. Buna görə hər zaman onlara təlim keçir, gülərüz olmalarının vacibliyini izah edirik. Müştəri bura istirahət etmək üçün gəlir. Çalışırıq ki, dincəlmək üçün gələn insanların rahat istirahətlərini təmin edək.

- Özünüz üçün müəyyən etdiyiniz hansısa bir hədəf varmı?

- Qeyd etdiyim kimi, əvvəllər un məmulatları istehsal edən Bismak Qida Sənaye Kompleksində işləmişəm. Buna görə də özümü daha çox yeyinti sənayesi, kafe-restoran şəbəkəsində görürəm. Hədəfim gələcəkdə özümə aid hər hansı bir restoran, ya kafe açmaqdır. Ola da bilər ki, tamam başqa bir sahəyə keçim. Ancaq hələ ki, özümü daha çox bu sahədə görürəm.

- Sizcə, insan özü-özünə motivasiya verməlidir, yoxsa ona motivasiya verən ətrafı olmalıdır? Hansı daha vacibdir?

- Sağlam rəqabət bazarında hansısa rəqib uğurlu bir iş həyata keçirəndə səndə stimul yaranır ki, ondan daha yaxşısını gerçəkləşdirə bilərsən. Bu, insan üçün ən böyük motivasiyadır. Kənardan verilən stimul da lazımdır. Ancaq əsas olan insanın özü-özünə verdiyi motivasiyadır.

- Uğurunuzun sirri nədədir?

- Nə dərəcədə uğurlu olmağıma müştərilər və rəhbərlik qərar verə bilər. Əgər müştərilərimiz MADO-nun fəaliyyətini uğurlu hesab edirsə, bizdən razı qalırsa, deməli, bu uğurda az da olsa payım var. Çalışmaq və daim öyrənməyə açıq olmaq hər zaman, hər bir sahədə uğurun açarıdır.

Lalə MUSAQIZI

Kaspi.-2016.-5 fevral.-S.15.