Yubiley olacaq!

İlham Namiq Kamalı teatr sahəsindəki xidmətlərinə görə mükafatlandırılıb

Mədəniyyət və turizm naziri Əbülfəs Qarayev 60 yaşı yenicə tamam olan Musiqili Komediya Teatrının aktyoru İlham Namiq Kamalı teatr sahəsindəki xidmətlərinə görə mükafatlandırıb. Ə.Qarayevin bu münasibətlə imzaladığı əmrdə İlham Namiq Kamalın yaradıcılığı yüksək qiymətləndirilib, onun yubileyinin keçirilməsi Musiqili Komediya Teatrının rəhbərliyinə həvalə edilib. İlham Namiq Kamal 1966-cı ildə Azərbaycan Dövlət İncəsənət İnstitutunun "Dram-kino aktyorluğu" fakültəsinə daxil olub. 1972-ci ildə Akademik Milli Dram Teatrına dəvət alan aktyor bu səhnədə Müsyö Yordan və Dərviş Məstəli şah ("Müsyö Yordan və Dərviş Məstəli şah"), Sarı Qarayev ("Varlı qadın"), Zaman müəllim ("Bu dünyanın adamları"), Gülən adam ("Hərənin öz payı"), Kişi ("Mənim ərim dəlidir"), doktor Qaratay ("Afət") kimi rollarda çıxış edib.

1989-cu ildən Dövlət Gənclər Teatrında çalışan İlham Namiq Kamal burada Məsuliyyətsiz ("Çarəsiz sərnişinlər"), Dadaşbala ("Dadaşbala əməliyyatı"), Sultanqulu ("Sultanqulu körpüsü"), Kələntər ("Dağ tikirik"), Daniel ("Arvadımın qatili"), Kazbek ("Arvadımın əri özüməm") kimi baş rolların ifaçısı olub.

Elə həmin vaxtlardan Azərbaycan Dövlət Gənclər Teatrında işləməklə yanaşı, Musiqili Komediya Teatrında da aktyor kimi çalışan İlham Əhmədov bu teatrda Albadam ("Sevgilimin anası və yaxud evlənmə əməliyyatı"), Adil ("Qarğa məndə qoz var"), polkovnik Mikayıl ("Qısqanc ürəklər"), İbad İbadov ("Mən dəyərəm min cavana"), Meydan ("Şeytanın yubileyi"), eyni zamanda rus bölməsində Eduardo de Flipponun librettosu əsasında Fərəc Qarayevin bəstələdiyi "Filumeno Marturano" komediyasında Dominseko Soriano kimi obrazları yaradıb.

Aktyor "Azərbaycanfilm"in istehsal etdiyi ekran əsərlərinə də çəkilib. Onun İlqar ("Qayınana"), Əbdürrəhman (iki seriyalı "Qəribə adam"), MİS müdiri ("Arvadım mənim, uşaqlarım mənim"), Yurnalist ("Uzun ömrün akkordları"), Əli ("Qızıl qaz"), Anar ("Bəyin oğurlanması") filmlərindəki rolları daha çox yaddaqalandır. Onlarca televiziya verlişində satirik obrazlarda, "Mozalan" satirik kinoyurnalında yüzə yaxın bədii süyetdə uğurla çıxış edən aktyor bu gün tamaşaçıların sevimlisinə çevrilib.

İlham Namiq Kamal 1997-ci ildən pedaqoyi fəaliyyətlə də məşğuldur. Azərbaycan Dövlət Mədəniyyət və İncəsənət Universitetində kafedra müdiri, professordur.

2000-ci ildə "Qızıl Dərviş" mükafatına layiq görülüb, Prezident mükafatçısıdır.

İlham Namiq Kamal 1982-ci ildə Azərbaycan Respublikasının Əməkdar artisti, 2002-ci ildə Xalq artisti fəxri adları ilə təltif olunub.

Hazırda mədəniyyət və turizm nazirinin əmrinə uyğun olaraq Musiqili Komediya Teatrında aktyorun yubiley gecəsinə geniş hazırlıq işləri görülür. Gecənin ssenarisini yazıçı Maarif Məmmədov yazacaq. İstedadlı reyissor, Prezident mükafatçısı Əskər Əskərovun quruluşunda tamaşaçılara təqdim olunacaq yubiley gecəsində teatrın bütün kollektivi iştirak edəcək. Aktyorun həyat və yaradıcılığından bəhs edən yubiley sərgisini isə teatrın rəssamları Mirteymur Mirsəlimov və Fərid Nəcəfov ərsəyə gətirəcək. Novruz bayramı ərəfəsində nəzərdə tutulan yubiley gecəsi tamaşaçılara əsl bayram sovqatı olacaq.

Təranə

Kaspi.-2009.- 11 fevral.-S.12.