Gövhər Həsənzadə müziklini Avropaya çıxarır

Bəstəkar Şərq elementlərinə üstünlük verib

"Eurovision-2009"-un nəticələrinin Azərbaycanın xeyrinə olmayacağı barədə əvvəllər bir sıra çıxışlar edən bəstəkar Gövhər Həsənzadənin indiki mövqeyi fərqlidir. O, Aysellə Araşın mükəmməl ifasının lazımi səviyyədə qiymətləndirildiyini deyir. Bu arada isə öyrəndik ki, "Eurovision-2008"-də Azərbaycan təmsilçilərinin ifa etdiyi "Day after day" mahnısının müəllifi Gövhər Həsənzadə yeni ideyasını həyata keçirir.

Bəstəkarla söhbətdən sonra aydın oldu ki, o, ötən il ölkəmizi sözügedən müsabiqədə təmsil edən Elnurla Samiri Avropaya təqdim etmək niyyətindədir. Bəstəkar xanım bir müddət əvvəl vəd etdiyi müziklin hazırlıq ərəfəsində olduğunu söylədi və bildirdi ki, onu geniş kütləyə sərgiləmək üçün Avropaya üz tutur: "Müziklin əsas hissələri hazırdır. Çətin prosesləri geridə qoymuşuq. Növbəti gərgin mərhələ isə onu təqdim etməkdən ibarətdir. Amma burada bir məsələ var. Əvvəlcə biz onu geniş orkestrin müşayiəti ilə təqdim etmək niyyətində idik. Lakin sonradan bunun hələlik mümkünsüzlüyünü nəzərə alıb, canlı ifanı əsas mərhələlər üçün saxladıq. Hələlik müzikl texniki formada səsləndiriləcək. Onu da qeyd edim ki, layihəni peşəkar musiqiçilərin ixtiyarına verməzdən əvvəl mətbuat işçilərinə təqdim etməyi düşünürük".

Söhbətdən bəlli oldu ki, musiqili layihədə Samir və Elnurla yanaşı, bir çox müğənninin ifasına yer ayrılıb. Gövhər xanım hələlik Röyanın adını çəkərək onun iştirakının tərəddüdsüz olduğunu söylədi: "Digər müğənnilərin səs imkanları layihə ilə uyğunluq təşkil etməlidir. Bu səbəbdən seçim aparmaq məcburiyyətindəyik. Ola bilsin müğənnilərlə yanaşı, hansısa qrupun iştirakını da nəzərdə tutarıq".

Xatırladaq ki, müzikli yazmaq Gövhər Həsənzadəyə Musiqili Komediya Teatrının rəhbərliyi tərəfindən sifariş olunmuşdu. Bu səbəbdən layihənin öncə teatrda nümayişi vacibdir. Gövhər Həsənzadə dedi ki, hansısa təşkilat müziklin səhnələşdirilməsini öz üzərinə götürsə, təbliğat işində o qurumun təklifləri də nəzərə alınacaq. Lakin bəstəkar ifaçılar arasında dəyişiklik etməyi düşünmür. Çünki müzikli yazanda məhz onların ifasını nəzərə alıb.

Sonda Gövhər xanım bildirdi ki, növbəti çıxışları ilə Samir və Elnur Avropanı yenidən təəccübləndirməyi bacaracaq: "Bəzi ölkələr müziklin məhz onlar üçün səsləndirilməsinin marağındadırlar. Artıq indidən bu tələbatı hiss etməyə başlamışıq. Bu gün Avropanı peşəkar və bir qədər də müasir elementlərlə maraqlandırmaq mümkündür. Müzikli yazarkən bu tələbləri nəzərə almışam. Eyni zamanda, musiqini dinləyən hər bir əcnəbi Şərq elementlərini açıq şəkildə duya biləcək. Biz musiqi gücümüzü onlara göstərməliyik. Çünki avropalıya öz musiqisini göstərmək artıq yenilik hesab olunmur".

S.İBRAHİMOVA

Kaspi.-2009.-21 may.-S.16.