Milli Məclisin yaz sessiyasının müddəti uzadılacaq 

 

Deputatlar iyunun sonuna kimi işləyəcəklər

 

Milli Məclisin yaz sessiyası artıq başa çatmaq üzrədir. Qanunvericiliyə əsasən, bu ayın sonu deputatlar tətilə çıxmalıdırlar. Əvvəlki sessiyalara nisbətən bu yaz parlamentarilərin daha gərgin işlədiyini iddia etmək olar. Sessiya çərçivəsində deputatlar bələdiyyələrin fəaliyyətinə inzibati nəzarətlə bağlı hesabat dinləyiblər. Bundan əlavə, ombudsman Elmira Süleymanova da deputatlar qarşısında hesabat verib. Deputatlar Nazirlər Kabinetinin, Hesablama Palatasının 2008-ci ilin yekunları ilə bağlı hesabatını da dinləyiblər. Bundan əlavə, yaz sessiyasının iş planında yer alan bir sıra önəmli qanun layihələri və məcəllələr də gözdən keçirilib.

 İndiyədək Milli Məclis çoxdan gözlənilən Tikinti Məcəlləsini birinci oxunuşda qəbul edib. Bu sahə ilə bağlı olan Şəhərsalma Məcəlləsi də həm komitələrdə, həm də plenar iclasda müzakirə olunaraq iki oxunuşdan keçib. Milli Məclis yaz sessiyası dövründə "Xüsusi iqtisadi zonalar haqqında" qanunu da birinci oxunuşda qəbul edib. Parlamentarilər iş planına daxil edilən "İxrac məqsədli neft-qaz fəaliyyətinə xüsusi iqtisadi reyimin tətbiqi haqqında" qanunu da müzakirə ediblər.

Sessiya çərçivəsində iş planına daxil edilməyən bir sıra məsələlərə də baxılıb. Məsələn, "KİV haqqında" və "Televiziya və radio yayımı haqqında" qanunlara bir sıra önəmli dəyişikliklər edilib. Parlament "Dini etiqad azadlığı haqqında" qanuna əlavə və dəyişikliklərlə bağlı geniş müzakirələr aparıb və bu sahədə çoxdandır gözlənilən addımı atıb. Qanuna edilən dəyişikliyə əsasən, ölkədəki dini icmaların hamısı yenidən dövlət qeydiyyatından keçəcəklər. Bununla bağlı İnzibati Xətalar və Cinayət məcəllələrinə də əlavələr edilib.

 Bununla yanaşı, yaz sessiyasının iş planına daxil edilən, lakin hələ müzakirəsi aparılmayan bir sıra qanun layihələri də qalır. Məsələn, ictimaiyyətin maraqla gözlədiyi "Təhsil haqqında" qanun hələ də üçüncü oxunuş müzakirələrinə çıxarılmayıb. Qanunu müzakirəyə hazırlayan parlamentin Elm və təhsil komitəsinin sədri Şəmsəddin Hacıyev və Milli Məclis sədrinin müavini Bahar Muradova qanun layihəsinin müzakirəyə çıxarılması üçün heç bir problem qalmadığını bildirsə də, müzakirələrin vaxtı hələ də təyin edilməyib. Bundan əlavə, "Elm və dövlət elmi-texniki siyasəti haqqında" qanun layihəsi də hələ müzakirəyə təqdim olunmayıb. Əvvəlki sessiyalarda gərgin müzakirələrə səbəb olan və geri qaytarılan "Reproduktiv sağlamlıq və ailə planlaşdırılması haqqında" qanun layihəsindən də bir xəbər yoxdur. Süni mayalandırmanı leqallaşdırmağı nəzərdə tutan bu qanun layihəsində bir sıra ciddi dəyişikliklərin edildiyi bildirilir. Deputatlar yaz sessiyasının sonuna qədər bu layihəni də müzakirə etməlidirlər. Eyni taleyə malik "Məişət zorakılığının qarşısının alınması haqqında" qanun layihəsindən də bir xəbər yoxdur. Bu layihə heç müvafiq komitələrin də müzakirəsinə çıxarılmayıb.

Milli Məclisin Sosial siyasət komitəsi tərəfindən hazırlanan "Bədən tərbiyəsi və idman haqqında" qanun layihəsi də hələ müzakirə üçün hazır deyil. Layihə ilə bağlı komitədə bir neçə dəfə müvafiq strukturların iştirakı ilə müzakirələr aparılıb. Bu günlərdə növbəti müzakirənin Gənclər və İdman Nazirliyində keçirilməsi nəzərdə tutulur.

Qəbulunu gözləyən qanun layihələri sırasında "Könüllülük fəaliyyəti haqqında", "Hərbi qulluqçuların intizam həbsi haqqında", "Həbs yerlərində saxlanılan şübhəli və təqsirləndirilən şəxslərin hüquqlarının və azadlıqlarının təmin edilməsi haqqında" və "Pambıqçılıq haqqında" qanun layihələri də var. Bundan başqa, yaz sessiyası ərzində müzakirəsi daha çox vaxt tələb edən və qəbul edilməsi vacib bir neçə məsələ də var. Buraya "2009-cu ilin dövlət büdcəsinə əlavə və dəyişikliklər haqqında" qanun layihəsi daxildir. Məlumata görə, artıq sənəd mayın 18-də millət vəkillərinə paylanacaq. APA-nın məlumatına görə, bunu nəzərə alan parlament rəhbərliyi yaz sessiyasının müddətini uzatmaq niyyətindədir.

Yaz sessiyası müddətində baxılacaq məsələlərdən biri də İnsan Hüquqları üzrə Müvəkkilin (Ombudsman) təsdiqlənməsi ilə bağlı olacaq. Qeyd edək ki, yaxın günlərdə Azərbaycanın ilk İnsan Hüquqları üzrə müvəkkili Elmira Süleymanovanın səlahiyyət müddəti başa çatır. Parlamentin yaz sessiyasında yeni ombudsman təsdiq edilməlidir.

Yaz sessiyasında müzakirəsi gözlənilən məsələlərdən biri də Dəvəçi rayonunun adının dəyişdirilməsi ilə bağlıdır. Xatırladaq ki, Dəvəçi rayonunun adının dəyişdirilərək Şabran adlandırılması hələ bir neçə ay əvvəl Milli Məclisin Regional məsələlər komitəsində müzakirə edilərək parlamentin plenar iclasına tövsiyə edilsə də, məsələ bu günə qədər gündəliyə daxil edilməyib.

Yaz sessiyası başa çatana kimi isə Milli Məclisin üç iclasının keçirilməsi planlaşdırılır. Məlumata görə, iclaslar mayın 22-si, 26-sı və 29-da keçiriləcək. Yaz sessiyasının sonuncu iclasında parlamentin daxili nizamnaməsinə uyğun olaraq ən azı 53 millət vəkilinin müraciəti ilə sessiyanın müddətinin iyunun sonuna kimi uzadılması nəzərdə tutulur.

 

 

İ.QULİYEV 

 

Kaspi.-2009.-16-18 may.-S.1.