Humanitar Əməkdaşlıq üzrə I Azərbaycan-Rusiya Forumu başladı

Bu gün Bakıda Humanitar Əməkdaşlıq üzrə I Azərbaycan-Rusiya Forumu öz işinə başlayıb. Forumda iştirak etmək üçün Rusiya Prezident Administrasiyasının rəhbəri Sergey Narışkin, Rusiya Federasiyasının mədəniyyət naziri Aleksandr Avdeyev, Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy, Rusiya prezidenti protokolunun rəhbəri Vladimir Şevçenko və digər rəsmilər, eləcə də tanınmış simaların həyat yoldaşları, Moskva Böyük Teatrının artistləri, Rusiyanın müxtəlif media rəhbərləri və jurnalistlərin də daxil olduğu nümayəndə heyəti Bakıya gəlib.

Forumun rəsmi açılışından əvvəl qonaqlar Fəxri Xiyabanda Heydər Əliyevin məzarını və Şəhidlər Xiyabanını ziyarət edəcək. Ziyarətdən sonra Azərbaycan dövlət rəsmilərinin iştirakı ilə Beynəlxalq Muğam Mərkəzində forumun təntənəli açılışı və I plenar iclas keçiriləcək. İclas yekunlaşdıqdan sonra elə həmin məkanda forum çərçivəsində müxtəlif seksiyalar üzrə iclasların keçirilməsi nəzərdə tutulur. 10-a yaxın seksiyalar arasında mədəniyyət, elm xadimləri, tibb xadimləri, yazıçılar, jurnalistlər və digər seksiyalar baş tutacaq. Həmin gün axşam isə Rusiyanın nümayəndə heyəti üçün “Gülüstan” sarayında şam yeməyi təşkil olunacaq.

Yanvarın 23-də Rusiyanın nümayəndə heyəti Heydər Əliyev Fondunda və Lomonosov adına Moskva Dövlət Universitetinin Bakı filialında olacaq. Forum çərçivəsində İTAR-TASS-ın təqdimatında “Rusiya və Azərbaycan: Keçmişdən gələcəyə” fotosərginin açılışı da nəzərdə tutulur.

Fəxriyyə

Mədəniyyət.- 2010.- 22 yanvar.- S. 2.