Turizm və Səyahətlər sərgisi başlayır

Turizm və Səyahətlər sərgisi başlayır Azərbaycan Beynəlxalq Turizm və Səyahətlər sərgisi «AİTF 2019» öz işinə başlayır. Bakı Ekspo Mərkəzində keçiriləcək 18-ci Azərbaycan Beynəlxalq Turizm və Səyahətlər Sərgisi 4-6 aprel tarixində baş tutacaq. Ənənəvi olaraq, sərgi müxtəlif ölkələrin turizm bazarları, milli və regional turizm təşkilatları, eləcə də dövlət strukturlarının nümayəndələrini bir araya gətirəcək. "Caspian Event Organisers” şirkətinin region üzrə direktoru Edvard Stron sərgiyə həsr olunan mətbuat konfransında bildirdi ki, builki sərgini fərqləndirən cəhət «HOREX Caucasus» sərgisi ilə eyni platformada keçirilməməsidir. Marketinq araşdırmaları apararaq və eksponentlərin müraciətlərini nəzərə alaraq, sərgi təşkilatçıları «HOREX Caucasus» sərgisini qida və qablaşdırma mövzusuna həsr olunmuş sərgilərlə paralel keçirmək qərarına gəliblər. "Bundan sonra sırf turizm tədbiri formatında keçiriləcək AİTF sərgisi bütün diqqəti gediş və gəliş turizminə, eləcə də işgüzar turizm – MİCE sənayesinin inkişafına yönəldəcək. Belə ki, ölkəyə gələn turist axınının artması, Azərbaycanda müxtəlif irimiqyaslı beynəlxalq tədbirlərin keçirilməsi və beynəlxalq əlaqələrin inkişafı fonunda, bu mövzunun aktuallığı heç bir şübhə doğurmur. MİCE sektorunun aparıcı mexanizmlərindən biri olan sərgi, turizm agentlikləri, aviaşirkətlər, eləcə də son istehlakçılar arasında əlaqə yaradır. Sərgi yerli və xarici mütəxəssislərin, o cümlədən dövlət strukturlarının görüş yeridir”. Dövlət Turizm Agentliyi yaranandan sonra yeni brendini elan etdiyini deyən agentliyin mətbuat xidmətinin rəhbəri Kənan Quluzadə gəlmə turizmindən danışaraq qeyd etdi ki, ötən il Azərbaycana gələn qonaqların sayı 2 milyon 800 mindən çox olub: "Ötən il ölkəmizə gələn turistlər 2 milyard dollardan çox vəsait xərcləyiblər. Bu il Azərbaycana gələn qonaqların sayı 360 min nəfərdən çox olub: "Daha çox Rusiya və Gürcüstandan turist gəlib. Bundan əlavə, son illərdə Yaxın Şərq ölkələrindən gələn turistlərin sayında böyük artım var. Bu ilin son iki ayının nəticələrinə əsasən, Cənubi Asiya bölgəsindən gələnlərin sayında böyük sıçrayış var. Bu ilin son iki ayının nəticələrinə əsasən demək olar ki, ötən ilin müvafiq dövrü ilə müqayisədə 70 faiz artım var. Mərkəzi Asiya bölgəsi üzrə 30 faiz artım qeydə alınıb. Ümumilikdə isə Azərbaycanda 15 turizm bazarı üzrə turistlərin sayında artım hiss olunur. Bütün prioritet bazarları əhatə etməyə çalışırıq”. K.Quluzadə qeyd etdi ki, əsas məqsəd 2023-cü ilədək Azərbaycana gələn turistlərin sayını 2 dəfə artırmaqdır: "Yaxın zamanlarda 20-yə yaxın beynəlxalq sərgidə Azərbaycanın turizm potensialı təmsil olunacaq”. Layihə rəhbəri Lalə Hüseynova məlumat verdi ki, «Bütün dünya. Bir sərgi» şüarı altında "AİTF 2019” sərgisində dünyanın 17 ölkəsindən 189 şirkət və təşkilat iştirak edir: "Belarus, Bolqarıstan, Çex Respublikası, Çin, Dominikan Respublikası, Gürcüstan, İtaliya, Mərakeş, Tailand və Türkiyənin milli qrupları öz ölkələrinin turizm büroları və səfirlikləri tərəfindən göstərilən dəstək sayəsində iştirak edirlər. "Roqashka Stalina” (Sloveniya), "Stavropol Regionk” (Rusiya), Odessa, Truskovets və Lvov (Ukrayna) kollektiv, İzmir (Türkiyə) isə sərgidə regional stendlə çıxış edirlər. İranın Maku Azad Ticarət zonası da sərgidə regional stendlə debüt edir. Milli və regional stendlərdə kurort və sanatoriyalar, turizm şirkətləri və mehmanxana şəbəkələrinin nümayəndələri çalışacaqlar. Həmçinin bu il Dominikan Respublikası Turizm Nazirliyi də iştirakçı ölkələr arasındadır. AİTF bu ölkənin turizm istiqamətlərini daha parlaq şəkildə təqdim etməsi üçün böyük əhəmiyyət daşıyır”. Qeyd edildi ki, bu il tədbirdə debüt edən Azərbaycan Turizm Bürosu Azərbaycanın yenilənmiş turizm brendini öz stendində təqdim edir. Azərbaycanın turizm şirkətlərini, eləcə də otel və sanatoriyalarını öz stendində bir araya gətirən Azərbaycan Turizm Assosiasiyasının (AZTA) ekspozisiyası isə həm Azərbaycanda, həm də xaricdə turizm üzrə geniş təkliflər silsiləsini təqdim edir. «AİTF 2019» sərgisinin iştirakçıları üç gün ərzində öz təklifləri ilə yay və qış turizm mövsümlərini əhatə etməklə, turizm xidmətlərinin bütün spektrlərini nümayiş etdirəcəklər. Əvvəlki illərdə olduğu kimi, bu il də sərgidə təhsil turizmi, idman turizmi, turizm sahəsində informasiya texnologiyaları, ov və balıqçılıq, bir sıra digər sektorlar təqdim olunacaq. Xüsusi sektor olan «Tibbi və Sağlamlıq Turizmi» çərçivəsində Belarus Respublikasını, Bolqarıstanı, Çex Respublikasını, Sloveniyanı və Rusiyanı təmsil edən sanatoriyalar, sağlamlıq və SPA mərkəzləri iştirak edirlər. Tədbirlər üzrə menecer Züleyxa Rüstəmova qeyd etdi ki, sərgi həm də geniş işgüzar proqramdır. Belə ki, sərginin keçirildiyi günlər ərzində müxtəlif görüşlər, seminarlar və təqdimatlar təşkil ediləcək. 2019-cu il prezident İlham Əliyevin göstərişi ilə «Nəsimi ili» elan edilib. Poeziyamızın incilərinin müəllifi olan İmadəddin Nəsimi Azərbaycan ədəbiyyatının formalaşmasında mühüm rol oynayıb. "Nəsimi Azərbaycan divan poeziyasının atası və Azərbaycan ədəbi dilinin banisi hesab edilir. Bu münasibətlə sərginin üç iş günü ərzində qonaqlara «Nəsimi tarixi və yaradıcılığına səyahət» etmək və bununla da dahi şairin əziz xatirəsini yad edərək, Azərbaycanın zəngin mədəniyyəti ilə tanış olmaq imkanı yaradılacaq. Layihə "Libraff” kitab mağazaları şəbəkəsinin dəstəyi ilə keçirilir”. Menecer bildirdi ki, sərgi çərçivəsində 5 aprel tarixində «B2B» formatlı görüş platforması öz işinə başlayacaq. Burada yerli turizm şirkətlərinin nümayəndələri turizm və istirahət sahəsində tərəfdaşlar tapmaq məqsədi ilə xarici sərgi iştirakçıları ilə görüşəcəklər. Həmin gün «Səyyahlarla Dünya Turu» seminarında sərginin qonaqları, dünyaya səyyahların gözü ilə nəzər sala biləcəklər. Təşkilatçıların bu yeni layihəsi çərçivəsində səyahət bloqerləri İradə Qədirova «Ekoturizm – Azərbaycanda turizmin yeni istiqaməti kimi», Orxan Aslanov «Rəsmli Səyahətlər», Fərid Novruzi «Planetimizin unikal yerləri», Emin Dostiyari «Həm ziyarət, məm ticarət» mövzuları ilə bağlı çıxışlarında səyahət təcrübələrini, faydalı məsləhətlərini və əyləncəli xatirələrini bölüşəcəklər. Seminar bütün ziyarətçilər üçün açıqdır. Sərginin sonuncu iş günü – 6 aprel tarixində Bakı Ekspo Mərkəzinin foyesində ziyarətçi və iştirakçılar üçün «Səyahət əhvalı» festivalı təşkil ediləcək: "Sərgi turizm sənayesinin aparıcı mütəxəssislərinin görüşü üçün unikal platforma kimi öz mühümlüyünü təsdiqləyir. Peşəkar sənaye nümayəndələri satış coğrafiyasını genişləndirmək, sənayenin ən son yenilik və təmayülləri barədə məlumat almaq, eləcə də yeni tərəfdaş və müştərilərlə görüşə bildikləri üçün bu tədbiri hər il səbirsizliklə gözləyirlər. AİTF turizm sahəsində regionun nəhəng sərgisi olmaqla yanaşı, həm də mədəniyyət, yeni təəssürat, imkan və dostluqlar bayramıdır”. Sərgi Azərbaycan Respublikasının Dövlət Turizm Agentliyinin, Milli Turizm Təbliğat Bürosunun, Azərbaycan Respublikasının Kiçik və Orta Biznesin İnkişafı Agentliyinin, Azərbaycan Turizm Assosiasiyasının, Azərbaycan Respublikası Sahibkarlar (İşəgötürənlər) Təşkilatları Milli Konfederasiyasının və Azərbaycanda İxracın və İnvestisiyaların Təşviqi Fondunun dəstəyi ilə keçirilir. Ümumdünya Turizm Təşkilatı UNWTO və Asiya-Sakit Okean Turizm Assosiasiyası PATA sərgiyə dəstək göstərən beynəlxalq təşkilatlar arasında yer alırlar. AİTF sərgisi Ümumdünya Sərgi Sənayesi Assosiasiyası (UFİ) tərəfindən keyfiyyət nişanına layiq görülüb. Mətbuat konfransında iştirak etdi

Təranə Məhərrəmova

Kaspi 2019.- 4 aprel.- S.13.