Firəngiz Əlizadə: “Festival çox uğurlu keçdi”

Ötən həftə Şəkidə keçirilən “İpək yolu” I Beynəlxalq Musiqi Festivalı ölkəmizin mədəni həyatında mühüm hadisə kimi yadda qaldı. Bəstəkarlar İttifaqının sədri Firəngiz Əlizadə festivalın yekunları ilə bağlı fikirlərini bildirib:

-Hər bir işin başlanğıcı çox çətin olur. Mənə elə gəlir ki, ilk dəfə keçirilməsinə baxmayaraq, I Beynəlxalq Musiqi Festivalı çox uğurlu keçdi, maraqlı və rəngarəng proqramı ilə yadda qalacaq. Burada təbii ki, Şəki Şəhər İcra Hakimiyyətinin yüksək təşkilatçılığını, yerli musiqi kollektivlərinin fəal iştirakını xüsusi qeyd etmək lazımdır. Festivalın proqramı rəngarəng idi. Burada müxtəlif kollektivlərin çıxışı, muğam operasından başlamış ustad dərsinə qədər hər şey var idi. Belə festivallar çox nadir hallarda keçirilir. Ona görə ki, adətən festivallar müəyyən növlərə aid olur. Məsələn, pianoçular festivalı, müasir musiqi festivalı, klassik musiqi festivalı və sair. “İpək yolu” festivalı isə bu növlərin hamısını sanki özündə cəmləşdirmişdi. Bu konsertləri izləyən insanlar hər gün yeni bir şey kəşf edirdilər. Bir gün kamera orkestrini dinlədilər, ertəsi gün xalq çalğı alətləri orkestrinin çıxışını izlədilər, həmçinin çox gözəl rəqslərə baxdılar. Biz həm də Azərbaycan xalqının zəngin musiqisinin, zəngin mədəniyyətinin canlı şahidi olduq.

Festivalda bir sıra ölkələrin nümayəndələri çıxış etdilər. Koreyadan gəlmiş ansamblın təqdim etdiyi 25 dəqiqəlik kompozisiyada biz sanki dərvişlərin ritminə qulaq asdıq. Kiş kəndindəki qədim alban məbədində “Sarı gəlin” Norveç-Azərbaycan ansamblı çox maraqlı proqramla çıxış etdi. Burada sanki paralel inkişaf edən iki musiqi mədəniyyəti gözlərimiz önündə bir-biri ilə qovuşdu. Festivalın kulminasiya nöqtəsi isə, şübhəsiz ki, ilk dəfə açıq havada muğam operaları əsasında hazırlanmış tamaşa-kompozisiyaların təqdimatı oldu.

Mənə elə gəlir ki, çox gözəl festival oldu və Şəki camaatı da festivala böyük maraq göstərdi. Festivalda Koreya, Norveç və Rusiyanın səfirləri də iştirak ediblər. Bu, festivala olan böyük maraqdan irəli gəlirdi. Bir sözlə, festival gözlədiyimiz nəticələri verib.

Mədəniyyət.- 2010.- 7 iyul.- S. 11.