Vaşinqtonda Üzeyir Hacıbəylinin 125 illik yubileyinə həsr olunmuş tədbir keçirilib

Dahi bəstəkar Üzeyir Hacıbəylinin 125 illik yubileyi münasibətilə Amerika paytaxtında da tədbir keçirilib. Vaşinqtonda fəaliyyət göstərən “Qarabağ” Fondu tərəfindən bəstəkarın yubileyi münasibətilə Azərbaycan mədəniyyəti gecəsi təşkil edilib. Amerikada Azərbaycan mədəniyyəti və tarixinin təbliği ilə məşğul olan Qarabağ Fondu 2010-cu ilin iyununda təşkil edilib. Fondun icraçı direktoru Dayana Kohen Altman bildirib ki, təşkilatın əsas məqsədi Azərbaycan və Birləsmiş Ştatlar arasında mədəni körpünün yaradılmasından ibarətdir.

Fondun "Azərbaycanın böyük bəstəkarı və mədəniyyət xadimi Üzeyir Hacıbəyovun irsinin təntənəsi" adı altında keçirdiyi ilk tədbirin də məqsədi Amerika auditoriyasını Azərbaycan musiqisi və mədəniyyəti ilə tanış etmək olub.

Azərbaycan mətbəxinin ləziz nümunələrinə qonaq edilən amerikalı sənətsevərlər Üzeyir Hacıbəylinin həyat və yaradıcılığı ilə yanaşı, Azərbaycanın bu gününü əks etdirən fotosərgi ilə də tanış olmaq imkanı da qazanıblar. Daha sonra amerikalı sənətşünas, Nyu-Yorkun tanınmış Metropolitan Operasının sabiq əməkdaşı xanım Şeril Kempler məruzə ilə çıxış edərək Üzeyir Hacıbəylinin yaradıcılığından danışıb, “Leyli və Məcnun”, “Koroğlu”da daxil olmaqla məşhur əsərlərindən parçalar səsləndirib. Mədəniyyət gecəsində yerli Azərbaycan icmasının üzvü Bəhruz Fərruxi “Koroğlu” operasından və “Arşın mal alan” operettasından ariyaları ifa edib, amerikalı sənətsevərləri bir sıra milli musiqi alətlərimizin xüsusiyyətləri ilə tanış edib.

Dayana Kohen Altman təşkilatın gələcək planlarından da danışıb: “Bizim diqqətimizin mərkəzində Qarabağ durur, lakin ümumiyyətlə maraq dairəmiz Qafqaz bölgəsini əhatə edir. Payız mövsümü “Mənim Qarabağım” silsiləsindən foto-sərgi və rəsm sərgisi təşkil edəcəyik. Gələn ilin yazında isə Azərbaycana həsr edilmiş festival keçirmək istəyirik və Vaşinqtonda məktəblərdə Novruz şənlikləri planlaşdırırıq. Biz Amerikadan Azərbaycana, Azərbaycandan da buraya şagirdləri gətirmək üçün ABŞ-ın şahmat mərkəzi ilə iş aparırıq. Azərbaycan mətbəxi haqqında kitabın nəşri üçün hazırda naşirlərlə danışıqlar aparırıq. Planlarımız çoxdur".

Onun sözlərinə görə, Qarabağ Fondu direktorlar şurası tərəfindən idarə edilir. Fond Bakıda Xəzər Universiteti tərəfindən dəstəklənir, universitetin rektoru Hamlet İsaxanlı direktorlar şurasının üzvüdür.

Yeganə

Mədəniyyət.- 2010.- 29 sentyabr.- S. 14.