“Xocalıya Ədalət”

Beynəlxalq kampaniya bir sıra ölkələrdə reallaşdırılıb

"Xocalıya Ədalət" Beynəlxalq məlumat-təşviqat kampaniyasının və kampaniyanın internet saytı www.yusticeforkhoyaly.org

<http://www.yusticeforkhoyaly.org> - un dünyanın aparıcı mərkəzlərində təqdimatının keçirilməsi davam edir. Qeyd edək ki, "Xocalıya Ədalət" (Yustice for Khoyaly) beynəlxalq məlumat və təşviqat kampaniyası İslam Konfransı Təşkilatına (İKT) üzv qurum olan Dialoq və Əməkdaşlıq uğrunda İslam Konfransı Gənclər Forumunun (DƏ-İKGF) Mədəniyyətlərarası Dialoq üzrə Baş Koordinatoru xanım Leyla Əliyevanın təşəbbüsü ilə 8 may 2008-ci ildə elan edilib. 1992-ci ilin fevral ayının 26-da Xocalı şəhərində törədilmiş insanlığa qarşı cinayətin dünya ictimaiyyətinə çatdırılması; bu cinayətə hüquqi-siyasi və mənəvi qiymətin verilməsi üçün Xocalı soyqırımı ilə bağı həqiqətlərin geniş beynəlxalq ictimaiyyətə çatdırılması və bu sahədə effektiv təşviqatın aparılması məqsədlərini daşıyan kampaniyanın beynəlxalq səviyyədə rəsmi startı bu həftə ərzində dünyanın müxtəlif paytaxtlarında keçiriləcək. Eyni zamanda, təqdimatı keçiriləcək www.yusticeforkhoyaly.org <http://www.yusticeforkhoyaly.org> internet saytı "Xocalıya Ədalət" kampaniyasının virtual aləmdə yayılması və kampaniyanın həyata keçirilməsinin sistemləşdirilməsi məqsədlərini daşıyır və geniş ictimai iştirak üçün nəzərdə tutulub.

DƏ-İKGF-nin katibliyinin yaydığı məlumata görə, son iki gün ərzində kampaniya və onun internet saytının təqdimatı bir sıra ölkələrdə reallaşdırılıb.

Belə ki, 24 fevral tarixində Londonun İmperial Hərbi Muzeyində Britaniya Parlamentinin üzvü Mayk Henkokun, dövlət qurumlarının, o cümlədən Xarici İşlər Nazirliyinin rəsmilərinin, Londonda akkreditə olunmuş səfirliklərin nümayəndələrinin, Qafqaz regionu üzrə ixtisaslaşmış tədqiqat mərkəzlərinin təmsilçilərinin, media nümayəndələrinin və Azərbaycan və Türk icmalarının üzvlərinin iştirakı ilə "Xocalıya Ədalət" beynəlxalq kampaniyasının və kampaniyanın www.yusticeforkhoyaly.org <http://www.yusticeforkhoyaly.org> internet saytının təqdimatı keçirilib. Təqdimatı kampaniyanın Böyük Britaniya üzrə yerli koordinatoru xanım Britt Montimer edib. Elə həmin gün "Xocalıya Ədalət" beynəlxalq kampaniyasının startı çərçivəsində Azərbaycan-Amerika Şurasının təşkilatçılığı ilə ABŞ-ın Hyuston şəhərində kampaniyanın və onun internet saytının təqdimat mərasimi keçirilib. Tədbirdə yerli ictimaiyyət və həmçinin Azərbaycan və Türk diaspor nümayəndələri iştirak edib.

Fevralın 25-də isə Bern şəhərində İsveçrənin Federal hökumətinə məxsus olan "Politforum"da da analoji tədbir keçirilib. Kampaniyanın təqdimatında İsveçrə hökumətinin nümayəndələri, parlament üzvləri, QHT, Berndə akkreditə olunan diplomatik missiyalar və KİV nümayəndələri iştirak edib. Eyni zamanda, tədbirdə Heydər Əliyev Fondu tərəfindən hazırlanmış "War Against Azerbaijan - Targeting Cultural Heritage" ("Azərbaycana qarşı müharibə") adlı kitabın təqdimatı və fond tərəfindən xaricdə yayınlanan fotoşəkillərin sərgisi təşkil olunub. Tədbir zamanı Xocalı haqqında film nümayiş olunub. Tədbir "Xocalıya Ədalət" kampaniyasını dəstəkləyən bəyanatın imzalanması ilə bitib.

Dünən həmçinin Səudiyyə Ərəbistanının aparıcı mətbuat zallarının biri olan "Riyad Palace" da ölkənin ictimai-siyasi dairələri, beynəlxalq təşkilatlar və İslam Konfransı Təşkilatının katibliyinin nümayəndələrinin, Riyadda akkreditə olunmuş nümayəndəlik və səfirliklərin təmsilçilərinin və KİV-lərin iştirakı ilə www.yusticeforkhoyaly.org <http://www.yusticeforkhoyaly.org/> internet saytının təqdimat mərasimi baş tutub. Tədbir çərçivəsində Xocalı faciəsi ilə bağlı fotosərgi təşkil olunub və film nümayiş etdirilib.

HACIYEV K.

Kaspi. -2009. -26 fevral. -S.1, 2.