Formula-1-dəki səfirimiz

Gənc həmyerlimiz Gülhüseyn Abdullayev arzularına doğru pillə-pillə irəliləyir

Bu il ölkəmizdə Formula-1 yarışları keçiriləcək. Azərbaycanda bu idman növünün azarkeşləri digər idman növləriylə müqayisədə az olsa da, maraq kifayət qədərdir. Bir neçə il öncə televiziya vasitəsilə San-Marino, Qətər, İstanbul və s. kimi qran-priləri izləyən Formula-1 həvəskarları çətin ki, bu yarışın ölkəmizdə, daha dəqiqi paytaxt Bakıda təşkil ediləcəyini ağıllarına gətirərdilər. Ancaq cəmi ay yarım sonra Bakının küçələrində "Ferrari", "Reno", "Mersedes" kimi Formula-1 komandalarının bolidləri şütüyəcək. Hələ mən dünyaca məşhur Fernando Alonso, Lyuis Hamilton və s. pilotları demirəm. Bir vaxtlar digər ölkələrdəki analoji yarışlara baxanda bu yarışın ölkəmizdə keçiriləcəyini ağlımıza gətirmədiyimiz kimi, milyonlarla dollar qiyməti olan bolidlərin sükanı arxasında azərbaycanlı pilotun da oturacağını inana bilmirdik. Ancaq deyəsən, Formula-1 xəyalı gerçəkləşdiyi kimi, yaxın illərdə azərbaycanlı avtoidman həvəskarlarının bu arzusu da reallaşacaq. Gənc həmyerlimiz Gülhüseyn Abdullayevin son illər avtoidman yarışlarında uğurlu çıxışı yerli Formula-1 həvəskarlarına gələcəyə inamla baxmağa imkan verir.

Gülhüseyn Abdullayev 1997-ci il, aprelin 2-də Bakıda dünyaya göz açıb. Onun atası Formula-1 həvəskarı olduğundan Gülhüseyn ağlı kəsəndən televiziya ekranlarında bolidləri görürdü. Çox çəkmir ki, Gülhüseyn də atası kimi bu idman növünün həvəskarına çevrilir. Onun sevimli pilotu isə heç şübhəsiz, Formula-1-də qələbələri sıralayan Mixael Şumaxer idi.

Gülhüseynin cəmi 8 yaşı olanda atası onun əlindən tutaraq, paytaxtdakı kartinq mərkəzlərindən birinə aparır. Özünün dediyinə görə, elə o vaxtdan sükandan ikiəlli yapışıb. Gülhüseynin atası oğlunun kartinqə olan həvəsini görüb, onu Bakıdakı kartinq mərkəzlərinə aparmaqda davam edir. Bir müddət sonra isə oğlunun avtoidmana həvəsi ilə yanaşı, həm də istedadının olduğunu kəşf edir. Məhz bundan sonra ata oğlunun bu sahədə peşəkar idmançı kimi yetişməsi üçün yollar axtarır. Bu yolu isə Azərbaycanda yox, Türkiyədə tapır.

Gülhüseyn mətbuata açıqlamasında atasının onun yetişməsində əməyini bu sözlərlə dəyərləndirir: "Atam olmasaydı, ümumiyyətlə mənim karyeram olmazdı".

2006-cı ildə Gülhüseyn Türkiyə çempionatında iştirak etmək üçün seçimlərə qatılır. 163 pilotun qatıldığı seçimlərdə Abdullayev ilk "25"-liyə düşərək, Türkiyə çempionatında çıxış etmək haqqı qazanır. Gülhüseyn, həmçinin seçim turunun ən yaxşı 5 pilotundan biri olur.

O, Türkiyə kartinq çempionatındakı ilk mövsümünü 4-cü pillədə başa vurur. Qardaş ölkənin çempionatında həmişə ən yüksək pillələrdə olan Gülhüseyn burda ən yaxşı nəticəsini 2013-cü ildə qazanır. O, Türkiyə kartinq çempionatının junior kateqoriyasında mövsümü ikinci kimi başa vurur. Abdullayev elə həmin ildə Türkiyədə "Rotax Max Challenge"in qalibi olur. O, bundan sonra ABŞ-da təşkil edilən dünya finalında iştirak etmək haqqı qazanır. Gülhüseyn həmin yarışda finala çıxa bilməsə də, ilkə imza atır. Belə ki, o, Türkiyə və Azərbaycanı bu yarışda təmsil edən ilk pilot olur.

Növbəti ildə Gülhüseyn yenə Türkiyə kartinq çempionatının junior kateqoriyasında ikinci olur. Elə həmin ildə o, Türkiyə çempionatının senior kateqoriyasında da gücünü sınayır və yarışı bu dəfə də ikinci pillədə başa vurur. 2014-cü ildə Abdullayev daha bir yarışda - Bolqarıstan kartinq çempionatında çıxış edir və mövsümü üçüncü pillədə başa vurur.

2015-ci ildə Gülhüseyn Bolqarıstanın "V1Challange" çempionatında çıxış edir. O, müəyyən səbəblərdən ilk iki yarışı buraxmalı olur. Üçüncü və dördüncü yarışları isə birinci pillədə başa vurur. "V1Challange"dəki beşinci yarışı isə uğursuzluqla nəticələnir. Belə ki, Gülhüseyn qəza törədərək, yarışı yarımçıq dayandırır. Altıncı yarışda isə o, ikinci olur. Üç yarışı boşa verməsinə baxmayaraq, Abdullayev mövsümü ikinci pillədə başa vurur.

Bu il isə Gülhüseyn Formula Gulf 1000 seriyasında iştirak etməyə başladı. O, ilk altı yarışı buraxdıqdan sonra yeddinci - BƏƏ-də keçirilən yarışda iştirak etdi. Gülhüseyn bu seriyada keçirdiyi ilk (sayca yeddinci) yarışı üçüncü kimi başa vurur. Daha sonra keçirdiyi dörd yarışın ikisində ikinci, ikisində isə birinci olur. Bu seriyada keçirdiyi sonuncu -13-cü yarışda isə o, qəzaya uğrayır.

Əslində, Gülhüseynin Formula Gulf 1000-də iştirak etməsinə səbəb Formula-3-ə hazırlıq idi. Bəli, Abdullayev artıq Formula-1-ə doğru ilk addımını atıb. O, bu il ilk dəfə Formula-3 yarışı seriyalarından Euroformula Opendə iştirak edib. Formula Gulf 1000-dəki çıxışının səbəbi də məhz Formula-3-ə yaxşı hazırlaşmaq idi. Formula-3 gələcəkdə Formula-1-də iştirak edəcək pilotlar üçün əsas məktəblərdən biri sayılır.

Gülhüseyn Euroformula Opendə İspaniyanın "Kampos Rasinq" komandasında çıxış edir. İspanlar onu testlərə dəvət edirlər. Testlərdən sonra isə "Kampos Rasinq" komandasının rəhbərliyi Gülhüseyndən razı qalır və onunla 1 illik müqavilə bağlayırlar.

Təmsilçimizin çıxış etdiyi "Kampos Rasinq" komandası 1997-ci ildə İspaniyanın Valensiya şəhərində yaradılıb. Bu il Formula-1-də debüt edən indoneziyalı Rio Haryanto məhz "Kampos Rasinq"in yetirməsidir. Komanda keçən mövsümü 2-ci yerdə başa vurub. "Kampos Rasinq"in sürücüsü Konstantin Tereşenko da 2-ci olub.

Artıq Abdullayev "Kampos Rasinq"in sükanı arxasında ilk yarışını da keçirib. Təmsilçimiz Portuqaliyanın Eştoril şəhərindəki Euroformula Open yarışında "Kampos Rasinq"də ilk yarışına çıxıb. Ancaq təəssüf ki, təmsilçimiz ilk çıxışında 22 pilotun iştirak etdiyi yarışı 21-ci pillədə başa vuraraq xal qazana bilməyib. Gülhüseyn bu seriyada növbəti yarışını 21-22 mayda Belçikada, Spa-Frankorşam trasında keçirəcək.

Gülhüseyn bu il Bakıda baş tutacaq Formula-1 üzrə Avropa qran-prisində də iştirak edəcək. Yox, təmsilçimiz hələ ki, hansısa komandanın bolidinin sükanı arxasında ölkəmizi təmsil etməyəcək. O, Azərbaycanda keçiriləcək ilk Formula-1 yarışında ölkəmizin səfiri olacaq.

Gülhüseyn yarışdan yarışa qaçmasına, gərgin rejimdə çalışmasına baxmayaraq, təhsilinə də vaxt ayrır. Belə ki, Abdullayev pilot olmaqla yanaşı, həm də tələbədir. O, İstanbul Medipol Universitetinin stomatologiya fakültəsinin ikinci kursunda oxuyur. Özünün dediyinə görə, təhsillə yarışlara eyni anda diqqət ayırmaq çətin olsa da, ikisində də müvəffəqiyyət əldə etməyə səy göstərir. "Gələcəkdə özünü bacarıqlı həkim, yoxsa məşhur pilot kimi görmək istərdin" sualına Gülhüseynin cavabı çox qısa oldu - Pilot.

Abdullayevin əsas hobbisi isə ölkələri gəzmək, film izləmək və ailəsi ilə vaxt keçirməkdi.

Qarşıdan Avropa qran-prisi gəlir. Paytaxtımızda təşkil ediləcək bu yarışda hələ ki, təmsilçimiz yoxdur. Ancaq bu o demək deyil ki, gələcəkdə də olmayacaq. Bəlkə də yaxın gələcəkdə Alonso, Hamilton kimi pilotlarla bir trasda azərbaycanlı pilotu da görəcəyik. Bəlkə də bir neçə il sonra bu yarışa həvəskar kimi yox, azarkeş kimi baxacağıq. Bu yöndə azərbaycanlı avtoidman həvəskarlarının əsas ümidi olan Gülhüseynin də məqsədi məhz budur. O, həyatda əsas məqsədi barədə danışarkən bunları deyib: "Həyatda əsas məqsədim Azərbaycanı dünyaya tanıdıb, tarix yazmaqdır".

Gülhüseynə bu məqsədinə çatmasını arzulayır və yarışlarda uğurlar arzulayırıq. Sükanı möhkəm saxla!

Kaspi.-2016.-6 may.-S.15.