Dövlət Film Fondu Belarus Kino-Foto Sənədlər Arxivi ilə müqavilə imzalayıb

Azərbaycan Dövlət Film Fondu Belarus Kino-Foto Sənədlər Arxivi ilə əməkdaşlıq haqqında müqavilə imzalayıb. Dövlət Film Fondunun rəhbəri, Əməkdar incəsənət xadimi Cəmil Quliyev bildirib ki, bununla əlaqədar fondun əməkdaşları iyulun 8-dən 11-dək Belarus Kino-Foto Sənədlər Arxivində olublar.

C. Quliyev deyib ki, müqaviləyə əsasən hər iki arxiv filmlərin qorunub saxlanılması sahəsində əməkdaşlıq edəcək, eyni zamanda Azərbaycan və Belarusla bağlı sənədlərin araşdırılması və üzə çıxarılması sahəsində iş aparacaq. Belarus arxivi artıq Dövlət Film Fonduna Azərbaycan haqqında kinofilmlərin və fotomaterialların siyahılarını təqdim edib. Bu siyahının tez bir zamanda mətbuatda dərc olunması nəzərdə tutulur. Həmin sənədlər Azərbaycanın görkəmli incəsənət, mədəniyyət xadimlərinin Belarusdakı fəaliyyəti ilə əlaqəlidir.

Mədəniyyət.- 2010.- 14 iyul.- S. 5.