Azərbaycanda kulinariya təhsili yoxdur

Tahir Əmiraslanov: «Təhsil proqramları Azərbaycana gələrsə, kulinariya sahəsində çox böyük nailiyyətlər əldə edə bilərik»

Dünən Azərbaycan Milli Kulinariya Mərkəzinin baş direktoru, AMKA-nın prezidenti Tahir Əmiraslanov mətbuat konfransı keçirdi. Çilinin Santiyaqo şəhərində baş tutan Ümumdünya Kulinariya Konqresində iştirakı ilə bağlı mətbuat nümayəndələrini məlumatlandıran T.Əmiraslanov bildirdi ki, konqresdə bir sıra məsələlərə toxunulub, o cümlədən dünya kulinariya sahəsində təhsilin inkişafı məsələsi müzakirə olunub.

Mərkəz direktorunun dediyinə görə, sonuncu iki konqresdə təhsil məsələləri Dünya Kulinariya Təşkilatları Birliyində ön plana çəkilib: «Bu ən ümdə məsələlərdən biri hesab olunur. Çünki 2020-ci ildə təkcə Amerikada turizmin və restoran biznesinin inkişafı ilə əlaqədar 20 min mütəxəssis çatışmayacaq. Avropa ölkələrində və Rusiyada da özünü göstərən bu çatışmazlıq hazırda Azərbaycanda da hiss edilir. Restoranlarda daha çox evdar qadınlardan aşpaz kimi istifadə olunması peşəkarların azlığı ilə bağlıdır. Bundan əlavə, dünyada olan bir çox təhsil proqramları Dünya Kulinariya Təşkilatları Birliyinin təhsil proqramlarına uyğun olmalıdır ki, aşpazların dərəcələri tanınsın. Konqresdə Azərbaycanın töhfələrindən danışıldı, amma bir şeyi da qeyd etdilər ki, ölkəmizdə fəaliyyət göstərən kulinariya təşkilatlarının nəzdində təhsil sistemləri olmadığı üçün Dünya Kulinariya Təşkilatları Birliyi öz proqramlarını burada həyata keçirə bilmir. Başqa ölkələrdə onların nəzdində bir sıra akademiyalar, kolleclər, liseylər fəaliyyət göstərir».

T.Əmiraslanov qeyd etdi ki, 1991-ci ildən Nazirlər Kabinetinin belə məktəblərin yaradılması haqqında qərarı olsa da, bu məsələ hələ də həllini tapmayıb. Onun sözlərinə görə, təhsil proqramları Azərbaycana gələrsə, kulinariya sahəsində çox böyük nailiyyətlər əldə edə bilərik.

«Müzakirə edilən ikinci əsas məsələ modifikasiya edilmiş ərzaqlar haqda oldu» deyən baş kulinar bildirdi ki, konqresdə xüsusilə vurğulanıb ki, kulinarların, restoran-biznes sahiblərinin, mütəxəssislərin bu ərzaqlara qarşı çıxması vacibdir.

Bundan başqa, tədbirdə Koreyada 2012-ci ildə keçiriləcək hesabat-seçki konqresinin təqdimatı olub. Bu barədə danışan T.Əmiraslanov 2014-cü ildə konqresin keçiriləcəyi yer uğrunda Türkiyə Cümhuriyyəti və Norveçin mübarizə apardığını dedi: "Norveçdən bu tədbirdə iştirak etmək üçün 30-dan çox nümayəndə gəlmişdi. Onlar 600 nəfər konqres iştirakçısının arasında təbliğat aparırdılar. Nəticədə 2014-ci ildə Dünya Kulinariya Konqresinin Norveçin Stavanger şəhərində keçirilməsinə qərar verildi. Türkiyə isə bu mübarizədə az səslə uduzdu».

Konqresdə Ümumdünya Kulinariya Təşkilatları Birliyinə (ÜKTB-yə) yeni üzvlər seçilib. Bunların içərisində Səudiyyə Ərəbistanı, Pakistan və Bosniya-Hersoqovina kimi müsəlman dövlətləri də var və beləliklə, ÜKTB-nin 92 üzvü olub.

Sonda T.Əmiraslanov bir xəbəri də mətbuat nümayəndələrinin diqqətinə çatdırdı ki, konqresin sonuncu günü gözləmədiyi halda ona ÜKTB-nin fəxri üzvü medalını təqdim ediblər.

Baş kulinar bildirdi ki, konqresdə digər məsələlər də müzakirə edilib və növbəti 2 il üçün tədbirlər planı tutulub.

Mətbuat konfransının sonunda T.Əmiraslanov Milli Kulinariya Mərkəzi və Azərbaycan Milli Kulinariya Assosiasiyasının bəyanatını jurnalistlərə təqdim etdi. Bəyanat ATV telekanalında yayımlanan “Yağ kimi” verilişi ilə bağlı ölkə əhalisi və Azərbaycanda çalışan peşəkar yerli və xarici ölkələrin aşpazları tərəfindən onlara edilən müraciətlərlə bağlı qəbul edilib. Bəyanatda bildirilir:

«Azərbaycan teleməkanında “mətbəx”, “xörəkbişirmə” ilə bağlı göstərilən heç bir verilişlə AMKM-in (hökumət təşkilatı) və AMKA-nın (qeyri-hökumət təşkilatı) əlaqəsi yoxdur. Peşəkar təşkilat kimi bu verilişlərin əksəriyyətini zərərli və istehlakçıların doğru-düzgün informasiya almaq hüquqlarının pozulması kimi dəyərləndiririk. ATV kanalının “Yağ kimi” verilişində göstərilənlərlə, reklam edilən qida məhsulları ilə, burada çıxış edən aşpazlarla Azərbaycan Milli Kulinariya Mərkəzinin və Milli Kulinariya Assosiasiyasının əlaqəsi yoxdur. Nə AMKM, nə AMKA bu verilişlərin hazırlanmasında heç bir səviyyədə iştirak etməyib. Azərbaycanın peşəkar təşkilatları olan AMKM və AMKA burada peşəkar adlandırılan «aşpazlar» və onların çalışdıqları restoranlarla əlaqəli deyil. Qəti şəkildə bildiririk ki, bu «aşpazlar» və onların çalışdıqları restoranlar AMKA-nın üzvü deyil».

Fəxriyyə ABDULLAYEVA

Mədəniyyət.- 2010.- 5 fevral.- S. 7.