Puşkinin anadan olmasının 211-ci ildönümü Bakıda qeyd edildi

İyunun 4-də klassik rus ədəbiyyatının banisi Aleksandr Sergeyeviç Puşkinin (1799-1837) anadan olmasının 211-ci ildönümü ilə əlaqədar Rusiyanın Azərbaycandakı səfirliyi, Səbail Rayon İcra Hakimiyyəti və «Sodrujestvo» cəmiyyətinin birgə təşkilatçılığı ilə şairin Bakıdakı abidəsi önündə mərasim keçirildi.

Azərbaycanda fəaliyyət göstərən müxtəlif xalqların mədəniyyət mərkəzlərinin, tanınmış mədəniyyət və incəsənət xadimlərinin iştirakı ilə keçirilən tədbiri giriş sözü ilə «Sodrujestvo» cəmiyyətinin sədri Tatyana Kərimova açaraq belə bir tədbirin keçirilməsinin Azərbaycan və Rusiya arasında mədəni əlaqələrin güclənməsində böyük rolu olduğunu vurğuladı.

Rusiyanın Azərbaycandakı səfiri Vladimir Doroxin böyük mütəfəkkir, yazıçı-dramaturq M.F. Axundovun Puşkinin ölümünə həsr olunmuş “Şərq poeması”nıdan bir parça oxudu. 10 il əvvəl Bakıda Puşkinin heykəlinin uçaldıldığını deyən səfir Azərbaycanda Puşkinin yaradıcılığının yüksək qiymətləndirildiyini vurğuladı.

Yazıçı Çingiz Abdullayev çıxışında şairlərin ölmədiyini, onların əbədi olaraq səmada qaldığını söylədi: “Çünki şairlərin şöhrəti sərhədsizdir”.

Səbail RİH başçısının birinci müavini Xalidə Bayramova iki ölkə arasında mədəni əlaqələrdən danışaraq Puşkinin təkcə rus xalqı tərəfindən deyil, dünyanın bütün xalqları tərəfindən sevildiyini, onun bir çox əsərlərinin Azərbaycan dilinə də tərcümə olunduğunu dedi.

Tədbirdə Səbail rayon orta məktəblərinin şagirdlərinin ifasında şairin şeirləri Azərbaycan və rus dillərində səsləndi.

Bir məsələni də qeyd edək ki, BMT-nin İctimai İnformasiya Departamenti təşkilatda istifadə olunan 6 rəsmi dilin (ingilis, ərəb, çin, rus, ispan və fransız) təbilğ olunması məqsədilə “BMT-də Dillər Günü” təşəbbüsünü irəli sürüb. Puşkinin doğum günü (6 iyun) həm də BMT-nin xəttilə dünyada «Rus dili günü» kimi qeyd olunur.

Mehparə

Mədəniyyət.- 2010.- 9 iyun.- S. 15.