Dağlıq Qarabağın azərbaycanlı icması mədəni layihələr həyata keçirəcək

Azərbaycanın əzəli torpağı olan Qarabağ bölgəsi zəngin tarix və mədəniyyəti ilə dünya miqyasında tanınır. Ermənistanın Azərbaycan torpaqlarını işğal etməsi bölgənin azərbaycanlı əhalisini yurd-yuvalarından didərgin salmaqla bərabər, bu torpaqlardakı mədəni irsimizə də ağır zərbə vurub, tarixi abidələr talan edilib. Bu baxımdan Qarabağdakı Azərbaycan mədəni irsinin dünyada daha geniş şəkildə tanıdılması, Ermənistanın işğalçı siyasətinin mədəniyyətimizə vurduğu zərərin miqyasını beynəlxalq birliyə çatdırılması qarşıda duran ümdə vəzifələrdəndir. Bu mühüm işə Dağlıq Qarabağın azərbaycanlı icması da öz töhfəsini verir.

Ötən ilin iyununda Dağlıq Qarabağın Azərbaycanlı İcması İctimai Birliyinin təsis qurultayının keçirilməsindən sonra qurum bu sahədə bir sıra tədbirlər həyata keçirib. Son bir ildə icma tərəfindən bir sıra tədbirlər keçirilib, Azərbaycan mədəniyyəti, onun ayrılmaz bölgəsi olan Dağlıq Qarabağ bölgəsinin folklor və mədəniyyətinin tanıdılması üçün yeni nəşrlər çap edilib. 2009-cu ilin dekabrında Berlində “Dağlıq Qarabağ - Azərbaycanın mədəniyyət beşiyi” adlı elmi-mədəni simpozium keçirilib. “Dağlıq Qarabağ” -“Berg Karabach” adlı fotosərgidə Dağlıq Qarabağın tarixi-mədəni abidələri, Qarabağ xalçaları, Qafqazın konservatotiyası və mədəniyyət beşiyi olan Şuşanın tarixi, bu şəhərdə doğulmuş mədəniyyət və incəsənət xadimlərindən bəhs edən fotoşəkillər təqdim edilib. Bu il mayın 8-də Milli Kitabxanada Azərbaycan Respublikası Dağlıq Qarabağ Bölgəsinin Azərbaycanlı İcması İctimai Birliyinin sifarişi ilə “Turanfilm”də çəkilmiş “Şuşa” filminin təqdimat mərasimi keçirilib.

Bu yaxınlarda (6 iyul) Bakıda Dağlıq Qarabağ bölgəsinin azərbaycanlı icmasının mərkəzi qərargahının açılması icmanın fəaliyyətini genişləndirməsi üçün əlavə imkanlar yaradıb. Açılış mərasimimdə iştirak edən Prezident İlham Əliyev icmanın fəaliyyəti ilə bağlı tövsiyələrini verib. İcmanın mərkəzi qərargahında fəaliyyət üçün hərtərəfli şərait yaradılıb. Dövlətin bu diqqət və qayğısı müqabilində Dağlıq Qarabağın azərbaycanlı icması da yeni fəaliyyət istiqamətləri, o cümlədən mədəni layihələri həyata keçirmək niyyətindədir. Bakıda Şuşa Mədəniyyət Mərkəzinin yaradılması ilə bağlı da müzakirələr aparılmaqdadır.

Bununla yanaşı, ölkə ərazisində keçirilən festivallarda, mədəniyyət tədbirlərində Dağlıq Qarabağın azərbaycanlı icmasının mədəniyyət xadimləri yüksək səviyyədə çıxış edirlər. Heydər Əliyev Fondunun təşəbbüsü ilə bu günlərdə Qəbələdə keçirilən II Beynəlxalq Musiqi Festivalında Bakı Musiqi Akademiyasının rektoru, Xalq artisti, Dağlıq Qarabağın Azərbaycanlı İcması İctimai Birliyinin İdarə Heyətinin üzvü Fərhad Bədəlbəylinin ifasında “Şuşa”, bəstəkar, Əməkdar incəsənət xadimi Rauf Əliyevin “Şuşanın dağları başı dumanlı” əsərləri festival iştirakçıları tərəfindən alqışlarla qarşılanıb. Dağlıq Qarabağın azərbaycanlı icması adından musiqiçilərə gül çələngi təqdim olunub.

Mədəniyyət.- 2010.- 30 iyul.- S. 4.