“Rus muzeyi: virtual filial”

İnformasiya-maarifləndirici mərkəzin muzey tədris proqramının təqdimatı keçirildi

Dekabrın 21-də Muzey Mərkəzində Mədəniyyət və Turizm Nazirliyi və UNESCO-nun Moskva bürosunun təşkilatçılığı ilə “Rus muzeyi: virtual filial” informasiya-maarifləndirici mərkəzinin məktəblilər və tələbələr üçün muzey-tədris proqramının təqdimatı keçirildi.

Mərasimdə Mədəniyyət və Turizm Nazirliyinin nümayəndələri, Rusiyanın Azərbaycandakı səfirliyinin əməkdaşları, muzey direktorları və işçiləri, Mədəniyyət və İncəsənət, Bakı Slavyan, Qərb universitetlərinin, Bakı Avropa liseyinin və digər təhsil müəssisələrinin, o cümlədən mədəniyyət və təhsillə bağlı ictimai və dövlət təşkilatlarının nümayəndələri, media mənsubları iştirak edirdi.

Mərasimi açan Mədəniyyət və Turizm Nazirliyinin Mədəniyyət siyasəti şöbəsinin müdiri Fikrət Babayev “Rus muzeyi: virtual filial” layihəsinin Bakının mədəni həyatında əlamətdar hadisə olduğunu vurğuladı: «2008-ci ildə UNESCO-nun Moskva bürosunun və Azərbaycan Mədəniyyət və Turizm Nazirliyinin birgə təşkilatçılığı ilə Bakı şəhərində Muzey Mərkəzinin bazasında “Rus muzeyi: virtual filial” informasiya-maarifləndirici mərkəzi açıldı. Bakı Rus muzeyinin virtual filialının fəaliyyətə başladığı ilk xarici ölkə paytaxtı oldu. Bu əhəmiyyətli hadisə Azərbaycanda rus mədəniyyətinə və incəsənətinə olan marağın daha da artmasına, iki ölkə arasında mədəni əlaqələr dairəsinin genişlənməsinə böyük təsir göstərdi”.

F.Babayevin sözlərinə görə, “Rus muzeyi: virtual filial”ın inkişafına dair layihənin növbəti mərhələsi 2009-cu ildə UNESCO-nun Moskva bürosunun dəstəyi ilə Mədəniyyət və Turizm Nazirliyinin Muzey Mərkəzinin veb-səhifəsinin yaradılması oldu. Veb-səhifə Azərbaycan, ingilis və rus dillərində həm Rusiya, həm də Azərbaycan mədəniyyətini dünyaya təqdim edir: “UNESCO-nun Moskva bürosu və təşkilatın Azərbaycan Milli Komissiyası son bir neçə il ərzində “Rus muzeyi: virtual filial” informasiya-maarifləndirici mərkəzində informasiya-kommunikasiya texnologiyalarının inkişafı və istifadəsinə əvəzsiz maddi və mənəvi dəstək göstəriblər ki, bu layihə də ona bir nümunədir».

Nazirlik rəsmisi son illər ölkədə muzey işinə göstərilən diqqətdən də bəhs etdi. Bildirdi ki, son illər prezident tərəfindən verilmiş sərəncamlar buna bariz nümunədir: 2007-ci ildə prezident İlham Əliyev tərəfindən «Azərbaycanda muzey işinin yaxşılaşdırılması haqqında» sərəncam imzalandı. Bunun ardınca bir neçə belə fərmanlar verildi. Son vaxtlar Bakı şəhərində bir sıra muzeylər, Etnoqrafiya, İstiqlal, Müasir İncəsənət muzeyləri yaradılıb ki, bu da respublikamızda muzey işinə əlavə töhfədir. Hazırda Xalça Muzeyinin inşası davam edir, R.Mustafayev adına İncəsənət Muzeyinin digər korpusu təmir olunmaqdadır».

Azərbaycan muzeylərinin beynəlxalq əməkdaşlığından söz açan F.Babayev buna misal da gətirdi: «Muzeylərimiz London, Fransa, Norveç muzeyləri ilə əməkdaşlıq edir. Bir sıra birgə layihələr həyata keçirmək üçün razılıqlar əldə olunub. Bütün bunlar Azərbaycanda muzey işinin genişləndirilməsində əhəmiyyətli işlərdir».

UNESCO üzrə Azərbaycan Milli Komissiyasının məsul katibi Gunay Əfəndiyeva belə bir tədbirin keçirilməsinin Azərbaycanın Mədəniyyətlərarası dialoqda fəal rol oynamasına bir nümunə olduğunu diqqətə çatdırdı: «Bu il BMT tərəfindən «Beynəlxalq Mədəniyyətlərin Yaxınlaşması İli» elan olunub. Bu tədbir də məlum il çərçivəsində keçirilir və azərbaycanlıların digər xalqların mədəniyyətinə münasibətini göstərir».

Sonra “Rus muzeyi: virtual filial” informasiya-maarifləndirici mərkəzinin məktəblilər və tələbələr üçün muzey-tədris proqramının ekranda nümayişi keçirildi. Nümayişdən sonra Rusiyanın Azərbaycandakı səfiri Vladimir Doroxin saytın yaradılmasında əməyi olan bütün insanlara təşəkkürünü bildirdi.

Mehparə

Mədəniyyət.- 2010.- 22 dekabr.- S. 4.