Heydər Əliyev fenomeni

Ümummilli lider hər bir azərbaycanlı üçün mənəvi xəzinə idi

Azərbaycan xalqının ümummilli lideri Heydər Əliyevin vəfatından 14 il keçir. Bununla əlaqədar olaraq Azərbaycanın bütün bölgələrində, o cümlədən paytaxt Bakıda Heydər Əliyevi anım mərasimləri təşkil olunub. Dövlət qurumları, siyasi partiyalar, QHT, media orqanları və ictimaiyyətin nümayəndələri Heydər Əliyevin Fəxri xiyabandakı məzarını ziyarət ediblər. Azərbaycanın xarici ölkələrdəki diplomatik nümayəndəlikləri və diaspor təşkilatları da anım mərasimləri keçiriblər.

Millət vəkili, Yeni Azərbaycan Partiyası (YAP) İcra Katibliyinin Siyasi təhlil və proqnozlaşdırma şöbəsinin müdiri Aydın Mirzəzadəulu öndərlə bağlı qeyd edib ki, o, 1993-cü ildə yenidən hakimiyyətə gəlişi ilə Azərbaycan tarixində yeni bir səhifə açıb, ölkəmizdə yeni, demokratik bir dövlət quruculuğuna başlanılıb. Deputat bildirib ki, ümummilli liderin qayıdışından sonra Azərbaycanda bazar münasibətlərinin hökmran olduğu yeni iqtisadiyyat formalaşıb, insan hüquq və azadlıqları cəmiyyətin aparıcı mövzusu olub, Azərbaycan sürətlə beynəlxalq birliyə inteqrasiya olmağa başlayıb. A.Mirzəzadə qeyd edib ki, ulu öndər Heydər Əliyevin müstəqil Azərbaycanda hakimiyyətdə olduğu 10 il güclü, müstəqil Azərbaycan dövlətçiliyinin əsasının qoyulduğu bir dövr olub: "Məhz həmin bünövrənin nəticəsidir ki, 2003-cü ildə hakimiyyətə gələn cənab Prezident İlham Əliyev Heydər Əliyevin siyasi kursunu davam etdirməklə Azərbaycanın qüdrətini daha da artırdı. Azərbaycan bu gün dünyanın nüfuzlu ölkələrindən biridir, Azərbaycan iqtisadiyyatını modernləşdirən, vətəndaşlarının sosial problemlərinin həllini daim diqqətdə saxlayan bir ölkədir. Heydər Əliyev fenomeni bu gün hər bir azərbaycanlı üçün mənəvi bir xəzinədir. Ulu öndərin fəaliyyəti regionda sabitlik yaratmaqla yanaşı, dünyaya gənc bir dövlətin öz gücünə arxalanaraq, qüdrətli bir dövlət qurmaq təcrübəsini verib. Heç də təsadüfi deyil ki, bu gün dünyanın müxtəlif regionlarında Heydər Əliyevin təcrübəsinə, onun siyasi fəlsəfəsinə çox böyük diqqətlə yanaşırlar, onu öyrənməyə çalışırlar. Heydər Əliyev hələ ötən əsrdə sovet Azərbaycanına rəhbərlik edərkən geridə qalmış bir regionu SSRİ-nin inkişaf etmiş bir respublikasına çevirə bilib. 1969-1982-ci illərdə Azərbaycanda 250 yeni müəssisə tikilib, 13 minə qədər azərbaycanlı gənc SSRİ-nin aparıcı ali məktəblərində təhsil alıb, 5 yeni universitet açılıb, mənzil fondu iki dəfə artıb, Azərbaycan mədəniyyəti və incəsənəti SSRİ və dünya səviyyəsində tanınmağa başlanıb, sosial problemlərin həlli, insan faktoru Heydər Əliyevin diqqətində olub”.

Vitse-spiker, Milli Məclisin İnsan hüquqları komitəsinin sədri Bahar Muradova qeyd edib ki, Azərbaycanda qısa zaman kəsiyində iqtisadi, mədəni, sosial və hərbi-siyasi sahələrdə qazanılan uğurlar ilk növbədə ümummilli lider Heydər Əliyevin adı ilə bağlıdır. Deputatın sözlərinə görə, əldə olunan iqtisadi uğurların əsası hələ ulu öndər Heydər Əliyevin Sovet İttifaqı zamanında Azərbaycana rəhbərliyi dövründə qoyulub: "Həmin dövrdə keçmiş ittifaq ərazisində aqrar ölkə kimi tanınan Azərbaycanın sənaye mərkəzinə çevrilməsi, qısa zaman kəsiyində ölkəmizdə mühüm sənaye komplekslərinin fəaliyyətə başlaması, respublikamızda həyata keçirilən əhəmiyyətli iqtisadi-siyasi layihələr bunu deməyə əsas verir. Ulu öndər Heydər Əliyevin 1993-cü ildə xalqın təkidli tələbi ilə hakimiyyətə qayıdışından sonra Azərbaycanın həyatında yeni eranın təməli qoyuldu. Heydər Əliyevin ideyaları bugünkü güclü, zəngin, inkişaf edən Azərbaycanın, eləcə də ölkəmizin dünyada layiqli yer tutmasının əsasını qoydu. Ümummilli lider Heydər Əliyevin ideyaları Azərbaycanın müstəqil dövlətçilik ənənələrinin etibarlı və möhkəm dayaqlar üzərində qoyulması deməkdir. Azərbaycanın qazandığı nailiyyətlər, müstəqilliyimizin qorunub saxlanılması, dövlətçiliyimizin inkişafı ulu öndər Heydər Əliyevin ideyaları əsasında hazırlanan, ölkəmizin milli maraqlarına söykənən dövlət quruculuğu kursuna əsaslanır”.

B.Muradova deyib ki, ölkəmizdə müşahidə olunan iqtisadi inkişaf Azərbaycanda həyata keçirilən uğurlu daxili iqtisadi-sosial siyasətin bəhrəsidir: "Heydər Əliyevin yaratdığı iqtisadi model bu gün uğurla həyata keçirilməkdədir. İnkar etmək mümkün deyil ki, Azərbaycan xalqının rifahının yüksəldilməsinə, daxili sabitliyin qorunmasına və cəmiyyətin bütün sahələrində enerji, nəqliyyat, turizm, təhsil, səhiyyə və digər sahələrdə önəmli layihələrin həyata keçirilməsinə istiqamətlənmiş siyasət Heydər Əliyev ideyalarının tərkib hissəsidir. Cənubi Qafqaz regionunun lider dövləti olan, ildən-ilə Avropanın enerji təhlükəsizliyi məsələsində əhəmiyyətli tərəfdaşa çevrilən və dünya miqyasında nüfuzu artan Azərbaycanın inkişaf səviyyəsi istər dünya ölkələri, istərsə də beynəlxalq təşkilatlar tərəfindən xüsusi olaraq vurğulanır. Dayanıqlı iqtisadi siyasət, habelə müstəqil və tarazlı şəkildə həyata keçirilən xarici siyasət kursu Azərbaycan dövlətinin istər daxili sabitliyinin, inkişafının təminatında, istərsə də beynəlxalq dayaqlarının möhkəmləndirilməsində mühüm əhəmiyyət kəsb edir. Ulu öndər Heydər Əliyev tərəfindən əsası qoyulan bu xarici siyasət kursu hazırda Prezident İlham Əliyev tərəfindən daha da modernləşdirilir, müasir beynəlxalq münasibətlər sisteminə uyğunlaşdırılır və inkişaf etdirilir”.

Milli Məclisin Beynəlxalq münasibətlər və parlamentlərarası əlaqələr komitəsinin sədri Səməd Seyidov bildirib ki, Azərbaycanın getdiyi yol məhz ümummilli lider Heydər Əliyevin göstərdiyi və bizə miras qoyduğu böyük bir fəlsəfədir. Millət vəkili qeyd edib ki, artıq ulu öndər Heydər Əliyevin fəlsəfəsi, yaratdığı dövlət təkcə regionda deyil, dünyada öz həqiqətini sübut etmiş müasir bir cərəyandır: "Bu nöqteyi-nəzərdən Heydər Əliyevin yaratdığı və bizə miras qoyduğu fəlsəfənin bu gün yalnız Azərbaycanda deyil, bütün dünyada öyrənilməsinə başlanılıb. Bu da təsadüf deyil. Çünki hazırda bir çox yerlərdə müharibələr gedir, vəziyyət çətindir, bir çox ölkələr böhran içərisindədir və sair. Ancaq Azərbaycan tamamilə başqa bir istiqamət götürərək inkişaf edir. Düzdür, çətinliklər var, heç kim çətinlikləri inkar etmir, Azərbaycan ayrı planetdə olan dövlət deyil. Lakin hər bir halda, müqayisə edərkən şahidi oluruq ki, Heydər Əliyevin yaratdığı, bizə miras qoyduğu, tövsiyə etdiyi, vəsiyyət etdiyi məsələlər öz tarixi həqiqətini tapıb. Hesab edirəm ki, 1990-cı illərin əvvəlindəki çətin dövr, Azərbaycanın müstəqillik əldə etdiyi ilk illər bu gün başqa ölkələrdə, başqa coğrafiyalarda ciddi təhlil olunmalıdır. Ona görə ki, konfliktin içərisindən çıxmaq, vətəndaş müharibəsinin qarşısını almaq, iqtisadiyyatı yüksəltmək – bütün bunlar konkret olaraq dərslərdir. Bir daha qeyd edirəm ki, Azərbaycanın getdiyi yol məhz Heydər Əliyevin bu istiqamətdə göstərdiyi və bizə miras qoyub getdiyi böyük bir fəlsəfədir. Bu baxımdan, Azərbaycanın həqiqəti, Azərbaycanın inkişafı, Prezident İlham Əliyevin apardığı siyasət məhz Heydər Əliyevin siyasətinə bir dəstəkdir, cavabdır, onun davamıdır”.

Milli Məclisin Gənclər və idman komitəsinin sədri Fuad Muradovda bildirib ki, ümummilli lider Heydər Əliyevin Azərbaycanda hakimiyyətə qayıdışından sonra ölkəmizdə bütün sahələr həm inkişaf etməyə başlayıb, həm də uzunmüddətli perspektiv açılıb. Deputatın sözlərinə görə, xüsusilə gənclər hər zaman ulu öndərin diqqət mərkəzində olub: "Ulu öndərin elə ilk fərmanlarından birinin Gənclər və İdman Nazirliyinin yaradılması ilə bağlı olması, ardınca Azərbaycan gənclərinin ilk forumunun keçirilməsi buna bariz nümunədir. O, özü həmin forumda iştirak edib gənclərimizin fikirlərini öyrənərək, Azərbaycan gənclərinin gələcək inkişafının təməlini qoyaraq həmin forumların silsilə şəklində keçirilməsinə nail olub. Əslində, elə o zaman dövlət siyasətinin əsas tərkib hissəsi kimi Azərbaycanda gənclər siyasəti formalaşmağa başlayıb. Həmin siyasət bu gün də davam etdirilir. Ulu öndərin böyüklüyü o idi ki, gənclərə hər zaman etimad göstərirdi. O, hər zaman gəncləri irəli çəkərək, onlara etimad göstərərək, müxtəlif ictimai işləri həvalə edərək bir nümunə yaradırdı. Bu gün bu siyasət Prezident İlham Əliyev tərəfindən uğurla davam etdirilir. Azərbaycanda gənclərin öz imkanlarını göstərməsinə həmişə şərait yaradılıb. Bu gün Azərbaycan gənci üçün bütün lazımi imkanlar var. Prezident İlham Əliyev mütəmadi olaraq gənclərlə bağlı müxtəlif sərəncamlar imzalayır. İstər Gənclər Fondunun yaradılması, istərsə də gənclər üçün qəbul edilən proqramlar onların inkişafına hesablanıb. Bütün bunlar məhz ümummilli liderin siyasi kursunun davamıdır. Eyni zamanda, Azərbaycanın Birinci vitse-prezidenti və Heydər Əliyev Fondunun prezidenti Mehriban Əliyevanın fəaliyyətini qeyd etmək lazımdır. Ulu öndərimizin mənəvi irsi olan bu Fondun fəaliyyəti bütün sahələrdə özünü göstərir. Gənclər sahəsində, xüsusilə Azərbaycan mədəniyyətinin təbliği istiqamətində aparılan işlər ümummilli liderin qoyduğu təməl prinsiplərini özündə əks etdirir”.

Milli Məclisin Elm və təhsil komitəsinin üzvü Bəxtiyar Əliyevqeyd edib ki, ümummilli lider Heydər Əliyevin işləyib hazırladığı siyasət bugünkü müstəqil Azərbaycan dövlətinin qərarlaşmasını, onun inkişafını, Azərbaycan xalqının çox işıqlı və inamlı gələcəyini təmin edən siyasətdir. Millət vəkili bildirib ki, ulu öndər Heydər Əliyevin müstəqil Azərbaycan dövlətinin yaradılması, möhkəmlənməsi, inkişafı, qüdrətli ölkəyə çevrilməsi uğrunda göstərdiyi xidmətləri, fədakarlığı, mübarizliyi sözlə ifadə etmək olduqca çətindir: "Heydər Əliyev Azərbaycan xalqı, ölkəmizin müstəqilliyə qovuşması uğrunda canını, sağlamlığını belə əsirgəməyib. Sadəcə bir faktı xatırlatmaq yetər. Azərbaycan xalqının qan yaddaşına daxil olan 20 Yanvar faciəsi zamanı xalqının səsinə hər kəsdən əvvəl səs verən məhz Heydər Əliyev oldu. Məhz ulu öndər Heydər Əliyev xalqın tələbi ilə Azərbaycanda hakimiyyətə qayıtdıqdan sonra ölkə bütün sahələrdə inkişaf yoluna qədəm qoydu. Heydər Əliyev hakimiyyətə gəldiyi ilk günlərdən ölkədə ictimai-siyasi sabitliyin bərqərar olması, müstəqilliyin və dövlətçiliyin möhkəmlənməsi istiqamətində əməli addımlar atmağa başladı. Qısa müddət ərzində qanunsuz silahlı dəstələr və separatçı qüvvələr zərərsizləşdirildi, dövlət çevrilişi cəhdlərinin qarşısı alındı, müharibədə uzunmüddətli atəşkəsə nail olunmaqla erməni təcavüzü dayandırıldı. Azərbaycanın bugünki müstəqilliyi və qüdrəti məhz ulu öndər Heydər Əliyevin siyasəti sayəsində mümkün olub. Azərbaycan bu gün böyük dövlətlər arasında özünə yer tutmuş, qüdrətli, güclü bir dövlətə çevrilib və bu gün hər bir azərbaycanlı həqiqətən də Azərbaycan Respublikasının vətəndaşı olmağı ilə fəxr edir və öz dövləti ilə qürur duyur. Bu qürurun da əsasını qoyan ulu öndər Heydər Əliyevdir. Bu gün də ulu öndərin bu siyasəti Prezident İlham Əliyev tərəfindən uğurla davam etdirilir, Azərbaycan sürətlə inkiaf edir. Heydər Əliyev ideyaları bu gün də yaşayır, Azərbaycan dövlətinin inkişafına və qüdrətlənməsinə xidmət edir”.

Xatırladaq ki, Azərbaycanın otuz ildən artıq bir dövrünü əhatə edən tarixi taleyi ümummilli lider Heydər Əliyevin adı ilə qırılmaz tellərlə bağlıdır. Bu illər ərzində xalqın ictimai-siyasi, iqtisadi və mədəni həyatının bütün sahələrində dirçəliş məhz onun adı ilə əlaqədardır. Heydər Əliyev rəhbərlik etdiyi bu dövr ərzində daim tərəqqisi üçün çalışdığı, zəngin mədəniyyəti, böyük tarixi keçmişi ilə həmişə qürur duyduğu və gələcək nəsillərinin taleyi üçün düşündüyü doğma yurdu Azərbaycanı bir dövlət kimi zamanın ağır və sərt sınaqlarından çıxarıb. O, böyük siyasi və dövlət xadimi, xalqın şəksiz lideri olaraq hələ sağlığında canlı əfsanəyə çevrilib, buna görə də Heydər Əliyev fenomeni həmişə diqqətləri cəlb edib, dünya azərbaycanlılarının bu ümummilli liderinin heyranlıq doğuracaq dərəcədə coşqun siyasi fəaliyyəti istər ölkə, istərsə də dünya mətbuatında geniş işıqlandırılıb.

Siyasət şöbəsi

Kaspi.-2017.-13 dekabr.-S.8.