Yol-nəqliyyat hadisələrinin sayı azalıb

 

Ərəstun Məcidov: "İnzibati Xətalar Məcəlləsinə edilmiş dəyişikliklər hərəkət iştirakçılarının intizamına öz müsbət təsirini göstərir"

 

Müsahibimiz DİN BDYPİ-nin İctimaiyyətlə əlaqələr şöbəsinin rəisi, polis polkovniki Ərəstun Məcidovdur.

- Ötən ilin yekunlarına əsasən hərəkətin təhlükəsizliyinin təmin edilməsi sahəsində hansı işlər görülmüşdür?

- 2008-ci il ərzində "Siqnal" İLİ tərəfindən 27 yolayrıcının svetoforla tənzimlənməsi üçün quraşdırma işləri aparılmış, 3197 yol nişanı qoyulmuş və ya yenisi ilə əvəz edilmişdir. Bundan əlavə, sürücü kollektivi olan avtotəsərrüfatların rəhbərliyi və sürücüləri ilə görüşlər keçirilmiş, sürücülər tərəfindən Yol Hərəkəti Qaydalarına əməl olunması vəziyyəti, törədilən yol nəqliyyat hadisələri, sürücülər arasında intizamın möhkəmləndirilməsi ilə bağlı söhbətlər aparılmış, hərəkətin təhlükəsizliyi tələblərinə ciddi əməl olunması, avtomobillərin normadan artıq yüklənməsi və texniki cəhətdən saz vəziyyətdə istismar olunması barədə onlara tövsiyələr verilmişdir. Bundan başqa, "Atmosfer havasının mühafizəsi haqqında" Azərbaycan Respublikası Qanunu və Azərbaycan Respublikası Prezidentinin 28 sentyabr 2006-cı il tarixli 1697 nömrəli Sərəncamı ilə təsdiq edilmiş "Azərbaycan Respublikasında ekoloyi vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı"nda nəzərdə tutulmuş aidiyyəti tədbirlərin icrası üzrə işlər ümumiləşdirilərək, konkret təkliflər Ekologiya və Təbii Sərvətlər Nazirliyinə və Nazirlər Kabinetinə təqdim edilmişdir. DİN BDYPİ-nin Nəqliyyat Nazirliyinin Dövlət Avtomobil Xidməti və Ekologiya və Təbii Sərvətlər Nazirliyi ilə birgə fəaliyyət planına əsasən müvafiq tədbirlər həyata keçirilmişdir. Avqust ayının 1-dən 31-dək keçirilmiş "Təmiz hava" aylığı ərzində xidməti istifadədə olan 105 ədəd qazanalizedici və tüstüölçən cihazlardan istifadə olunmaqla, 87 iri avtomobil təsərrüfatında və yollarda aparılan yoxlamalar zamanı 6112 avtomobilin işlənmiş qazlarında zərərli maddələrin miqdarının normadan artıq olduğu müəyyən edilmişdir. Ümumiyyətlə, 2008-ci ildə 9211 avtomobilin mühərriklərinin işlənmiş qazlarında zərərli maddələrin miqdarının normadan artıq olduğu aşkar olunaraq, müvafiq inzibati tədbirlər görülmüşdür. Sərnişindaşımada təhlükəsizliyin təmin edilməsi ilə bağlı tədbirlər davam etdirilmiş, bu işlərə cəlb olunan nəqliyyat vasitələrinin sürücüləri tərəfindən yol verilən qayda pozuntularına qarşı mütəmadi reydlərin keçirilməsi təşkil olunmuşdur. Bütövlükdə 2008-ci il ərzində sərnişindaşıma qaydalarını pozmuş 12 mindən artıq şəxs inzibati məsuliyyətə cəlb olunmuşdur. Qeyd edim ki, Baş İdarənin əməkdaşları tərəfindən 2008-ci ildə hüquqi və fiziki şəxslərə məxsus olan nəqliyyat vasitələrinin qeydiyyatı və sürücülük vəsiqələrinin verilməsi üzrə vətəndaşların, idarə, müəssisə və təşkilatların nümayəndələrinin qəbulu aparılmış, 87792 avtomobil ilkin qeydiyyata alınmışdır. Vətəndaşlara 133 733 sürücülük vəsiqəsi verilmişdir.

- Baş Dövlət Yol Polisi İdarəsi tərəfindən məktəblilərin Yol Hərəkəti Qaydalarını öyrənməsi istiqamətində ötən il həyata keçirilən tədbirlər haqqında, zəhmət olmasa, ətraflı danışardınız.

- Ötən il uşaq yol-nəqliyyat travmatizminin qarşısının alınması, habelə məktəblilərin Yol Hərəkəti Qaydalarını dərindən öyrənmələri istiqamətində tədbirlər davam etdirilmişdir. Ümummilli lider Heydər Əliyevin 85 illik yubileyi ilə əlaqədar keçirilən tədbirlərlə bağlı 12 may 2008-ci il tarixdə Baş Dövlət Yol Polisi İdarəsinin iştirakı ilə Bakı şəhəri Məktəbdənkənar tərbiyə mərkəzinin nəzdində yerləşən uşaq avtomobil şəhərciyinin təntənəli açılışı olmuş, tədbirdə 100 məktəbli arasında "Yol hərəkəti qaydaları və mən" mövzusunda rəsm müsabiqəsi keçirilərək qaliblər mükafatlandırılmışlar. Keçmiş Sovetlər İttifaqında Gənc Hərəkət İnspektorları dəstəsinin yaranmasının 35 illiyi münasibətilə Rusiya Federasiyasının Rostov şəhərində 3-11 iyun tarixlərində keçirilən dövlətlərarası toplantıda BDYPİ-nin əməkdaşları paytaxtın 245 saylı orta məktəbinin şagirdləri ilə birgə iştirak etmiş, keçirilən yarışlarda uğurla çıxış edərək birinci yerə layiq bilinmişlər.

- Cinayətkarlığa qarşı mübarizənin gücləndirilməsi istiqamətində hesabat dövrü ərzində görülən tədbirlər haqqında nə deyə bilərsiniz?

- Azərbaycan Respublikası Prezidentinin "Cinayətkarlığa qarşı mübarizənin gücləndirilməsi, qanunçuluğun və hüquq qaydalarının möhkəmləndirilməsi tədbirləri haqqında" 1994-cü il tarixli fərmanından irəli gələn vəzifələri rəhbər tutaraq, hesabat dövründə DYP əməkdaşları tərəfindən 15 ədəd Kalaşnikov avtomatı, 13 ədəd müxtəlif tip tapança, 13 ədəd yivli və 160 ədəd ov tüfəngi, 12 ədəd əl qumbarası, 1 ədəd minaaxtaran cihaz, 7041 ədəd müxtəlif kalibrli patron və s. aşkar edilərək istintaq orqanlarına təhvil verilmişdir. Hesabat dövründə axtarışda olan 32 nəfər şəxs yaxalanmışdır. Hesabat dövründə polisin digər xidmət sahələri ilə birlikdə keçirilmiş tədbirlər nəticəsində 30 fakt üzrə 142 kq - 518,31 qram narkotik maddə və 44 çətənə kolu aşkar olunmuşdur. 2008-ci ildə BDYPİ-yə nəqliyyat vasitəsinin oğurlanması və qaçırılması barədə 116 məlumat daxil olmuşdur ki, onlardan 105-i tapılmış, açılma faizi 90,5% təşkil etmişdir. BDYPİ-nin qeydiyyat-imtahan hissələrində avtonəqliyyat vasitələrinin qeydiyyat hərəkətləri zamanı məlumat bazası ilə axtarışda olan 191 avtomobil, habelə aqreqat nömrələrinin qeydiyyat sənədləri ilə uyğunsuzluğu üzrə 396 fakt aşkar olunaraq, toplanmış materiallar araşdırılması üçün təhqiqat orqanlarına göndərilmişdir.

- Polisin əsas vəzifələrindən biri də insan hüquq və azadlıqlarının müdafiəsini təşkil etməkdir. Konkret olaraq bunun üçün hansı işlər görülür?

- Bildiyiniz kimi, ölkə polisi insan və vətəndaş hüquqlarına və azadlıqlarına hörmət, qanunçuluq, humanistlik və təkbaşçılıq prinsipləri əsasında ilk növbədə ictimai qaydanın qorunması və ictimai təhlükəsizliyin, o cümlədən yol hərəkəti təhlükəsizliyinin təmin edilməsinə çalışır. İctimai qaydanın qorunması və ictimai təhlükəsizliyin təmin edilməsi sahəsində polis əməkdaşının əsas vəzifələrindən biri də hər bir şəxsin təhlükəsizliyini təmin etməkdir. Polis öz vəzifələrini yerinə yetirərkən irqindən, milliyyətindən, dinindən, dilindən, cinsindən, mənşəyindən, əmlak vəziyyətindən, qulluq mövqeyindən, əqidəsindən, siyasi partiyalara, həmkarlar ittifaqlarına və digər ictimai birliklərə mənsubiyyətindən asılı olmayaraq, bütün şəxslərin Azərbaycan Respublikasının Konstitusiyasında və tərəfdar çıxdığı dövlətlərarası müqavilələrdə nəzərdə tutulmuş hüquqlarını və qanuni mənafelərini hüquqazidd əməllərdən qorumağa çalışır. Bu zaman polisin insanın ləyaqətini alçaldan şəkildə rəftar etməsi yolverilməzdir. Biz də öz fəaliyyətimizdə qanunla nəzərdə tutulan bütün bu qaydaları rəhbər tutaraq, insan və vətəndaşların hüquq və azadlıqlarına xələl gətirmədən öz başlıca vəzifəmizi - ictimai qaydanın və ictimai təhlükəsizliyin təmin edilməsinə yönələn səylərimizi davam etdiririk. Son illər hüquq-mühafizə orqanlarında müasir dövrün tələblərinə uyğun islahatlar aparılmaqla yanaşı, insan və vətəndaş hüquq və azadlıqlarının təmin edilməsi sahəsində fəaliyyətin təkmilləşdirilməsi istiqamətində də müəyyən işlər görülür. Hesab edirəm ki, bütün bunlar bu sahədə qarşılaşdığımız müəyyən çətinliklərin tədricən aradan qaldırılmasında yardımçı olacaqdır.

- Yol hərəkəti qaydalarının pozulmasına görə məsuliyyətin gücləndirilməsi öz müsbət nəticələrini verirmi?

- Yol hərəkəti qaydalarının pozulmasına görə məsuliyyətin gücləndirilməsi məqsədilə Azərbaycan Respublikasının 2007-ci il 6 noyabr tarixli 481-IIIQD nömrəli Qanunu ilə İnzibati Xətalar Məcəlləsinə edilmiş dəyişikliklər artıq hərəkət iştirakçılarının intizamına öz müsbət təsirini göstərir. Belə ki, 2008-ci ildə yol hərəkətinə nəzarət prosesində DYP əməkdaşları 875 923, o cümlədən balla qiymətləndirilən 192818 Yol Hərəkəti Qaydaları pozuntusu, nəqliyyat vasitələrinin sərxoş sürücülər tərəfindən idarə edilməsi üzrə 20345 fakt aşkar etmişlər. Ötən ilin müvafiq dövrü ilə müqayisədə aşkar olunmuş xətaların sayı 36 minədək (3,9%) azalmışdır. Yol hərəkəti qayda pozuntularına görə 97167 sürücü yerində cərimə olunmuş, 10 və daha artıq cərimə balı topladıqlarına görə 3597 sürücünün hüququ müxtəlif müddətlərə məhdudlaşdırılmışdır. 762 nəfər avtoxuliqanlıq etmiş, habelə avtomobil şüşələrinə qanunla müəyyən olunmayan plyonka və örtüklər çəkilmiş 2762 şəxs aşkar edilərək məsuliyyətə cəlb olunmuşdur.

- Hesabat dövrü ərzində respublika üzrə qeydə alınmış yol nəqliyyat hadisələrinin sayında azalma müşahidə olunubmu?

- Qeyd edim ki, respublikada yol hərəkətinin təhlükəsizliyinin təmini sahəsində aparılmış profilaktik tədbirlər qəzalılığın vəziyyətinə də öz təsirini göstərmiş, il ərzində ölkə üzrə 100 minədək avtomobil ilkin qeydiyyata alındığı halda, yol-nəqliyyat hadisələrinin hər 3 göstərişinin azalması müşahidə olunmuşdur. Belə ki, hesabat dövrü ərzində 2970 yol-nəqliyyat hadisəsi qeydə alınmış, nəticədə 1052 nəfər həlak olmuş, 3232 nəfər yaralanmışdır. Ötən illə müqayiəsədə yol-nəqliyyat hadisələrinin, həlak olanların və yaralananların sayı müvafiq olaraq 135 (4,8%), 61 (5,5%) və 200 (5,8%) azalmışdır. DİN BDYPİ YPXA-nın xidmət ərazisində hesabat dövründə 610 yol-nəqliyyat hadisəsi qeydə alınmış, nəticədə 341 nəfər həlak olmuş, 716 nəfər yaralanmışdır. Ötən illə müqayisədə yol-nəqliyyat hadisələrinin, həlak olanların və yaralıların sayı müvafiq olaraq 3 (0,5%), 37 (9,8%) və 48 (6,3%) azalmışdır. Bakı şəhəri ərazisində 1392 yol-nəqliyyat hadisəsi qeydə alınmış və bunların nəticəsində 352 nəfər həlak olmuş, 1534 nəfər yaralanmışdır. 2007-ci illə müqayisədə yol-nəqliyyat hadisələrinin, həlak olanların və yaralananların sayı müvafiq olaraq 141 (9,1%), 53 (13,1%) və 202 (11,6%) azalmışdır. Respublika üzrə qeydə alınmış yol-nəqliyyat hadisələrinin 91,8%-i (2728) sürücülərin Yol Hərəkəti Qaydalarını pozmaları, o cümlədən 41,9%-i (1244) nəqliyyat vasitələrinin yüksək sürətlə idarə olunması, 24,4%-i (725) ötmə və qarşıdan gələn nəqliyyatın yoluna çıxma, 8,2%-i (244) yolayrıcılarını keçmə qaydalarının pozulması, 2,5%-i (74) nəqliyyat vasitələrinin sərxoş vəziyyətdə idarə olunması səbəbindən baş vermişdir. Yol nəqliyyat hadisələrinin 41,8%-ni (1242) piyadaların vurulması təşkil etmiş, nəticədə 360 piyada həlak olmuş, 975-i yaralanmışdır. 151 yol nəqliyyat hadisəsi bilavasitə piyadaların Yol Hərəkəti Qaydalarını pozmaları nəticəsində baş vermişdir. Respublika üzrə qeydə alınmış yol nəqliyyat hadisələləri nəticəsində 104 nəfər uşaq və yeniyetmə həlak olmuş, 337 nəfər yaralanmışdır. Həlak olanların 59-u, yaralananların isə 194 nəfəri piyadalardır.

 

 

QULİYEV  İsgəndər

 

Kaspi.-2009.-24 fevral.-S.8.