Zamiq Əliyevin 60 illik yubileyi qeyd olunub

Mayın 31-də Beynəlxalq Muğam Mərkəzində Xalq artisti, tarzən Zamiq Əliyevin 60 illiyinə həsr olunmuş tədbir keçirildi. Musiqili gecə Zamiq Əliyevin 40 illik yaradıcılığına həsr edilmiş videomaterialın nümayişilə başlanıb.

Tədbirdə çıxış edən Xalq şairi, Aşıqlar Birliyinin sədri Zəlimxan Yaqub Zamiq Əliyevin həyat və fəaliyyəti barədə ətraflı məlumat verdi, onun müasir dövrümüzdə tanınan, sevilən, ən fəal ictimai xadim səviyyəsində olan bir tarzən olduğunu vurğuladı. Daha sonra çıxış edən akademik Vasim Məmmədəliyev Zamiq Əliyevin Azərbaycan tar ifaçılıq məktəbinin gözəl nümayəndələrindən biri olduğunu qeyd etdi: “Zamiq istər bizim muğamlarımızı, istərsə də bəstəkar mahnılarını, xalq mahnılarını çox gözəl ifa edir”.

Tədbirdə Bəstəkarlar İttifaqının sədri Firəngiz Əlizadə, xalq artistləri, görkəmli xanəndə Arif Babayev, kaman ustası Habil Əliyev və başqa sənət, elm adamları Zamiq Əliyevi təbrik etdilər. Xanəndələr Elnarə Abdullayeva, Simarə İmanova, Aygün Bayramova, Güllü Muradova və başqaları öz ifaları ilə səbəbkarı təbrik etdilər. Tədbirdə tamaşaçılara Zamiq Əliyevin 60 yaşı münasibətilə çapdan çıxmış “Şəxsiyyət” adlı jurnal hədiyyə olundu. Jurnalda Zamiq Əliyevin həyat və yaradıcılığı haqqında məlumat verilir. Həmçinin sənətkarın yaxın dost və tanışlarının Zamiq Əliyev haqqında fikirləri yer alıb.

Nuray

Mədəniyyət.- 2010.- 2 iyun.- S. 4.