«Kitabxanaya uşaqların cəlbi: Mütaliə haqqında düşüncələr»

Respublika Uşaq Kitabxanasında bu mövzuya həsr olunmuş konfrans keçirildi

F.Köçərli adına Respublika Uşaq Kitabxanasında keçirilən «Kitabxanaya uşaqların cəlbi: Mütaliə haqqında düşüncələr» adlı konfransda «Uşaqların mütaliəsi: informasiya cəmiyyəti», «Mütaliə müasir dövrdə», «Mütaliəyə cəlbetmənin yeni formaları» mövzuları diqqətə alındı.

Tədbiri giriş sözü ilə kitabxananın direktor müavini Zahirə Dadaşova açdı: «Dünyada əsas möcüzələrdən biri kitabdır. Böyük mütəfəkkirlər kitab haqqında çox yüksək fikirlər səsləndiriblər. Bu gün dünyada gedən qloballaşma prosesində bütün ölkələr mədəniyyətlərini qoruyurlar. Kitabxana da mədəniyyətin ayrılmaz hissəsidir. Əvvəllər informasiya üçün daha çox kitabxanaya müraciət edirdilər. Son dövrlər telekanallar, internet bu marağı azaldıb».

Z.Dadaşova onu da bildirdi ki, uşaqların kitablardan uzaqlaşmasında onların günahı yoxdur: «Bu məsələdə əsas məsuliyyət valideynlərin və müəllimlərin üzərinə düşür. Valideyni bütün günü teleseriala baxan uşaq kitabı necə sevsin?».

Kitabxananın məlumat-biblioqrafiya şöbəsinin müdiri Sevil Əhmədova isə mütaliənin əhəmiyyətindən danışdı: «Bu gün həyatımızda internetin nə dərəcədə rol oynamasından asılı olmayaraq, mütaliədə əsas rolu kitab oynayır. Kitab mədəni və tarixi irsi özündə saxlayır. Azərbaycan dövləti kitabxanalara diqqət ayırır. Bu yaxınlarda “Tarix-keçmişdən gələcəyə» adlı kitab sərgisi keçirdik. İkinci dəfə isə metodiki vəsaitlərin sərgisini açdıq. Müəllimlər həmin vəsaitlərlə çox maraqlandılar, sürətlərini çıxardılar».

Tədbirdə daha sonra «Bilmək istəyirik» adlı sorğunun nəticələri açıqlandı. Sorğu nəticəsində məlum olub ki, oxucuların əksəriyyəti bədii ədəbiyyata maraq göstərirlər. Bununla yanaşı oxucular hansı bədii əsərləri sevdiklərini və hansı qəhrəmanlara bənzəmək istədiklərini də bildiriblər. Bununla yanaşı «Oxucu və kitabxana» mövzusunda 13 kitabxanada 128 oxucu arasında sorğu da keçirilib.

Gülər

Mədəniyyət.- 2010.- 29 dekabr.- S. 13.