Azərbaycanda yəhudilərin tarixi və mədəniyyəti

“İRS-Naslediye” jurnalının son sayında bu barədə geniş yazı dərc olunub

Moskvada nəşr edilən “İRS-Naslediye” beynəlxalq jurnalının növbəti sayında ənənəvi olaraq Qarabağ probleminə böyük yer ayrılıb. “Azərbaycan diplomatiyası və Qarabağ: Kürəkçay müqaviləsindən bolşevik işğalına qədər” sərlövhəli məqalədə 1805-ci ildən sonrakı proseslərdən, Azərbaycan ərazisində ermənilərin məskunlaşdırılmasından bəhs edilir.

Jurnalın bu nömrəsində sovet dövründə Azərbaycanda memarlıq və şəhərsalma mövzusunda materiallar, Azərbaycan miniatür sənətinin formalaşması və inkişafına həsr edilmiş növbəti məqalə yer alıb. Bu dəfə Təbriz miniatür məktəbinin yaranması və onun ilk işləri barədə söhbət açılır.

“İRS-Naslediye” jurnalının bir rubrikası isə Azərbaycanda ta qədimdən yaşayan milli azlıqlara həsr edilib. Jurnalın bu nömrəsində Azərbaycan yəhudiləri, onların köçürülməsi, ənənələri, zəngin və bənzərsiz mədəniyyəti barədə geniş material təqdim olunub. Məqalənin müəllifləri Sergey Vaynşteyn və German Zaxaryayev qeyd edirlər ki, Cənubi Qafqazda, indiki Azərbaycan və Cənubi Dağıstan ərazisində yəhudilər erkən orta əsrlər dövründə məskunlaşıblar. Bunu arxeoloji artefaktlar da təsdiq edir. Məqalədə mötəbər arxiv materiallarına əsaslanaraq qeyd edilir ki, Quba xanlığının hökmdarları Azərbaycanın bütün torpaqlarında yaşayan yəhudiləri bu xanlığın ərazisinə köçməyə dəvət ediblər. Qeyd edilir ki, yəhudilər burada özlərini həmişə rahat hiss edib və çoxmillətli etnomədəni Azərbaycan cəmiyyətinin tərkib hissəsi olublar.

Jurnalın axırıncı sayında “Balet Azərbaycan milli mədəniyyətinin layiqli tərkib hissəsidir”, “Xoşbəxtliyin rəngləri” və digər məqalələr də diqqəti cəlb edir. “Azərbaycan əcnəbilərin gözü ilə” adlı yeni rubrikada isə oxucular Azərbaycanın qonaqlarının ölkəmiz haqqında təəssüratları, onların yol qeydləri, fotoreportajları ilə tanış ola bilərlər.

Mədəniyyət.-2010.-15 dekabr.-S.14.