Təbiətin mühafizəsində gənclərin üzərinə böyük vəzifələr düşür

YAP Gənclər Birliyi ekologiya ilə bağlı müsabiqəyə yekun vurub

Dünən Bakı Dövlət Universitetində Yeni Azərbaycan Partiyası (YAP) Gənclər Birliyi və Ekologiya və Təbii Sərvətlər Nazirliyinin (ETSN) birgə təşəbbüsü ilə "Təbii sərvətlərimizə sahib çıxaq, ətraf mühitimizi qoruyaq" adlı çoxşaxəli proqram layihə əsasında keçirilmiş eyniadlı məqalə müsabiqəsinin qaliblərinin mükafatlandırılma mərasimi keçirildi. Tədbiri açan YAP Gənclər Birliyinin sədri Ramil Həsənov bildirdi ki, ətraf mühitin qorunması gənclər qarşısında əsas prioritet kimi durur. "Tədbir ümummilli lider Heydər Əliyevin doğum günü ərəfəsində keçirilir və bu da təsadüfi deyil. Belə ki, ümummilli lider daima ətraf mühitin qorunmasını daim diqqət mərkəzində saxlayıb" - deyə o vurğuladı. Onun sözlərinə görə, ölkə rəhbərliyi Azərbaycanın uğurlu iqtisadi inkişafı ilə yanaşı, insanların sağlamlığı, ekoloji vəziyyətə də xüsusi diqqət ayırır. YAP Gənclər Birliyi ümummilli lider Heydər Əliyevin anadan olmasının 86-cı ildönümü ilə bağlı çoxşaxəli proqram gerçəkləşdirib. Aprelin 15-dən başlayan tədbirlər çərçivəsində tələbə gənclər arasında məqalə müsabiqəsi keçirilib. Gəncə, Lənkəran, Yevlax, Şəki və Quba şəhərlərində gənclər arasında ekoloji tarazlıq, ətraf mühitin qorunması, qlobal istiləşmə kimi mövzularla bağlı treninq kurslar keçirilib.

Tədbirdə çıxış edən BDU-nun prorektoru İsmayıl Vəliyev bildirdi ki, ekologiya inkişafın, istehsalın və insanın özünün yaratdığı problemdir. İstehsal durmadan genişlənir, insanlar sayca artır, yeni sənaye sahələri yaranır və inkişaf edir: "Bir məsələni xüsusi qeyd etmək lazımdır ki, ətraf mühitin mühafizəsi, insanların sağlam təbii mühitdə yaşaması və təbii sərvətlərdən xalqımızın rifahının yaxşılaşdırılması naminə istifadə edilməsi məsələsi ölkə başçısı İlham Əliyevin daim diqqət mərkəzindədir. Dövlətin apardığı sosial-iqtisadi islahat proqramlarında ekoloji vəzifələr xalqımızın sağlamlığının və milli genefondunun qorunması kimi mühüm yer tutur. Hətta həlli vacib olan ekoloji problemlərin əksəriyyətinin aşkar edilməsində prezidentin özünün iştirakı xüsusi əhəmiyyət kəsb edir. Ekologiya sağlam həyat tərzinin tərkib hissəsidir.

Paytaxtda Abşeron hövzəsində təmiz hava problemi xüsusilə aktualdır. Belə ki, həyati əhəmiyyətinə görə bütün canlılar üçün hava birinci yerdə durur". İ.Vəliyev onu da qeyd etdi ki, hazırda bütün dünyada adambaşına 0,9 hektar meşə sahəsi, dünyanın ən yaşıl sahəsi hesab olunan Kanadada adambaşına 9,4 hektar, Rusiyada isə adambaşına 5,2 hektar meşə sahəsi düşür. Azərbaycanda isə bu rəqəm 0,189 hektar təşkil edir. Bakıda isə Bakıda adambaşına 6,4 kv. metr ağac düşür. Bu göstəricinin əhalisinin sayı çox olan paytaxt üçün çox az olduğunu deyən İ.Vəliyev vurğuladı ki, gənclər arasında ekoloji tarazlığı qorumağa xidmət edən layihələrin keçirilməsi vacibdir.

ETSN-nin Xəzər Ekoloji Monitorinq İdarəsinin rəisi Mirsalam Qəmbərov isə bildirdi ki, Azərbaycan ekoloji sahədə 20-yə yaxın beynəlxalq konvensiyaya qoşulub. Gənclərin ekoloji təmizliklə bağlı layihələrini dəstəklədiyini deyən idarə rəisi onları içməli su, bərk tullantıların idarə olunması, meşələrin salınması, paytaxtda ağac əkilməsi kimi tədbirlərdə də yaxından iştiraka çağırıb.

Tədbirdə o da qeyd edildi ki, ölkəmizin əsas ekoloji problemləri - su ehtiyatlarının tullantı suları ilə çirkləndirilməsi, o cümlədən transsərhəd çirklənməyə məruz qalması, yaşayış məntəqələrinin keyfiyyətli su ilə təminatının aşağı səviyyədə olması, şirin suların tələbatçılara çatdırılana qədər itkisinə yol verilməsidir. Eləcə də bura kanalizasiya xətlərinin azlığı, sənaye müəssisələri və nəqliyyat vasitələri tərəfindən atmosfer havasının çirklənməsi, münbit torpaqların deqradasiyaya uğraması, bərk sənaye və məişət tullantılarının, o cümlədən təhlükəli tullantıların tələb olunan səviyyədə idarə olunmaması, biomüxtəlifliyin seyrəkləşməsi və meşə ehtiyatlarının, faunanın, o cümlədən balıq ehtiyatlarının azalması da daxildir.

Sonra çıxış edən Milli Məclisin üzvü Aydın Mirzəzadə isə vurğuladı ki, təbiətə daim diqqət yetirilməlidir. Əks təqdirdə təbiət ona vurulan ziyanı ikiqat insanlara geri qaytarır. Son günlər ölkə rəhbərliyinin təşəbbüsü ilə ağac əkilməsi kampaniyasına başlanıldığını yüksək qiymətləndirən millət vəkili əlavə etdi ki, bunu regionlarda da genişləndirmək gərəkdir.

Milli Məclisin üzvü Fəttah Heydərov isə ümummilli lider Heydər Əliyevin hər zaman təbiətin mühafizəsinə böyük önəm verdiyini və məhz onun təşəbbüsü ilə Ekologiya və Təbii Sərvətlər Nazirliyinin təsis olunduğunu xatırlatdı. Onun sözlərinə görə, təbiətin mühafizəsinin gücləndirilməsində tələbə gənclərin üzərinə böyük vəzifələr düşür. "Bu gün təbiəti qorumasaq, bunun ciddi fəsadları ola bilər" - deyə o vurğuladı.

Tədbirdə çıxış edən digər natiqlər ətraf mühit və cəmiyyət, ekoloji standartlar və iqtisadi maraqlar, gözlənilən qlobal ekoloji böhranlar, ekologiya beynəlxalq münasibətlər sistemində, müasir ekoloji vəziyyət gənc alimlərin gözü ilə, ekologiya və elmi-texniki tərəqqi və digər məsələlər ətrafında fikir mübadiləsi apardılar.

Sonda çıxış edən R.Həsənov "Təbii sərvətlərimizə sahib çıxaq, ətraf mühitimizi qoruyaq" müsabiqəsinə təqdim olunan məqalələrdən söz açdı. Onun sözlərinə görə, müsabiqəyə aprelin 10-dan start verilib. Qısa zaman kəsiyində müsabiqəyə 200-dək məqalə təqdim olunub: "Təqdim olunan məqalələrin böyük əksəriyyəti, təqribən 60 faizi BDU-nun payına düşür". YAP Gənclər Birliyinin sədri onu da qeyd etdi ki, müsabiqəyə təqdim olunan yazıların əksəriyyəti elmi məqalələrdir. Onların içərisində ən layiqlisini seçmək isə Ekologiya və Təbii Sərvətlər Nazirliyinə həvalə edilib. Təqdim olunan məqalələrin yüksək peşəkarlığını nəzərə alan nazirlik həvəsləndirici mükafatların sayını 18-ə çatdırıb. Birinci yer - BDU-nun tələbəsi Məmmədbağır Məmmədzadəyə (500 manat), ikinci yer Qərb universitetinin tələbəsi Tural İsmayılova (300 manat), üçüncü yer isə Xəyyam Muradova (200 manat) verilib. Həvəsləndirici mükafatların sahiblərinə isə 100 manat və diplomlar təqdim olundu. O da qeyd edildi ki, müsabiqəyə təqdim olunan məqalələr kitab şəklində dərc edilib.

Azər NURİYEV

Kaspi.-2009.-6 may.-S.8.