Milli mətbuatımızın yubileyi Tbilisidə qeyd olunub

Azərbaycanın Gürcüstandakı səfirliyi Heydər Əliyev Fondunun dəstəyi ilə İ.Cavaxişvili adına Tbilisi Dövlət Universitetində (TDU) yaradılmış “Azərbaycanın dostları klubu”nun auditoriyasında milli mətbuatımızın 135 illiyinə həsr olunmuş tədbir keçirib.

Tədbiri səfir Namiq Əliyev açaraq Azərbaycan milli mətbuatının yaranma tarixi barədə iştirakçılara ətraflı məlumat verib. Diplomat ictimai rəyin formalaşdırılmasında mətbuatın rolundan, ümummilli liderimiz Heydər Əliyevin milli mətbuata, jurnalistikaya qayğısından, Prezident İlham Əliyevin demokratik dəyərlərə söykənərək ölkədə söz azadlığının qorunmasında, KİV-lərə dövlət dəstəyinin gücləndirilməsində ulu öndərin ideyalarına sadiqlik nümayiş etdirdiyini vurğulayıb. Səfir Prezident İlham Əliyevin Azərbaycan milli mətbuatının 135 illik yubileyi münasibətilə xüsusi Sərəncam imzalamasını bu sadiqliyin əyani təzahürü kimi qiymətləndirib.

Namiq Əliyev Azərbaycan və Gürcüstan jurnalistlərini ölkələrimiz arasında münasibətləri obyektiv işıqlandırmağa, jurnalistin hüququ kimi, vəzifəsini də unutmamağa çağırıb.

İ.Cavaxişvili adına TDU-nun rektoru Georgi Xubua jurnalistləri təbrik edib, onlara Azərbaycanın haqq işinin dünya ictimaiyyətinə çatdırılmasında uğurlar arzulayıb. Rektor TDU-da azərbaycanlı tələbələrin sayının getdikcə artdığını diqqətə çatdırıb, bu il 200 azərbaycanlı abituriyentin TDU-ya qəbul imtahanı verdiyini bildirib və Gürcüstan-Azərbaycan münasibətlərinin yeni mərhələsində jurnalistlərin də xüsusi xidməti olduğunu vurğulayıb.

Gürcüstan parlamentinin deputatı Ramin Bayramov jurnalistlərə peşə fəaliyyətində uğurlar diləyib.

Tədbirin sonunda səfir Namiq Əliyev və TDU-nun rektoru Georgi Xubua Azərbaycanın kütləvi informasiya vasitələrinin Gürcüstandakı nümayəndələrinə hədiyyələr təqdim ediblər.

Mədəniyyət.- 2010.- 23 iyul.- S. 8.