Rənglərin həkimi

1985-ci ildə Şuşada anadan olmuş gənc rəssam Fərid Rəsulovun ilk sənəti həkimlik olub. Özünün dediyinə görə, bu sahədə 7 il təhsil almasına və 4 illik çalışmasına baxmayaraq incəsənətə marağı daha böyük olub. Gənc rəssam bu vaxtadək “Alüminium” beynəlxalq müasir incəsənət sərgisində (Bakı, 2007), “Steps of time”, Almaniyada “Azərbaycan Mədəniyyəti günləri” çərçivəsində müasir incəsənət sərgisi (Drezden, 2008), 53-cü Venesiya Biennalesi, Azərbaycan pavilyonu (Venesiya, 2009) və başqa beynəlxalq sərgilərdə iştirak edib. Bu yaxında Bakıda Kiçik Qala “Art Gallery”də “Şeylər” adlı sərgisi keçirilən Fərid Rəsulovla görüşdük, söhbətləşdik.

- Rəssamlığa olan maraq və istək necə yarandı?

- Tibb Universitetini qırmızı diplomla bitirmişəm. Amma bu sahədə işləyə bilməyəcəyimi başa düşdüm. Azadlığı və heç kimdən asılı olmamağı sevirəm. Bəlkə də elə buna görə incəsənəti seçdim. Rəssamlıq sənətində heç bir akademik təhsil almamışam.

- Niyə məhz müasir incəsənət sizi daha çox cəlb edir?

- Müasir incəsənətə daha çox marağım olduğundan fəaliyyətim də bu istiqamətdədir. Bu sahədə ilk fəaliyyətim video-artlarla oldu. Rəngkarlıqla bir ilə yaxındır məşğulam. Heykəltəraşlıq, installyasiya, kompyuter qrafikası, video-art sahəsində də işlərimi davam etdirirəm.

- “Şeylər” sərgisinin ideyası necə yarandı?

- Evdəki əşyaları vizuallaşdırıb tamaşaçıya çatdırmaq fikri məndə çoxdan yaranmışdı. Bu sərgini reallaşdırmaqla da arzuma çatdım.

- Gündəlik həyatımızda istifadə etdiyimiz, hətta çoxlarının bəzən fikir vermədiyi əşyaları çəkməkdə məqsəd nə idi? Ümumiyyətlə bu rəsmlərin mahiyyəti nədir?

- Əşyaları çəkməkdə məqsədim onların insan həyatındakı rolunu qeyd etmək, kimisə kombinat sisteminin hipnotik təsiri altından çıxarmaq, xəyallardan ayırıb indiki zamana qaytarmaq idi.

- Sərgidə sınmış fincan, boşqab, yumurta, əyilmiş qaşıq, çəngəl, ağ ayaqqabılar arasındakı qırmızı ayaqqabı və s. əşyalar tamaşaçıda sanki tənhalıq hissinin təəssüratını oyadır...

- Çəkilən hər bir rəsm müəllifin daxili aləminin təzahürüdür. Bu mənada onu doğru qeyd etdiniz ki, qırmızı ayaqqabı həqiqətən də tənhalıq hissini yaradıb.

- Çəkdiyiniz rəsmləri sata bilirsiniz?

- Əslində çəkdiyin rəsmləri sata bilmək, öz yaşayıb-yaratdığın sənətlə həyatı davam etdirmək hər bir rəssam üçün sevindirici bir haldır. Rəssam çəkdiyi əsəri bitirdikdən sonra o artıq ona yox, kütləyə məxsusdur.

Söhbətləşdi: Yeganə Cansail

Mədəniyyət.- 2010.- 29 sentyabr.- S. 15.