Zərifə Əliyeva - ana, qadın, alim

Görkəmli oftalmoloq alimin anım mərasimi keçirilib

Dünən Əziz Əliyev adına Azərbaycan Dövlət Həkimlərin Təkmilləşdirmə İnstitutunda Səhiyyə Nazirliyinin təşkilatçılığı ilə oftalmoloq - alim Zərifə Əliyevanın anım mərasimi keçirilib. APA-nın məlumatına görə, tədbirdə çıxış edən səhiyyə naziri Oqtay Şirəliyev bildirib ki, oftalmoloq və ictimai xadim Zərifə Əliyevanın anadan olmasının 86-cı ildönümü tamam olur:

"1947-ci ildə Tibb İnstitutunu bitirdikdən sonra Zərifə Əliyeva bütün ömrü boyu oftalmologiya sahəsində xidmət göstərib. Zərifə Əliyeva traxoma xəstəliyinin son dərəcə geniş yayıldığı bir dövrdə onun Azərbaycanda ləğv olunması istiqamətində böyük xidmətlər göstərib. Peşə xəstəlikləri ilə göz xəstəliklərinin əlaqəsini araşdıran ilk alim kimi Zərifə Əliyeva sənayedə göz xəstəliklərini aşkar edən laboratoriya yaradıb".

Nazir bildirib ki, Z.Əliyeva 12 monoqrafiyanın və 150-dən artıq elmi məqalənin müəllifidir. O.Şirəliyev onu da deyib ki, oftalmoloq SSRİ Tibb Elmləri Akademiyasının nüfuzlu Averbax adına mükafatına layiq görülən ilk qadın alim olub.

Zərifə Əliyevanın anadan olmasının 86-cı ildönümü ilə bağlı digər tədbir alimin adını daşıyan məktəbdə keçirilib. Tədbirdə çıxış edən təhsil müəssisəsinin direktoru Məhəbbət Vəliyeva məktəbin fəaliyyətə başladığı 7 ay ərzində görülən işlərdən danışıb. O, məktəbdə tədrisin səviyyəsinin yüksəldilməsi məqsədilə elm və texnikanın son imkanlarından istifadə edildiyini söyləyib. Sonra məktəbin internet saytının təqdimatı keçirilib və bildirilib ki, veb-sayt vasitəsilə dərs prosesini izləmək mümkün olacaq. Tədbir "Zərifə Əliyeva - ana, qadın, alim" mövzusunda ədəbi-bədii gecə ilə davam etdirilib. Tədbirdə iştirak edən təhsil naziri Misir Mərdanov məktəbin gələcəyinə inandıqlarını və buradakı tədrisin səviyyəsinin daha da inkişaf edəcəyini vurğulayıb. Nazir Z.Əliyevanın həyatı və elmi fəaliyyəti haqqında da danışıb.

Kaspi.-2009.-29 aprel.-S.3.