Konstitusiya Məhkəmələrinin Dünya Forumu keçirilib

Konstitusiya Məhkəməsinin sədri Fərhad Abdullayevin başçılıq etdiyi nümayəndə heyəti Keyptaun şəhərində Avropa Şurası Venesiya Komissiyası ilə Cənubi Afrika Respublikasının Konstitusiya Məhkəməsinin birgə təşkil etdiyi "Konstitusiya ədalət mühakiməsinin cəmiyyətin inkişafına təsiri" mövzusunda Konstitusiya Məhkəmələrinin Dünya Forumunda iştirak edib. Bu barədə Konstitusiya Məhkəməsinin mətbuat xidməti məlumat yayıb. Məlumatda bildirilir ki, tədbirin təntənəli açılışında Cənubi Afrika Respublikasının prezidenti Kalema Motlante çıxış edərək, Konstitusiya nəzarəti orqanlarını sıx əməkdaşlığa dəvət edib, beynəlxalq forumun işinə uğurlar arzulayıb.

Forumda xarici konstitusiya nəzarəti orqanları qərarlarının milli konstitusiya məhkəmələrinin fəaliyyətində tətbiqi, İnsan Hüquqları üzrə Avropa Məhkəməsinin təcrübəsinin konstitusiya məhkəmələrinin qərarlarında öz əksini tapması, Konstitusiya məhkəmələrində baxılan fərdi şikayətlərlə bağlı müzakirələr və fıkir mübadiləsi aparılıb.

Forumun yekununda Bəyannamə qəbul edilib. Bəyannamədə deyilir ki, ölkə konstitusiyalarında təsbit edilmiş dəyərlərin müdafıəsində Konstitusiya məhkəmələri xüsusi rol oynayır. Dünya Forumunda dinlənilmiş məruzələr və aparılmış müzakirələr onu göstərir ki, bəzi konstitusiya-hüquq xüsusiyyətlərinə baxmayaraq, konstitusiya nəzarəti orqanları insan hüquq və azadlıqlarının qorunması məqsədi ilə bu sahədə beynəlxalq əməkdaşlıq həyata keçirirlər. Bu əməkdaşlıq çərçivəsində Konstitusiya Məhkəməsinin hakimləri oxşar işlərə baxarkən öz xarici həmkarlarının təcrübəsini ümumiləşdirərək müvafıq məhkəmə praktikasını tətbiq edirlər. Məhz bu məqsədlə milli məhkəmələr arasında məlumat mübadiləsinin daha da genişləndirilməsi məqsədəuyğun hesab olunur.

K.Hacıyev

Kaspi.- 2009.- 29 yanvar.- S. 3.