Milli Kitabxana dünya elektron kitabxanasında təmsil olunacaq

M.F.Axundzadə adına Azərbaycan Milli Kitabxanası Dünya Elektron Kitabxanasında təmsil olunmaq hüququ qazanıb. Milli Kitabxanadan bildiriblər ki, artıq dünya oxucuları Azərbaycan həqiqətləri, ölkəmizin tarixi, mədəniyyəti, coğrafiyası, iqtisadiyyatı və digər sahələri haqqında istənilən məlumatı geniş və dolğun şəkildə əldə edə biləcəklər.

Dünya Elektron Kitabxanası ideyası 2009-cu ildə yaranıb. Bununla bağlı təklif kitabxanaçıların beynəlxalq toplantısında ABŞ-ın Konqres, Misirin İsgəndəriyyə və Braziliyanın milli kitabxanası tərəfindən irəli sürülüb. Cari ildə Vaşinqtonda layihənin təqdimat mərasimi keçirilib və 64 ölkə ilə yanaşı, Azərbaycan da Dünya Elektron Kitabxanasında təmsil olunmaq hüququ qazanıb.

Məlumatlar Dünya Elektron Kitabxanasında 7 dildə yerləşdiriləcək. Hazırda Milli Kitabxananın elektron resursların yaradılması şöbəsi kitabxanaya daxil olan yeni materiallar, oxucular tərəfindən daha çox tələbat duyulan ədəbiyyatın siyahısı əsasında iş aparır. Həmçinin Azərbaycan milli mətbuatının analitik-elektron məlumat bazası yaradılır. Köhnə qəzet və jurnalların elektron versiyası da hazırlanır.

Artıq “Əkinçi”, “Sədayi-həqq” qəzetlərinin, “Füyuzat” və “Babayi-Əmir” jurnallarının elektron versiyaları tam hazırdır. Milli Kitabxananın elektron informasiya xidməti və kitabxanalararası abonement şöbəsində isə 1993-2010-cu illərdə çap olunmuş bütün ədəbiyyat nümunələri kataloqlarda yerləşdirilib.

Mədəniyyət.- 2010.- 16 iyul.- S. 8.