Gənc şairin ilk kitabı - Maarif Soltan

artkaspi.az "Gənc şairin ilk kitabı” adlı layihəyə start verib. Bu layihə çərçivəsində şeirləri xalqın, oxucuların könlünə yol tapan, istedadları çoxluq tərəfindən etiraf olunmuş sevimli şairlərin ilk kitabları haqqında kiçik təqdimatla həmin nəşrdən bəzi şeirləri dərc olunur. Bu dəfə Maarif Sultanın ilk kitabından şeirlər və şəkillər oxucuların ixtiyarına verilir:

Maarif Soltan 1956-cı il aprelin 10-da İsmayıllı rayonunun Brovdal kəndində müəllim ailəsində doğulmuşdur. Şairin ilk kitabı " Dünya işıqla dolu” 1986-cı ildə çap olunub. 5000 min tirajla nəşr olunan kitabın redaktoru Adil Cəmil, rəssamı V.Sadıxcan, bədii redaktoru P.Əhmədov, texniki redaktoru V.Plitkina, korrektorları F.Rəsulova, Ş.Həsənova, qiyməti 25 qəpik olmuşdur.

Kəndimizin kədəri

Bir kənd var – kədəri böyükdür, böyük,

Davaya əsgərlər verib bir bölük.

Cəbhəyə yollanmış oğullar təki,

qəhrindən boğaza yığılıb o kənd.

O qədər qoynuna dağ çəkilib ki,

Dağları qoynuna sığdıra bilmir,

dağların qoynuna sığınıb o kənd.

O kəndə hər səhər leysanlar yağır,

O odu, yanğını söndürə bilmir.

Hər payız yel əsir, şimşəklər çaxır –

O kəndin öz doğma oğullarını

Tufan da o kəndə döndərə bilmir.

O kənddə ana var – oğulsuz ana,

Bacı var – qardaşsız ağarıb saçı

Qarı var – barmaqda nişan üzüyü,

Adı da çağrılır hələ qızbacı.

Bir kənd var – kədəri böyükdür, böyük,

Davaya igidlər verib bir bölük...

Atamın dediklərindən

Bütün arıların

Allahı bir, dini bir,

Peşəsi bir, dini bir,

Arı haram götürməz,

Arı təmizlik sevir,

Arı ol, bala, arı kimi işlək,

Arı kimi əlbir.

Bal damsın dilindən,

Yaxşılıqdan başqa bir iş gəlməsin əlindən.

Ürəyin – bal dolu bir pətək.

Lazım olanda sancmağı da bacar

arı kimi...

Bir təpə üstündə düşündüklərim

Günü – gündən bayraq-bayraq ucalan Vətən,

Torpağından qalxmışam peyvənd pöhrələr kimi

Min sevda var başımda:

Gözündəki ulduzlara

Yarpaq-yarpaq

Boy atmaq istəyirəm,

Kəmənd atmaq istəyirəm

Daha gözəl günlərə.

Adlamaq istəyirəm

Bir addımda Arazı

Necə özündən razı

Meydan oxuyur hələ,

Qatlamaq istəyirəm dilim altda onları,

Mənə meydan ver barı,

ərisin nəfəsimdən Şimalın buzlaqları.

Ulu dağların dirəyim

Göyün köməyim olsun

Günü-gündən bayraq-bayraq ucalan Vətən,

Torpağından qalxmışam peyvənd pöhrələr kimi

Min sevda var başımda –

Halbuki bu yaşımda...

Ötür...

Dəqiqələr ötür, saatlar ötür,

Fəsillər, illər ötür.

Başımın üstündən buludlar ötür,

İnsanlar ötürlər böyür-başımdan,

Təyyarələr ötür, maşınlar ötür.

Ötür, nəsillər ötür...

Pəncərəm önündə bir bülbül ötür.

Qardaş, dur ayağa məni də ötür –

Qaş ötür, qardaş, daş ötür.

Hazırladı: Aysu Kərimova

Kaspi 2017.- 16-18 dekabr.- S.17.