Mədəniyyət fədaisi

Qocaman mədəniyyət xadimi, ziyalı Vaqif Əhməd oğlu Kərimov 1940-cı il dekabrın 8-də Şəki şəhərində anadan olub. Uşaq ikən incəsənətə böyük həvəs göstərib. Əvvəlcə rayon pionerlər evində İbad Salmanovun rəhbərlik etdiyi tar dərnəyində, təhsil aldığı şəhər 10 saylı orta məktəbin dram dərnəyində sənətin ilk sirlərini öyrənib. Əməkdar artist Məmmədkəbir Hacıoğlunun rəhbərlik etdiyi rayon Mədəniyyət evinin dram dərnəyində həvəskar aktyor kimi çalışıb.

1958-ci ildə orta təhsilini başa vuraraq Şəki ipək kombinatında əmək fəaliyyətinə başlayıb. 1958-1960-cı illərdə kombinatın həmkarlar klubunda görkəmli xanəndə və aktyor Yunis Qarabağlının rəhbərlik etdiyi «İpəkçi» xalq çalğı alətləri ansamblında tar ifaçısı, həmçinin həvəskar aktyor kimi çıxış edib. 1960-1965-ci illərdə M.A.Əliyev adına Azərbaycan Dövlət Teatr İnstitutunun mədəni-maarif fakültəsində oxuyub, görkəmli incəsənət xadimləri Mehdi Məmmədov, Əjdər Sultanov, Şəfiqə Axundova, Kərim Kərimov, Rahib Hüseynov, Adilə İsmayılova, Müxlis Cənizadə kimi sənətkarlardan dərs alıb.

1965-ci ildə ali təhsilini başa vuraraq təyinatla Şəki şəhər Mədəniyyət şöbəsində Xalq Teatrının rejissoru kimi əmək fəaliyyətini davam etdirib. Teatra V.Kərimovun rejissorluğu ilə S.S.Axundovun «Laçın yuvası», S.Qədirzadənin «Şirinbala bal yığır», Y.Əzimzadənin «Anacan», Ş.Qurbanovun «Olmadı elə, oldu belə», M.Atəşin «Günəşi söndürmək olmaz» əsərləri uğurla tamaşaya qoyulub. V.Kərimov 1966-1970-ci illərdə M.Füzuli adına Şəki şəhər mədəniyyət və istirahət parkının direktoru işləyib. Daha sonra, 1971-1975-ci illərdə rayon Mədəniyyət evinin bədii rəhbəri vəzifəsində çalışıb. Həmin illərdə V.Kərimovun təşəbbüsü ilə «Zirvə» vokal-instrumental və «Səbuhi» xalq çalğı alətləri ansamblları təşkil olunub. 1972-ci ildə Şəkidə Novruz bayramının keçirilməsində böyük zəhməti olub.

1975-ci ildə Şəkidə S.Rəhman adına Dövlət Dram Teatrı fəaliyyətə başlayıb. V.Kərimov teatrda Quruluş hissə müdiri vəzifəsinə təyin olunub. Onun təşəbbüsü ilə Dövlət Teatr İnstitutunun aktyorluq fakültəsini bitirmiş bir qrup gənc Şəki teatrında işləməyə gəlib.

Onu da qeyd edək ki, V.Kərimov müxtəlif illərdə bir neçə bədii filmdə də (“Arxadan vurulan zərbə» (“Azərbaycanfilm”), «Təyyarə yerə enmədi» (“Özbəkfilm”), «Amfibiya adam» (“Lenfilm”) epizodik rollarda çəkilib. Görkəmli aktyorlar İsmayıl Dağıstanlı, Nəsibə Zeynalova, Yusif Vəliyev, Lütfəli Abdullayev, Səyavuş Aslan, Sədayə Mustafayeva, Məmməd Burcəliyev və başqaları ilə tərəf-müqabil olub.

V.Kərimov 1978-ci ildə M.F.Axundov adına şəhər Mədəniyyət evinə direktor təyin edilib. Həmin il «Zirvə» vokal-instrumental ansamblı Moskvada SSRİ Xalq Təsərrüfatının Nailiyyətləri Sərgisində baxış-müsabiqədə uğurla çıxış edərək qızıl medala layiq görülüb. «Zirvə» vokal-instrumental və «Səbuhi» xalq çalğı alətləri ansamblı dəfələrlə Moskvada ümumittifaq və Bakıda respublika əhəmiyyətli tədbirlərdə uğurla çıxış edib. Məhsul, əmək və incəsənət bayramları, kənd günləri, gülüş bayramı kimi mədəni-kütləvi tədbirlər həmin illərdən xatirədir. 1978-ci ildən başlayaraq hər il rayon Mədəniyyət evində bədii özfəaliyyət kollektivlərinə «Novruz təranələri» devizi altında baxış müsabiqəsi keçirilir. Müxtəlif illərdə həmin baxış-müsabiqələrində çıxış edən ifaçılar (Könül Xasıyeva, Gülyaz və Gülyanaq Məmmədovalar, Əbülfət Nəzərli, Nüşabə Ələsgərli və s.) sonradan tanınmış sənətçilər kimi populyarlıq qazanıblar.

Azərbaycan müstəqillik qazanandan sonra da Şəkinin mədəniyyət kollektivləri respublika və beynəlxalq əhəmiyyətli tədbirlərin fəal iştirakçısı olub. «Zorxana» xalq rəqs ansamblı 1995-ci ildə Türkiyənin Bursa şəhərində keçirilən Beynəlxalq folklor festivalında, «Zirvə» ansamblı və «Ailə-sirk» pəhləvan kollektivi 1996-cı ildə Türkiyənin Eşme şəhərində keçirilən Beynəlxalq Sənət və Kilim Festivalında uğurla çıxış edib. «Zirvə» ansamblı 2007-ci ildə Rostov vilayətində MDB ölkələrinin Dostluq Festivalında respublikamızı təmsil edib.

2007-ci ildə Heydər Əliyev Fondu, Mədəniyyət və Turizm Nazirliyi və Azərbaycan Televiziyasının birgə təşkilatçılığı ilə zona üzrə muğam müsabiqəsinin keçirilməsində V.Kərimov da təşkilatı bacarığını əsirgəməyib. 2006-2010-cu illərdə Şəkidə keçirilən «İpək bayramı», «Sənətkarlar günü», «Şəki qədim sivilizasiyalar diyarı», «Kulinariya bayramı», «İpək yolu» Beynəlxalq musiqi festivalı, «Milli nəfəs alətləri bayramı», hər il Şəkidə keçirilən milli atüstü oyunların təşkilində V.Kərimov yaxından iştirak edir.

Hazırda Şəkidəki mərkəzi Mədəniyyət evi tərəfindən 70 klub müəssisəsinə metodiki rəhbərlik göstərilir. Mədəniyyət evində 4 xalq kollektivi (xalq teatrı, «zorxana» xalq rəqs ansamblı, «Zirvə» vokal-instrumental ansamblı), «Səbuhi» xalq çalğı alətləri ansamblı Ə. Şəkili adına zurnaçılar ansamblı, Ə.Abdullayev adına muğam üçlüyü fəaliyyət göstərir.

V.Kərimov həmçinin Mədəniyyət İşçiləri Müstəqil Həmkarlar İttifaqı Respublika Komitəsinin nəzdində fəaliyyət göstərən “Ulduz və Rübab” mədəni əlaqələr mərkəzinin komissiya üzvü kimi müntəzəm olaraq cəbhə bölgələrində, Şəkidə və qonşu rayonlarda yerləşən hərbi hissələrdə müxtəlif mədəni-kütləvi tədbirlərin təşkilində iştirak edir.

Qocaman mədəniyyət işçisinin əməyi yüksək qiymətləndirilib. O, dəfələrlə SSRİ Mədəniyyət Nazirliyinin, Azərbaycan SSR Mədəniyyət Nazirliyinin, Azərbaycan Mədəniyyət və Turizm Nazirliyinin, Şəki şəhər İcra Aparatının diplom, fəxri fərman, pul mükafatları ilə təltif olunub. Azərbaycan Televiziyası ASC-nin “Telefilm” Yaradıcılıq Birliyi tərəfindən 2004-cü ildə V.Kərimova həsr olunmuş “Yaxşı adam” filmi çəkilib. Ömrünün 50 ilini sevdiyi peşəsinə həsr edən, son 30 ildə Şəkidə keçirilən respublika əhəmiyyətli bütün tədbirlərin təşkilində yaxından iştirak edən V.Kərimovu Şəkidə mədəniyyətin canlı ensiklopediyası adlandırırlar.

Qocaman mədəniyyət işçisi bu yaxınlarda 70 illik yubileyi münasibətilə Mədəniyyət və Turizm Nazirliyinin fəxri fərmanı və pul mükafatı ilə təltif olunub.

Firudin Zamanov,

əmək veteranı

Mədəniyyət.- 2010.- 22 dekabr.- S. 15.