“...Sinəmdə dastan gəldim”

Zəlimxan Yaqubun 60 illik yubileyi yüksək səviyyədə qeyd olundu

Açılışı özü elədi... Belə də olmalı idi. Zəlimxanı Zəlimxan qədər kim bilə bilər ki?! Ötən şənbə şairin Heydər Əliyev Sarayında keçirilən 60 illik yubiley tədbirinin elə açılışındanca hiss olundu ki, bu gecə yalnızca Zəlimxan Yaquba həsr olunmayacaq, özü demiş, Dədə Yunusdan Dədə Şəmşirəcən bütün nurani-pirani sənətkarların anım-xatirə gecəsi olacaq.

Böyük ehtiram və hörmətlə yad olunanların arasında ulu öndər Heydər Əliyev də vardı. Düz 12 il əvvəl, hələ şairin 48 yaşı tamam olanda elə bu sarayda keçirilmiş gecədə Heydər Əliyev də iştirak etmişdi. Bütün istedadlı insanlar kimi Zəlimxan Yaquba da həmişə yüksək qiymət verən, qayğı göstərən ümummilli lider...

Əslində, yubiley tədbiri foyedə təşkil olunmuş sərgidən başlayırdı. Sərgidə Z.Yaqubun müxtəlif ölkələrdə, müxtəlif dillərdə çap olunan kitabları, eyni zamanda, şairdən bəhs edən maraqlı nəşr nümunələri nümayiş olunurdu. Bir müəllif üçün kifayət qədər böyük sayıla biləcək bu stend Zəlimxan müəllim haqda yetərincə məlumat verirdi. Onun təkcə quzeyli-güneyli Azərbaycanın deyil, bütün türk dünyasının sevimli şairi olduğunu açıqca göstərirdi. Mədəniyyət və Turizm Nazirliyinin keçirdiyi yubiley tədbirinin proqramı olduqca maraqlı tərtib olunmuşdu. Aşıqlar Birliyinin sədri, “Şərəf” və “Şöhrət” ordenli Xalq şairi Zəlimxan Yaqubun ürəkdolusu giriş nitqindən sonra ona həsr olunan sənədli filmdən fraqmentlər göstərildi. Ardınca da, təbii ki, saz!

İlk çıxış Ədalət Dəlidağlının oldu - “Ruhani”! Sazın beşiyində - ulu Borçalıda doğulub boya-başa çatan şair seçimində haqlı idi. Ədalət Dəlidağlı, yalan olmasın, böyük adaşından fərqlənməyən bir ifa nümayiş etdirdi. “Ruhani”nin insanın ruhuna, bəli məhz ruhuna ilahi bir sakitlik gətirən bənzərsiz melodiyaları könülləri asanlıqla fəth eləyib tamamilə dolmuş zalı öz sehrinə sala bildi. Bu ifa özündən sonrakı çıxışların da yaxşı olacağına zəmanət verirdi sanki...

“Dünya Ahıska Türkləri” cəmiyyətinin prezidenti Ziyəddin İsmixanlının Osmanlı və Azərbaycan türkcəsini doğma bir şirinliklə özündə birləşdirən çıxışı da maraqlı oldu, onun şair üçün gətirdiyi hədiyyə də! Ziyəddin bəy Zəlimxan Yaquba Ahıska xanlarının xəz geyimini və papağını hədiyyə etdi... Şair uzun əbanı səhnədəcə əyninə geyib bir anlıq da olsa, xan duyğusunu yaşadı da!

Şirvan məktəbinin tanınmış nümayəndələrindən biri, Aşıq Ağamuradın “Sarıköynək” havacatı üzərindəki çıxışı ifaçının gözəl, təmiz səsi, muğam-havacat qarışıq gözəl zəngulələri ilə yadda qaldı.

Əməkdar artist Könül Xasıyevanın ifasının ardınca cənublu gənc şair Məhəmməd İbadi səhnəyə çıxdı. Məhəmməd bəyin çıxışını dinləmək kifayət idi ki, Zəlimxan Yaqub yaradıcılığının güneyli qardaşlarımıza, orada yazıb-yaradan qələm adamlarına necə təsir etdiyini anlayasan. Gənc şair ürəkdolusu Təbriz havası gətirmişdi Heydər Əliyev Sarayına. Çıxışı da sürəkli alqışlarla müşayiət olundu. Təbriz aşıqları Çingiz Mehtipur və Məhbub Xəlilinin çıxışı isə tamaşaçıları Təbriz, Borçalı, Göyçə, Dərbənd, Ərdəbil, Xoy deyin Azərbaycanı el-el, oba-oba gəzdirdi. Çingizin ustad çalğısı və Məhbubun bu çalğını mükəmməlcəsinə tamamlayan ifası onları çoxdan tanıyan dinləyiciləri bir daha heyrətləndirdi. Güneyli sənətkarlar şairə daha bir sürpriz də etdilər: şairin iri çərçivəyə alınmış portretini ona bağışladılar!

İrəvan Dövlət Azərbaycan Dram Teatrının şairin eyniadlı poeması əsasında hazırladığı “Göyçə dərdi” səhnəciyi də yaddaqalan çıxışlardan oldu. Xüsusilə, sazın müşayiətində Dədə Ələsgərin məşhur “Dağlar” şeirindən asta səslə oxunan iki bənd könüllərin sarı siminə toxundu.

Tədbir Z.Yaqubun digər poema və şeirlərindən nümunələrin ifası, tanınmış elm və sənət adamlarının çıxışı ilə davam etdirildi.

Yubiley tədbirində Baş nazirin müavini Elçin Əfəndiyev, Prezident Administrasiyasının Humanitar siyasət məsələləri şöbəsinin müdiri Fatma Abdullazadə, Milli Məclisin deputatları, tanınmış elm və mədəniyyət xadimləri, poeziya vurğunları, Türkiyə, İran, Qırğızıstan, Gürcüstan və digər ölkələrdən gələn qonaqlar iştirak edirdilər.

Vüsal

Mədəniyyət.- 2010.- 21 aprel.- S. 6.