20 Yanvar faciəsinin ildönümü ABŞ Konqresində anılıb

20 Yanvar faciəsinin növbəti ildönümü ABŞ Konqresində anılıb. AzərTAc-ın məlumatına görə, Nümayəndələr Palatasında Azərbaycan məsələləri üzrə işçi qrupunun üzvü, Tennesi ştatının demokrat təmsilçisi Stiv Koen bəyanatla çıxış edib. O vurğulayıb ki, 20 Yanvar tarixi Birləşmiş Ştatlarda hər dörd ildən bir andiçmə günü kimi təntənəli hadisəyə təsadüf etsə də, Azərbaycan xalqı bu günü sovet qoşunları qarşısına çıxaraq azadlıq uğrunda şəhid verdiyi gün kimi yad edir. 1990-cı il yanvarın 20-də Bakıda sovet imperiyasının taleyi həll olunub. S.Koen bildirib ki, keçmiş SSRİ prezidenti Mixail Qorbaçovun fövqəladə vəziyyət haqqında qərarına əsasən, yanvarın 19-dan 20-nə keçən gecə Azərbaycana 26 minlik qoşun yeridilib. Sovet qoşunlarının müdaxiləsi xalqın müstəqillik ruhunu qırmaq məqsədi güdsə də, bu, əksinə, milli mənlik hisslərini daha da alovlandırıb və Sovet İttifaqının dağılmasını sürətləndirib. Həmin hadisələr zamanı "qayda-qanunu bərpa etmək" adı altında sovet əsgərləri 140 nəfəri qətlə yetirib, 700-dən çox adamı yaralayıb, 841 nəfəri həbs edib, 5 nəfər isə itkin düşüb. S.Koen onu da vurğulayıb ki, sovetlər dövründən miras qalan iqtisadi və siyasi problemlərə, eləcə də Ermənistanın Azərbaycan torpaqlarının 20 faizini işğal etməsinə baxmayaraq, Azərbaycan Respublikası müstəqilliyini qoruyub saxlayıb. Bu gün Azərbaycan yüksək iqtisadi artım göstəriciləri nümayiş etdirən, çiçəklənən dövlətdir. Bunun səbəbləri isə azad şəkildə seçilən prezident və parlament, eneryi sektorunun aparıcı rol oynadığı bazar iqtisadiyyatı islahatları, ən əsası, Azərbaycan ərazisində xarici qoşunların yerləşdirilməməsidir.

Qeyd edək ki, qanlı Yanvar hadisələrinin 19-cu ildönümü ABŞ-da fəaliyyət göstərən diaspor təşkilatları tərəfindən də geniş qeyd edilməkdədir. ABŞ Azərbaycanlıları Şəbəkəsi yaydığı bəyanatda faciə qurbanlarının xatirəsini bir dəqiqəlik sükutla yad etməyə çağırıb. Vaşinqtondakı Azərbaycan Ticarət və Mədəniyyət Mərkəzi isə Azərbaycan səfirliyi ilə birgə təşkil etdiyi toplantıda amerikalı auditoriya qarşısında Qanlı Yanvar gecəsini Lider Televiziyasının istehsalı olan "Qara Yanvara aparan yol" sənədli filmi vasitəsilə canlandırıb.

K.HACIYEV

Kaspi.- 2009.- 22 yanvar.- S. 4.