Yeni iş yerlərinin 80 faizi regionlarda açılıb

Azərbaycan neft ehtiyatlarından istifadə ilə bağlı tam düzgün yol seçib

Dünən "Gülüstan" sarayında Azərbaycanda "Regionların sosial-iqtisadi inkişafı" Dövlət Proqramının (2004-2008-ci illər) icrasının yekunlarına həsr olunmuş konfrans keçirildi. Konfransda prezident İlham Əliyev də iştirak edib. Tədbirə həmçinin dövlət və hökumət rəsmiləri, rayon icra hakimiyyətlərinin başçıları da qatılmışdılar.

Konfransda 2004-2008-ci illər ərzində Azərbaycanda "Regionların sosial-iqtisadi inkişafı" Dövlət Proqramının icrası yönündə görülən işlər müzakirə olundu.

Tədbirdə çıxış edən prezident İlham Əliyev bildirdi ki, "Regionların sosial-iqtisadi inkişafı" Dövlət Proqramı vaxtından əvvəl, daha böyük həə və uğurla icra olunub. "Bu, tarixi bir nailiyyətdir" - deyə prezident vurğuladı. Dövlət başçısı bildirdi ki, 2004-cü ildə başlanan bu proqramın uğurla gerçəkləşdirilməsi artıq insanların həyat şəraitində, şəhər və kəndlərin abadlaşan simasında, çəkilən yollarda, qurulan infrastrukturda - bütövlükdə sosial sahədəki müsbət dəyişikliklərdə özünü təsdiqləməkdədir. Prezident Azərbaycan iqtisadiyyatını neft, qaz amilindən asılılığının azaldılması istiqamətində böyük işlər görüldüyünü, regionların inkişafına diqqət ayrıldığını, sahibkarlığa böyük dəstək verildiyini bildirdi.

Ölkə başçısı bildirdi ki, Azərbaycanda elə bir sahə yoxdur ki, bu proqram oranı əhatə etməsin. İlham Əliyev proqramın icrası nəticəsində Azərbaycanın texniki imkanlarının gücləndiyini, böyük tikinti layihələrinin daxili imkanlar hesabına aparıldığını, bu işlərin görülməsi üçün ortaya ciddi siyasi iradə qoyulduğunu, maliyyə nizam-intizamının yaradıldığını bildirdi. Prezident dedi ki, bu proqramın nə dərəcədə böyük əhəmiyyəti olduğunu görmək üçün təkcə bir neçə statistik rəqəmə diqqət yetirmək kifayətdir: "Son 5 ildə Azərbaycan iqtisadiyyatı 2,6 dəfə artıb. Adambaşına düşən gəlir 5500 dollara çatıb. Sənaye istehsalı 2,5 dəfə artıb və sənayeləşmə prosesi çox geniş vüsət alıb. 766 min yeni iş yeri açılıb ki, onlardan 546 mini daimi iş yerləridir. Bunun nəticəsində yoxsulluğun səviyyəsi kəskin şəkildə aşağı - 49 faizdən 13,2 faizə düşüb. Büdcə xərclərimiz 12 dəfədən çox artıb. Valyuta ehtiyatlarımız bu gün 18 milyard dollardan çoxdur".

Prezident dedi ki, bu illər ərzində elektroenergetika sahəsinə xüsusi diqqət göstərilib. Belə ki, respublikanın müxtəlif bölgələrdə 9 elektrik stansiyası tikilib ki, onların ümumi gücü 1 000 MVt-dan çoxdur. Bu il daha 2 elektrik stansiyasının istifadəyə veriləcəyi, onların gücünün 600 MVt təşkil edəcəyi gözlənilir. Daha iki elektrik stansiyası isə tikilməkdədir. Eləcə də ölkənin 85 faizdən çox ərazisində qazlaşma prosesi başa çatdırılıb. Bu rəqəmin 92-93 faizə çatdırılması qarşıya məqsəd qoyulub. Qısa müddət ərzində 8 rayona, o cümlədən Naxçıvan Muxtar Respublikasına qaz verilib. Nəticədə əhalinin eneryi təminatında ciddi dəyişikliklər yaradıb.

Dünyada neft və qazla zəngin ölkələrdə təbəqələşmənin sürətlə getdiyini, iş yerlərinin az olduğunu bildirən dövlət başçısı Azərbaycanda bunun tam əksinin göründüyünü bildirdi. O qeyd etdi ki, Azərbaycan neft ehtiyatlarından istifadə ilə bağlı tam düzgün yol seçib. Belə ki, iqtisadiyyatın real sektoruna vəsait qoyulur, ölkədə neft gəlirləri ədalətli bölünür, bu sahədə şəffaflıq təmin olunur. Prezident şəffaflığın daha da gücləndirilməsi üçün müəyyən işlərin görüldüyünü də nəzərə çatdırdı. O qeyd etdi ki, son 17 ildə iqtisadiyyatda özəl sektorun payı 85 faizə çatıb. Ölkədə son beş ildə minimum əməkhaqqının 8,3 dəfə, minimum pensiyanın 4 dəfə artdığını xatırladan dövlət başçısı bu müddətdə 1600 məktəb, yüzlərlə tibb ocağı, 8 müalicə-diaqnostika mərkəzinin tikildiyini, 8 müalicə-diaqnostika mərkəzinin tikilməkdə olduğunu, 10-dan çox olimpiya idman kompleksinin inşa olunduğunu, mədəniyyət ocaqlarının təmir edildiyini vurğuladı. Beş il əvvəl Azərbaycanda bir dənə də olsun çadır şəhərciyinin qalmayacağına söz verdiklərini xatırladan İlham Əliyev dedi ki, artıq ölkədə çadır şəhərciyi yoxdur. O, həmçinin Azərbaycanda 4 aeroportun tikilərək istifadə verildiyini, bunun ölkənin strateji maraqlarına cavab verdiyini bildirdi.

Prezident Azərbaycanın tanker donanmasının maksimum təmin edildiyini, bu müddətdə ölkədə taxıl istehsalının 300-400 min ton artdığını bildirdi. Onun sözlərinə görə, Azərbaycan özünün ərzaq təhlükəsizliyini də təmin edib.

Prezident dünyada hökm sürən maliyyə böhranının Azərbaycanda az hiss olunduğunu qeyd edərək dedi ki, bu təsir daha da azaldılmalıdır. Bəzi ölkələrin maliyyə böhranı ilə əlaqədar beynəlxalq təşkilatlara kredit üçün üz tutduqlarını qeyd edən ölkə başçısı bunun müəyyən asılılıq yaratdığını, həmin ölkələrin müstəqil siyasət yürüdə bilmədiklərini dedi. "Kredit ayrılması barədə Azərbaycana da müraciətlər olub" - deyə ölkə prezidenti vurğuladı.

Prezident onu da bildirdi ki, regionların sosial-iqtisadi inkişafı layihəsi qarşıdakı beş ildə də davam etdiriləcək. "Qarşıdakı beş il ərzində Azərbaycan planlaşdırılmış infrastruktur layihələrini başa çatdırmalıdır. Bunun üçün bütün imkanlar var" - deyə İlham Əliyev vurğuladı. O qeyd etdi ki, hazırda qarşıdakı beş il üçün proqramın hazırlanması istiqamətində iş aparılır. Həmin proqram yaxın vaxtlarda təsdiqlənəcək. "Proqram çox konkretdir" - deyə prezident vurğuladı. Onun sözlərinə göər, yeni proqramın əsas məqsədlərindən biri qeyri-neft sektorunun inkişafı ilə bağlı olacaq. Qarşıdakı illərdə elektrik eneryisi, qazlaşdırma sahələrində bir çox infrastruktur proqramlar həyata keçiriləcək. İçməli su təminatı, meliorasiya və suvarmaya böyük diqqət ayrılacaq. Bu istiqamətdəki vacib layihələr içərisində Oğuz-Qəbələ-Bakı su kəmərinin, Samur-Abşeron kanalının, "Taxtakörpü" su anbarının tikilməsi, Kür və Araz çaylarında təmizləyici qurğuların qurulması ilə bağlı məsələlər də var. Dövlət başçısının sözlərinə görə, Azərbaycan öz su təhlükəsizliyini təmin etməlidir.

Sutəmizləyici qurğuların qurulması proqramının birinci mərhələsi çərçivəsində 400 min nəfər təmiz su ilə təmin olunacaq. Proqram çərçivəsində ümumilikdə 800 min nəfərin təmiz su ilə təchiz olunması nəzərdə tutulur. Çay, kanal olan istənilən yerdə sutəmizləyici qurğular qurulacaq. Meliorasiya və suvarmaya böyük vəsaitlər ayrılacaq. Yeni proqramda ekologiya məsələləri də vacib yer tutacaq.

Konfransda çıxış edən iqtisadi inkişaf naziri Şahin Mustafayev bildirdi ki, son beş il ərzində Azərbaycan regionlarının inkişafına yatırılan dövlət sərmayələri altı dəfə artıb. "2004-cü illə müqayisədə 2008-ci ildə ölkə regionlarının inkişafına yatırılan sərmayələr altı dəfə artaraq 3,9 mlrd. manata çatıb" - deyə nazir vurğuladı. Onun sözlərinə görə, regionlara qoyulan sərmayələr ümumi dövlət sərmayələri həcminin 83 faizini təşkil edib: "Bütün bölgələrdə yeni müəssisələr yaradılıb. Ölkənin bütün regionlarını əhatə edərək 27 500 müəssisə açılıb ki, bunun da 40 faizi regionların payına düşüb". Nazir əlavə etdi ki, son 5 ildə ölkədə açılan 766 min yeni iş yerinin 80 faizi regionların payına düşüb.

QULİYEV İ.

Kaspi.-2009.-24 fevral.-S.2.