Timur Oduşev: “İçimdə
qorxu var idi ki, rolun öhdəsindən gələ bilmərəm”
Timur
Oduşev 1993-cü il yanvarın 16-da Bakıda anadan olub. 6
yaşından Bakı Xoreoqrafiya Məktəbində təhsil
alır. Hazırda məktəbin II kursunda oxuyur. Baletlə məşğuldur.
Gələcəkdə özünü balet artisti kimi
görür.
Timur Oduşev bizimlə söhbətində
ilk yaradıcılıq uğurundan danışdı. Qeyd etdi
ki, ilk dəfə çəkildiyi filmin müxtəlif ölkələrin
qatıldığı belə bir möhtəşəm
müsabiqədə uğur qazanacağını heç
ağlına belə gətirməzdi. Çünki müsabiqənin
xarici film nominasiyasında Fransa, Hollandiya, Braziliya, Kanada, Rusiya
kimi ölkələrdən filmlər var idi. Hətta “Oskar”a
layiq görülmüş İsveç filmi də iştirak
edirdi.
- Hollivuda rejissor İlqar Safatla birgə
getdik. Oraya gedənə, hətta səhnədə mükafat əlimdə
dayandığım halda belə inanmırdım ki, bu,
reallıqdır. Filmin nominantlar arasında olduğunu öyrənəndə
çox sevinmişdik. Ancaq “birinci yer” sözünü
eşitmək mənə həqiqətən şok
yaşatdı. Gözlənilməz idi. Sevincimdən səhnəyə
çıxanda bir kəlmə də deyə bilmədim. Sadəcə
“Thank you” dedim.
- Başqa ölkələrin filmə
münasibəti necə oldu?
- İlk dəfə idi ki, Azərbaycan
bu müsabiqədə iştirak edirdi. Bir çoxu Azərbaycan
haqda soruşurdu. Tanımayanlar da var idi. Filmdə Qobustan
qayaları, rəsmlər diqqət çəkib. Azərbaycana
gəlmək istəyini bildirənlər də oldu. Daha
çox junalistlər yaxınlaşır, suallar verirdilər.
Oranın mediasında film haqda yazılar dərc olundu.
Resenziyalarda həm tənqidlər, həm də filmin
güclü məqamları haqda yazırdılar. Əsas o idi
ki, laqeydlik yox idi. Filmin ideyası onlara maraqlı gəlmişdi.
- Necə oldu “Sahə” filminə dəvət
aldın?
- Filmin rejissoru İlqar Safat məktəbimizdə
kastinq keçirdi. Mən də qatıldım. Sonra xəbər
gəldi ki, mən çəkilişə dəvət
olunmuşam. Heç təsəvvür etmirdim ki, seçilə
bilərəm. Çox sevindim, ancaq içimdə qorxu var idi
ki, rolun öhdəsindən gələ bilmərəm.
İlqar müəllim sağ olsun, mənə çox kömək
etdi. Aktyorluğun bu cür çətin sənət
olduğunu bilmirdim.
- Çəkilişlər
zamanı yaddaqalan məqamlar necə, çoxmu oldu?
- İlk dəfə hər şey
maraqlı gəlir. Aktyorluq sənəti haqqında məlumat
topladım. Xarici ölkələrin kinoaktyorları ilə əlaqə
yaratdım. Suallarımın bir çoxuna cavab aldım. Hətta
çəkilişim olmayan günlərdə çəkiliş
meydançasına gəlirdim. Həm rolu, həm də
ümumilikdə filmin ideyasını bütünlüklə
dərk etməyə çalışırdım.
- Bundan sonra yenə filmə çəkilmək
istərdin?
- Mən baleti çox sevirəm və
peşə seçimi baxımından baletə
bağlıyam. Ancaq kinoya da biganə deyiləm. İlk
sınağım mənə böyük uğur gətirdi.
Maraqlı rol təklifi olsa, məmnuniyyətlə çəkilərəm.
Məsələn, yeniyetmə və gənclər
üçün filmlərə çəkilərdim.
R.İsayeva
Mədəniyyət.-
2011.- 1 aprel.- S. 9.