Ən uzunömürlü
vəzir - Lənkəran xanının vəziri
Akademik Milli Dram Teatrında “Sərgüzəşti-vəziri-xani-Lənkəran”ın
yeni quruluşu milli koloriti, şən yumoru, sətiraltı mənaları,
sadə və aydın səhnə həlli ilə yadda
qaldı.
1873-cü il martın 10-da görkəmli
maarifçilər Həsən bəy Zərdabi, Nəcəf
bəy Vəzirov və Əsgər ağa Goraninin
(Adıgözəlov) təşəbbüsü ilə
M.F.Axundzadənin “Sərgüzəşti-vəziri-xani-Lənkəran”
komediyası ilə Azərbaycanda peşəkar teatrın əsası
qoyuldu. Üstündən 138 il keçəndən sonra Əməkdar
incəsənət xadimi, rejissor Vaqif İbrahimoğlu Akademik
Milli Dram Teatrının səhnəsində Lənkəran
xanının vəzirini yeni quruluşda səhnəyə
çıxardı.
Klassika
zamansızdır
Premyera öncəsi
tamaşanın quruluşçu rejissoru ilə
görüşə bilməsək də, rejissor Tural
Mustafayev ürək sözlərini bizimlə
bölüşdü.
- “Sərgüzəşti-vəziri-xani-Lənkəran”
tamaşası mənim teatrda artıq 8-ci işimdir. İlk dəfədir
ki, Vaqif müəllimlə birlikdə işləyirəm.
Onunla işləmək adama böyük zövq verir. Çalışmışam
ki, ondan öyrəndiklərimi, bildiklərimi bu tamaşada
gerçəkləşdirə bilim.
- XXI əsrin
tamaşaçısı üçün bu əsər
hansı baxımdan önəmlidir?
- Mirzə Fətəli Axundzadə
klassik dramaturqumuzdur. Klassika isə örnəkdir,
zamansızdır. Çalışdıq ki, bu əsəri
vaxtla uyğunlaşdıraq. Tamaşada iştirak edən
aktyorlar sağ olsunlar ki, bizi başa düşdülər,
anladılar və birgə nəyə isə nail olduq.
Tamaşada Lənkəran xanın
vəziri - Mirzə Həbib rolunu ifa edən Əməkdar
artist Cəfər Namiq Kamal öz rolundan danışdı:
- 2002-ci ildə biz bu
tamaşanı elə bu teatrda, doğma teatrımızda
hazırlamışdıq və o tamaşada da mən Lənkəran
xanının vəziri rolunu oynayırdım. Bir balaca dəyişikliklər
olub, ifaçılar dəyişib, dinamika artıb. Mən
müxtəlif quruluşlarda da bu tamaşaya baxmışam. Bu
obraz əlbəttə ki, maraqlı, sevdiyim obrazlardan biridir.
Diqqət, tamaşa başlayır!
Sərgüzəşt
başlayır. Tamaşaçılar XVIII əsrə
yollanırlar. Başı məişət
qayğılarına, eyşi-işrətə qarışan Lənkəran
xanının vəziri Mirzə Həbibin işləri kələf
kimi bir-birinə qarışır. Qadın hiyləsinin
qurbanına çevrilir. Tamaşa boyu gülüş obyektinə
çevrilən Mirzə Həbib eşitdikləri ilə
gördüklərinin arasında çaşıb qalır və
sonda dərdini Xana danışır. Öz hərəkətləri
və axmaq qərarları ilə vəzirindən heç də
geri qalmayan, gülüş doğuran Lənkəran vilayətinin
xanı da maraqlı bir obraz kimi yadda qalır. Xalq artisti Nurəddin
Mehdixanlının yaratdığı Xan obrazı dramatik
obrazlar yaradan aktyoru incə yumor hissi olan komik aktyor kimi
tamaşaçılara təqdim edir.
Tamaşada Pəri xanım
obrazını Əməkdar artist Mətanət Atakişiyeva,
Ziba xanım rolunu Şəhla Əliqızı, Şölə
xanım obrazını Şəlalə Şahvələdqızı,
Nisə xanım obrazını isə Həcər Ağayeva
ifa edirdi.
Tamaşanın rəssamı Rəşid
Şerif, bəstəkarı Xalq artisti Siyavuş Kərimidir. Rəqslərin
quruluşu Zakir Ağayev və Yelena Ağayevaya məxsusdur.
Olduqca sadə səhnə tərtibatı,
dinamikliyi, uğurlu musiqisi ilə tamaşaçıların
rəğbətini qazanan “Sərgüzəşti-vəziri-xani-Lənkəran”
alqışla qarşılandı. Tamaşaçı
alqışı isə şübhəsiz ki, tamaşaya verilən
ən böyük qiymətdir.
Təranə
Vahid
Mədəniyyət.-
2011.- 1 aprel.- S. 5.