Gürcüstan ermənilərin "dərs"ini verir

Tbilisi məhkəməsi iki separatçının həbsinə dair qərar çıxarıb

Ermənistanla Gürcüstan arasında "casus qalmaqalı" güclənməkdədir. Cavaxetiyada separatizm yaymaqla məşğul olan ermənilərin həbslərinə Yerevanın reaksiya verməməsi erməni deputatlarını, radikal mətbuatı və müxtəlif QHT-ləri özündən çıxarıb. Onlar Ermənistan rəhbərliyini Gürcüstanın Cavaxetiyada "etnik zorakılıq" siyasəti aparmasına biganə yanaşdığını iddia edirlər. Elə dünən də erməniləri özündən çıxaran bir hadisə yaşanıb. Tbilisi məhkəməsi Cavaxetiyanın erməni icmasının fəalları - Qriqor Minasyan və Sergey Akopcanyan barəsində iki aylıq həbs qərarı çıxarıb. Onlar qanunsuz hərbi birləşmələr yaratmaqda və casusluqda günahkar biliniblər.

Ədalət məhkəməsi Ermənistanda və Cavaxetiyada fəaliyyət göstərən erməni təşkilatlarının, eləcə də Ermənistan parlamentinin bir sıra üzvlərinin sərt bəyanatlarına məhəl qoymamaq qərarına gəlib.

Xatırladaq ki, həbs olunanlar Gürcüstan Daxili İşlər Nazirliyinin Əks-kəşfiyyat Departamentinin əməkdaşları tərəfindən yanvarın 22-də saxlanılıblar. İstintaq onların qeyri-qanuni hərbi birləşmə yaratmaları və hazırlamaları, eləcə də casusluqla məşğul olduqlarını sübuta yetirib. Axalkalakidə fəaliyyət göstərən Erməni Gənclər Mərkəzinin binasında axtarış aparan polis mərkəzdən bəzi kompyüterləri götürüb. Tutulanların separatizmlə məşğul olduqları da müəyyən edilib. Q.Minasyan Axalkalakidəki Erməni Gənclər Mərkəzinin direktoru, Akopcanyan isə "Şarl Aznavur" xeyriyyə təşkilatının prezidentidir. Hər iki şəxsin evində və iş yerində də axtarışlar aparılıb və bəzi əşyalar müsadirə edilib.

Ermənilər məhkəmə qərarını öz çirkin maraqlarını həyata keçirmək üçün əlverişli fürsət kimi qarşılayıblar. Onlar bunu Gürcüstan hökumətinin digər xalqlara qarşı hücumu kimi qələmə veriblər. Beynəlxalq təşkilatlara müraciət edən erməni təşkilatları rəsmi Tbilisini beynəlxalq hüquq normalarını pozmaqda günahlandırıblar.

Yerevanın özündə də baş verən bu insidentə sərt reaksiya verilib. Yerli mətbuatda Cavaxetiya ermənilərinə qarşı repressiya siyasəti aparıldığı barədə silsilə məqalələrin ardı-arası kəsilmir. Ermənistan parlamentinin deputatı Şirak Torosyan isə ölkə rəhbərliyi qarşısında Cavaxetiya ermənilərinin problemini erməni-gürcü münasibətlərində bir nömrəli məsələ kimi qoymağı tələb edib. O, ötən gün keçirdiyi mətbuat konfransında rəsmi Yerevanın məsələsini ən yüksək səviyyədə qaldırmasını istəyib. "Mitk" (Fikir) analitik mərkəzinin eksperti Vale Sarkisyan "Nezavisimaya qazeta"ya bildirib ki, Minasyanın yeganə günahı həbsinə qədər Tbilisidəki Surb Nşan kilsəsində uşaqlarını və qohumlarını xaç suyuna salması olub: "Həmin kilsəyə isə Gürcüstan hökuməti iddia edir".

Gürcüstan Daxili İşlər Nazirliyindən "NQ"nin əməkdaşına isə bildirilib ki, Cavaxetiyada 50-yə yaxın QHT fəaliyyət göstərir və onların böyük bir qismi mütəmadi olaraq hakimiyyətin ünvanına yersiz ittihamlar səsləndirməklə məşğuldur: "Onların fəaliyyəti gürcü torpaqlarının Rusiya tərəfindən işğalına yönəlib. Məhkəmə qərar çıxarıb və onların cinayəti artıq sübuta yetirilib".

Erməni icmasının nüfuzlu şəxslərindən hesab edilən "Vrastan" (Gürcüstan) qəzetinin baş redaktoru Van Bayburt hələ ki, gözləmə mövqeyində durmağa üstünlük verdiklərini vurğulayıb: "Bizə dedilər ki, həbs olunan şəxslərlə bağlı xeyli sübut var. Telefon danışıqları ələ keçirilib, eləcə də hər iki şəxsin müəyyən hərəkətləri təxribatçılıq xarakteri daşıyıb". Onun sözlərinə görə, regionda vəziyyət həqiqətən də ağırdır. "Xalq çox ağır vəziyyətdə yaşayır və müəyyən qüvvələr qayığı çalxalamaq siyasəti aparır" - deyə baş redaktor vurğulayıb. Erməni icmasının nümayəndəsinin sonrakı fikirləri bu qüvvələrin kimliyinə aydınlıq gətirir. Onun qənaətincə, Rusiya qoşunları buradan çıxandan sonra vilayət əhalisinin vəziyyəti xeyli ağırlaşıb. Rusiya qoşunları burada olanda isə əhalinin daimi dolanışıq yeri olub. Beləliklə, vilayətdə separatçı əhval-ruhiyyənin genişlənməsində Rusiyanın əli olduğu aydınlaşır. Bayburtun ardınca, erməni icmasının liderlərindən olan "Çoxmillətli Gürcüstan" ümumvətəndaş hərəkatının rəhbəri Arnold Stepanyan da soydaşlarının dövlət çevrilişi cəhdi ilə həbs olunmasını "qurama" adlandırıb.

Lakin Gürcüstan rəhbərliyi həbslər üçün çox ciddi əsas olduğunu bəyan edib. Bu ölkənin reinteqrasiya məsələləri üzrə naziri Temuri Yakobaşvili vurğulayıb ki, ittiham maddələri çox ciddidir: "O ki qaldı Ermənistan tərəfindən səslənən sərt bəyanatlara, onlar ya Cavaxetiyada vəziyyəti anlamayan şəxslər kateqoriyasına aiddirlər, ya da siyasi avantüristlərdən başqa bir şey deyillər. Ailədən mütləq bir nankor çıxmalıdır. Əminəm ki, Ermənistan rəhbərliyi və xalqına həbs olunan ermənilərin kimə işlədiyini başa düşmək üçün əql yetəcək".

Xatırladaq ki, dörd rayondan ibarət Samtsxe-Cavaxetiyada 240 min əhali yaşayır, onların 50 faizinin ermənilərdən ibarət olduğu bildirilir. Dörd rayondan ikisində isə ermənilər əhalinin 90 faizini təşkil edir. Ermənistana birləşmək arzusu ilə alışıb-yanan ermənilər dəfələrlə separatçı çıxışlar ediblər.

Azər Nuriyev

Kaspi.- 2009.- 30 yanvar.- S. 5.