"Partiyaları maliyyə hesabatlarını açıqlamağa çağırıram"

Əli Əhmədovun fikrincə, büdcədən maliyyələşdirmə partiyaların parlamentdə təmsilçiliyi ilə əlaqələndirilməlidir

"Partiyaların dövlət büdcəsindən maliyyələşdirilməsi məsələsi ətrafında ciddi müzakirələr aparılmasına və düzgün qərarlar çıxarılmasına ehtiyac var. İlk növbədə hansı meyarlar əsasında partiyaların maliyyələşdirilməsinə aydınlıq gətirilməlidir. Mütləq şəkildə nəzərə alınmalıdır ki, əsas etibarilə siyasi partiyaların dövlət tərəfindən maliyyələşdirilməsi parlament tipli ölkələrə xasdır. Azərbaycan isə parlament tipli ölkə deyil. Buna baxmayaraq, biz siyasi partiyaların dövlət büdcəsindən maliyyələşdirilməsini təqdirəlayiq hal hesab edirik". Bu fikirləri Yeni Azərbaycan Partiyasının (YAP) sədr müavini və icra katibi Əli Əhmədov Trend-ə müsahibəsində deyib.

O bildirib ki, ən optimal variant kimi parlamentdə təmsilolunma dərəcəsi ilə partiyaların maliyyələşdirilməsi əlaqələndirilməlidir. Çünki digər parametrlərlə partiyaların maliyyələşdirilməsi çox ciddi suallar ortaya çıxaracaq və məsələni xeyli çətinləşdirəcək.

YAP-ın sədr müavini hazırda əksər siyasi partiyaların özlərinin maliyyə mənbələrini gizlətməsinə də toxunub. "İlk növbədə partiyaların bu gün necə maliyyələşdirilməsini araşdırmaq lazımdır" - deyən Ə.Əhmədov xatırladıb ki, hakim partiya hər il maliyyə hesabatını açıqlayır. Azərbaycan ictimaiyyəti YAP-ın hansı maliyyə qaynaqlarına malik olması barədə məlumatlandırılır: "Bizim yeganə maliyyə qaynağımız YAP üzvlərinin ödədiyi partiya üzvlük haqlarıdır. Bu haqlarla partiya bütün xərclərini ödəyir və fəaliyyəti təmin edilir. Biz maliyyə hesabatı verməklə Azərbaycan qanunvericiliyinə kifayət qədər uyğun fəaliyyət göstərdiyimizi nümayiş etdiririk. Bunu yest olaraq yox, borc olaraq edirik. Digər tərəfdən, bunun başqa partiyalar üçün nümunə elementləri var ki, digər partiyalar da cəmiyyətə hansı maliyyə resursları əsasında fəaliyyət göstərdiklərini nümayiş etdirməlidir. Maliyyəsiz partiya fəaliyyət göstərə bilməz, bu, birmənalıdır. Əgər hər hansı bir partiya üzvlərinin könüllülük prinsipi əsasında fəaliyyət göstərdiyini açıqlayırsa, bu bəyanatlar onların özlərinin malik olduğu maliyyə resurslarını gizlətməyə xidmət edir. Ona görə də digər partiyaları maliyyə hesabatlarını açıqlamağa çağırıram".

İcra katibi parlamentdə təmsil olunan müxalifət partiyaları ilə hakim partiya arasında dialoqun başlanacağı haqda səslənən fikirlərə də münasibətini açıqlayıb: "İqtidar-müxalifət dialoqunun başlanması istiqamətində irəliləyişlər əldə olunub. Hesab edirəm ki, dialoq təşəbbüsü irəliləməkdədir, çünki parlamentdə təmsil olunan partiyalar, o cümlədən çoxluq təşkil edən YAP bir neçə müştərək tədbir keçiriblər. Güman edirəm ki, bu tədbirlərin keçirilməsi iqtidar-müxalifət dialoqunun başlanğıcıdır. Dialoq təşəbbüslərinin davam etdirilməsi, Azərbaycanın milli maraqları ilə əlaqədar birgə müzakirələrin təşkil edilməsinin partiyaların yaxınlaşmasına təkan verəcəyinə inanıram. Müştərək tədbirlər dialoq mühitinin möhkəmlənməsinə kömək edəcək". O əlavə edib ki, partiyalar və yaxud ayrı-ayrı tərəflər arasında dialoq ab-havası olmalıdır: "Ancaq bəzən əvvəllər də müşahidə edirdik ki, bütövlükdə dialoqa qeyri-adi hadisə kimi yanaşanlar olurdu. Hesab edirəm ki, dialoqun özü partiyaların müəyyən mövzu ilə bağlı fikir mübadiləsi aparmaq istəyidir və bu istəyə uyğun addımlar atması deməkdir. Dialoqun başlanğıcı kimi partiyaların müştərək tədbirlər keçirməsi yaxşı prosesdir. Çalışmaq lazımdır ki, proses bu prinsiplərə uyğun inkişaf etsin".

Ə.Əhmədov müsahibəsində Dövlət Neft Akademiyasında baş verən hadisəyə də hakim partiyanın mövqeyini açıqlayıb: "Bu hadisə bizim hamımızı sarsıdıb. Tələbələrin qətlə yetirilməsi hər bir valideyn üçün faciədir. Bu hadisənin baş verməsi çox təəssüfləndirici haldır və bunun qarşısını almaq mümkün olmayıb. Görünür, bunu törədən insan elə şəkildə buna hazırlaşıb ki, kiminsə baş verə biləcək faciədən qabaqcadan xəbəri olmayıb. Təəssüf edirəm ki, bu cür hadisələr bütün dünyada baş verir. Ancaq bu fakt bizim cavan insanların qətlə yetirilməsi ilə bağlı yaşadığımız acıları heç də azaltmır. Güman edirəm ki, Azərbaycanın müvafiq orqanları ali təhsil müəssisəsində baş verən qanlı hadisədən nəticələr çıxaracaqlar və təhlükəsizlik tədbirləri daha da gücləndiriləcək. Cəmiyyət üçün insandan qiymətli nemət yoxdur. Dövlətin də bir nömrəli vəzifəsi hər bir ailə və vətəndaşı üçün bu nemətin qorunmasını təmin etməkdir. Mümkündür ki, bu qanlı faciəni törədən psixi xəstə olsun, digər tərəfdən, hadisənin kimlər tərəfindənsə hazırlanması olsun. Bunların hamısını sonda istintaq müəyyənləşdirəcək. İndidən hər hansı fikrin üstündə dayanmaq istintaq getdiyi bir vaxtda düzgün olmazdı. İstənilən halda bu hadisə ölkədə ictimai-siyasi sabitliyin pozulmasına görə törədilibsə, biz bunu da qətiyyətlə pisləyirik. Bu cür çirkin əməllərlə Azərbaycanın ictimai-siyasi sabitliyini pozmaq mümkün deyil".

K.HACIYEV

Kaspi.-2009.-14 may.-S.4.