Strateji səhiyyə kommunikasiyası üzrə təlim kursu yekunlaşıb

Məqsəd Azərbaycanda səhiyyə kommunikasiyası üzrə mütəxəssis hazırlamaqdır

Səhiyyə Nazirliyinin İctimai Səhiyyə və İslahatlar Mərkəzində (İSİM) fevralın 23-dən başlayan "Strateji səhiyyə kommunikasiyası üzrə liderlik" adlı təlim kursu dünən yekunlaşıb. USAİD-in FORCAST layihəsi tərəfindən maliyyələşdirilən və İSİM-in təşkilatçılığı ilə keçirilən təlim kursunun əsas məqsədi Azərbaycanda yeni sahə kimi inkişaf etməyə başlayan səhiyyə kommunikasiyası üzrə mütəxəssislərin hazırlanmasına yönəlib. Bu barədə İSİM-in KİV və İctimaiyyətlə Əlaqələr şöbəsindən məlumat verilib. Mənbədən bildirilib ki, bu təlimlər ABŞ-ın Cons Hopkins Universiteti Blumberq İctimai Səhiyyə Məktəbi Kommunikasiya Proqramları Mərkəzi tərəfindən dünyanın bir çox ölkəsində reallaşdırılıb. Azərbaycanda səhiyyə kommunikasiyası sahəsi ilə bağlı keçirilən təlim də məhz ABŞ-ın Cons Hopkins Universiteti Blumberq İctimai Səhiyyə Məktəbi Kommunikasiya Proqramları Mərkəzinin nümayəndəsi, Dr.Benyamen Lozare tərəfindən həyata keçirilib. Təlimlərdə Azərbaycanda səhiyyə kommunikasiyası sahəsində təcrübəyə malik mütəxəssislər iştirak edib. Təlim prosesində iştirakçılara səhiyyə kommunikasiyası sahəsində dünyada tətbiq edilən yeni metodlar və bu metodların necə tətbiq edilməsi barədə məlumatlar verilib. Eyni zamanda, təlimçi tərəfindən təqdim olunan kompyuter təqdimatlarında dünyada tətbiq edilən praktik təcrübə iştirakçıların diqqətinə çatdırılıb. Azərbaycana dair oxşar məqamlar barədə qarşılıqlı fikir mübadiləsi aparılıb və təlim iştirakçılarının məsələyə yanaşma tərzi ətraflı müzakirə edilib. Bundan başqa, təlimə qatılan iştirakçılar səhiyyə kommunikasiyası sahəsində olan təcrübələri və həyata keçirdikləri layihələr barədə məlumat verərək, təlimçi ilə real həyatda qarşılaşdıqları problemlər barədə müzakirələr aparıblar.

Qurumdan qeyd olunub ki, keçirilmiş təlimlərdə müvafiq dövlət strukturları və qeyri-hökumət təşkilatları ilə yanaşı, beynəlxalq təşkilatların nümayəndələri də iştirak edib.

HƏQİQƏT

Kaspi.- 2009.- 4 mart.- S. 8.