Danışır «Qobustan» radiosu...

Krım vilayətinin Sevastopol şəhərində Azərbaycan dilində bir radio yayımlanır. “Qobustan“ adlanan bu radio on iki ildir ki, öz efirindən milli adət-ənənələrimiz, tanınmış ziyalılarımız, mədəniyyətimiz, incəsənətimiz, həmçinin erməni terror təşkilatlarının Azərbaycanda törətdikləri vandal aktları barədə yerli əhaliyə ətraflı məlumatlar verir. Radio musiqimizi də yaddan çıxarmır, onun dalğalarından daim klassik əsərlərimiz eşidilir. Öz proqramlarını getdikcə zənginləşdirən və rəngarəng mövzulara yer verən «Qobustan»ın bugünlərdə 150-ci verilişi dinləyicilərə təqdim edilib.

Radionun qurucusu və redaktoru Həbib Əliyev 1988-ci il hadisələrindən sonra Ukraynaya getmək və orada ölkəmizin başına gətirilən müsibətlər haqqında yerli camaata məlumat vermək qərarına gəlib: «Azərbaycan həqiqətlərinin dünyaya olduğu kimi çatdırılması üçün ana dilimizdə “Qobustan” radiosunun yaradılması çox əhəmiyyətli idi. Çünki mən 1996-cı ildə Krıma gedəndə orada erməni dilində yayımlanan bir verilişi dinlədim. Mənfur qonşularımız Sumqayıt hadisələrinin fonunda Azərbaycan xalqını vəhşi və terrorçu kimi təqdim edirdilər. Bundan sonra mən ermənilərin dediklərinin əksini sübut edəcək faktları toplayıb radionun baş redaktoru Natalya Pavlovna ilə görüşdüm. O, məni dinlədikdən sonra ermənilərin həmin verilişinin lent yazısına yenidən qulaq asdı. N.Pavlovna dediklərimin həqiqət olduğunu görəndən sonra o verilişi hazırlayan erməniləri çağırıb, bir də belə hal təkrarlansa, onları işdən qovacağını bildirdi. Söhbət əsnasında mən ondan Azərbaycan dilində veriliş açmağa kömək etməsini xahiş etdim. Razılaşdıq. O, mənə dedi ki, siyasətin ən böyüyü mədəniyyətin təbliğidir. Sən mədəniyyəti ön plana çək. Bununla xalqının böyüklüyünü sübut edəcəksən. Beləliklə, «Qobustan» radiosunun ilk verilişi 1997-ci ilin martın 15-də efirə getdi».

Həbib Əliyevin dediyinə görə, ilk vaxtlar verilişləri hazırlamaq onun üçün çox çətin olub: «Çünki Rusiyada, Ukraynada, Avropa ölkələrində bu işlər üçün maliyyə fondu indi də yoxdur. Halbuki, bütün xalqların diasporu və fondu var. Bizim diasporumuz var, mədəniyyətimizi təbliğ etmək üçün imkanlarımız var, amma fondumuz yoxdur».

H.Əliyevin verilişləri yerli əhali tərəfindən böyük rəğbətlə qarşılanır. Krım vilayətində Sevastopol ermənilərin ən çox yaşadıqları şəhərdir. Təbii ki, Azərbaycan dilində səsləndirilən radio verilişləri onları qıcıqlandırmalı idi. Elə də olur. Ermənilər «Qobustan» radiosunun efir vaxtının ləğv edilməsi üçün ciddi səy göstərirlər və 1998-ci ildə buna nail olurlar. Müsahibimizin dediklərindən: «Sevastopol şəhər merinin milli məsələlər üzrə müavininin həyat yoldaşı erməni idi. O, radionun rəhbərliyinə zəng edib demişdi ki, guya mən öz verilişlərimdə milli məsələləri qızışdırıram, islamçılığı təbliğ edirəm və s. Amma mən mədəniyyətdən ayrı heç bir söhbətə yer verməmişdim. Ona görə də ruhdan düşmədim. Böyük çətinliklə teleradionun direktoru, Ukraynanın əməkdar jurnalisti İvan Vasilyeviçlə görüşdüm. Ona bildirdim ki, «Qobustan» radiosu Azərbaycan və Ukrayna xalqlarının bir-birini anlaması üçün bir vasitədir. Əgər efir vaxtım bərpa edilməsə, hər iki ölkənin prezidentinə teleqram vuracam. İ.Vasilyeviç mənə kömək edəcəyini dedi və məsləhət gördü ki, onun ünvanına vətəndaşların adından verilişin bağlanmasına etiraz məktubları gətirim. Belə də etdim. İ.Vasilyeviç həmin məktubları götürüb şəhər merinin yanına getdi. Mer belə olan halda verilişin bağlanmasının səbəbini soruşub. Direktor da məsələni ona danışıb. Verilişlərin məzmunu ilə tanış olduqdan sonra mer müavinini işdən qovdu. Bundan sonra «Qobustan»ın yayımı bərpa edildi».

O gündən fasiləsiz olaraq fəaliyyət göstərdiklərini bildirən H.Əliyev deyir ki, ilk gündən qarşılarına vəzifə kimi qoyduqları əsas məsələ tariximizi, milli-mənəvi dəyərlərimizi, adət-ənənələrimizi, mədəniyyətimizi, incəsənətimizi təbliğ etmək, ölkəmiz haqqında reallıqları yerli əhaliyə çatdırmaqdan ibarətdir. «Qobustan» radiosu həm də siyasi mövzuda verilişlər yayımlayır: «Ölkəmizin başına gətirilmiş müsibətlərdən, Ermənistan silahlı qüvvələrinin Azərbaycana qarşı işğalçılıq siyasəti yeritməsindən, torpaqlarımızın 20 faizini işğal etməsindən, bunun nəticəsində də bir milyondan artıq soydaşımızın öz ata-baba torpaqlarından didərgin salınmasından da verilişlər hazırlayıb efirdə səsləndirirəm. Verilişlərimiz yerli əhali tərəfindən böyük rəğbətlə qarşılanır. Getdikcə daha rəngarəng proqramlar hazırlayırıq. Efirimiz bir qayda olaraq, həmişə «Koroğlu» operasının uvertürası ilə başlanır. Milli adət-ənənələrimiz, ziyalılarımız haqqında məlumatlar səsləndirdikcə yerli əhali daha ermənilərin yalanlarına inanmır, bizimlə sıx əməkdaşlıq edir».

F.ABDULLAYEVA

Mədəniyyət.- 2010.- 12 mart. - S. 14.