Kaspi Liseyi beynəlxalq olimpiadaya ev sahibliyi edir

İlk dəfə Azərbaycanın da qoşulduğu The World Scholar’s Cup-da şagirdlərimiz öz bacarıqlarını nümayiş etdirəcəklər

Dünyanın bir çox ölkələrində olimpiada yarışları keçirilir. Bunların içərisində elmə, biliyə söykənən interaktiv yarışmaların özünəməxsus yeri olur. Şagirdlər arasında keçirilən bu tip yarışlar onların zəka gücünün artmasına, intellektual biliklərinin genişlənməsinə böyük təsir göstərir, dünya arenasına çıxmalarına kömək edir. Həmin yarışlardan biri də 2007-ci ildən bəri keçirilən The World Scholar’s Cup (Dünya Alimlər Kuboku) olimpiadasıdır. Şagirdlər arasında keçirilən bu bilik yarışması konsept olaraq 4 kateqoriyadan ibarətdir. İlk olaraq uşaqlar esse yazır, sonra onlar arasında debat keçirilir, üçüncüsü test, dördüncüsü isə interaktiv bilik yarışması olur. Hər il bu yarışmaya dünyanın bir çox ölkələri qoşulur. Bu il həmin ölkələr arasına Azərbaycan da öz adını yazdırıb. Azərbaycanda həmin yarışın keçirilməsinə Kaspi Təhsil Şirkəti ev sahibliyi edir. Şirkət təşkilatçı olmaqla yanaşı, həm də yarışda iştirakçı kimi çıxış edir. İki gün - 24 və 25 yanvarda baş tutacaq yarış haqqında daha geniş məlumat əldə etmək üçün təhsil şirkətinin rəsmisi ilə həmsöhbət olduq.

Kaspi Liseyinin beynəlxalq əlaqələr üzrə koordinatoru Sahil Əliyev qeyd edir ki, bu olimpiada haqqında ilkin məlumatı beynəlxalq yarışlardan birində iştirak edərkən əldə ediblər: "Bu olimpiada haqqında əvvəlki yarışların birində eşitdik. Bir az araşdırma apardıqdan sonra daha geniş məlumat topladıq. Və qərara gəldik ki, yarışın təşkilatçıları ilə əməkdaşlıq edək. Sonra onların nümayəndəsini ölkəmizə dəvət etdik. Onların beynəlxalq əlaqələr üzrə koordinatoru gəldi. Adı Joseph Harrdır. O, bizə yarışın keçirilmə strukturu haqqında geniş və ətraflı məlumat verdi. Beləliklə, qərara gəldik ki, bu yarışı ölkəmizdə də təşkil edək. Bu yarışda təkcə Azərbaycan yox, Cənubi Qafqazın digər ölkələrindən də şagirdlər iştirak edə bilər. Yarış iki gün boyunca davam edəcək. Yaxşı nəticə əldə edənlər növbəti raunda keçəcək. Hansı ki, həmin mərhələ İspaniyada (Barselona), Avstraliyada baş tutacaq. Orada da yüksək nəticə göstərənlər Amerikada keçiriləcək çempionlar mərhələsinə vəsiqə qazanacaq. Azərbaycandan bir neçə məktəb iştirak edir və biz də həmin məktəblərdən biriyik. Biz həm iştirakçı, həm də təşkilatçıyıq. Bu bizim ilk iştirakımız və ev sahibliyimiz olacaq”.

Təhsil şirkətinin nümayəndəsi yarışın strukturu barədə də məlumat verdi: "Bu olimpiadada iki yaş kateqoriyası üzrə şagirdlər iştirak edir. Bunlardan biri 13-15, digəri 15-17 yaş arası şagirdlərdir. Ümumilikdə, bu yarışda dünya üzrə 20 mindən çox şagird iştirak edir. Qafqazdan isə bu yarışa 200-dən çox iştirakçı qoşulub. Hər il yeni, maraqlı bir mövzu seçilir. Məsələn, bu ilin mövzusu "Bir-biri ilə sıx əlaqəli dünya” adlanır. Bundan başqa, müxtəlif sahələrdən alt başlıqlar qoyulur. Bunların da mövzuları daha çox günümüzlə səsləşən olur. Misal olaraq, bitkoinlə bağlı mövzu var. Və uşaqlar həmin mövzu üzərində işləməli, araşdırma etməli, onunla bağlı esse yazıb, debat aparmalıdırlar. Bu yarışda iştirak sərbəstdir. Xüsusi bir seçim şərti yoxdur. Sadəcə, ingilis dili bilgisi orta və ya yaxşı səviyyədə olmalıdır. Bu yarış şagirdin özünü ifadə etməsinə, həm də mövzu ilə bağlı dünya ədəbiyyatından araşdırma aparmasına kömək olur. Təbii ki, bu işdə müəllimlər şagirdlərə müəyyən dərəcədə yardım edirlər. Olimpiadada iştirak edənlərə yarışın simvolu olan balaca lama oyuncağı hədiyyə olunacaq. Daha sonra komanda halında yer tutanlara kubok, fərdilərə isə medallar veriləcək. Yarışın nəticələri təltif etmə mərasimindən sonra rəsmi olaraq əməkdaşlıq etdiyimiz qurumun və bizim saytımızda yerləşdiriləcək”.

Müsahibimizdən yarışın keçirilməsində güdülən məqsədlər və bu yarışdan gözləntilərinin nələr olduğunu soruşduq: "Yarışın keçirilməyində məqsəd şagirdlərin dünyagörüşünün inkişaf etdirilməsi, araşdırma ruhunu onlara aşılamaq, elmə marağı artırmaqdır. Bu yarışın digərlərindən fərqi humanitar yönümlü olmasıdır. Bundan başqa, uşaqlar sosial bacarıqlarını da genişləndirmiş olurlar. Gözləntilərimiz isə böyükdür. Heç olmasa, 3-4 komandamızın növbəti mərhələyə vəsiqə qazanmasını gözləyirik. Bu bizim təhsil müəssisəsi olaraq gözləntilərimizdir. Amma təşkilatçı olaraq gözləntimiz iştirakçıların daha yaxşı vaxt keçirməsinə və onlar üçün gözəl bir xatirə olmasına nail olmaqdır. Və istəyirik ki, bu yarış onların gələcəkdə belə yarışlarda iştirak etmələri üçün stimul rolunu oynasın”.

S.Əliyev yarışın şagirdlər üçün əhəmiyyətində də danışdı: "Bu yarış uşaqların həyatında böyük əhəmiyyətə malik olacaq. Belə ki, burdan aldıqları sertifikat onlara xarici universitetlərə hazırlaşarkən böyük üstünlük gətirəcək. Dil bilgilərinin və əlaqələrinin genişlənməsinə kömək edəcək. Dünyanın bir sıra ölkələrindən olan şagirdlərlə tanışlıqları yaranacaq. Bu da onların dünyagörüşlərinin inkişaf etməsinə, iş və universitet həyatlarında yüksəlməsinə səbəb olacaq”.

Yarışma haqqında olimpiadanın beynəlxalq əlaqələr üzrə koordinatoru Joseph Harrın da fikirlərini öyrəndik. O bildirdi ki, Bakıda bir sıra məktəblərdə olub: "Mən sentyabr ayının sonunda Bakıya gəldim. Və burda altıdan çox məktəbdə oldum. Öz slaydlarımı təqdim etdim. Burada əsas məqsəd şagirdlərlə görüşlər keçirmək və onlarda yarışa maraq yaratmaqdır. Biz komanda olaraq artıq 5 aydan çoxdur ki, bu yarışa hazırlaşırıq. Düşünürəm ki, bu, uşaqlarda esse yazmaq, debat etmək, araşdırma aparmaq kimi bacarıqları daha da genişləndirəcək”.

Günel Azadə

Kaspi.-2018.-24 yanvar.-S.9.