«III Milli Uşaq Kitabı Sərgisi» keçirildi

2 aprel - “Beynəlxalq Uşaq Kitabı Günü” münasibətilə F.Köçərli adına Respublika Uşaq Kitabxanasında «III Milli Uşaq Kitabı Sərgisi» keçirildi. Qeyd olundu ki, tədbirin məqsədi balaca oxucuları milli uşaq ədəbiyyatı ilə tanış etmək, mütaliəyə həvəsləndirməkdir. Tədbirdə «Dünyanı, təbiəti, insanları qoruyaq», «Gözlə bizi, Qarabağ», “Biri var idi, biri yox idi...» və s. başlıqlar altında müxtəlif nəşriyyatların kitabları uşaqlara təqdim olundu. Kitabxananın direktoru Fizurə Quliyeva bildirdi ki, F.Köçərli adına Uşaq Kitabxanası «Beynəlxalq Uşaq Kitabı Günü»nü ənənəvi olaraq qeyd edir: «2 aprel məşhur danimarkalı nağıl yazarı Hans Kristian Andersenin doğum günüdür. Bu münasibətlə artıq üçüncü dəfədir ki, Milli Uşaq Kitabı sərgisi keçiririk. Sərgidə Azərbaycan, Qarabağ, Ekologiya və digər mövzularda kitablar təqdim edirik».

Kitabxana direktoru uşaqlarda mütaliə mədəniyyətinin inkişaf etdiyini də vurğuladı: «Uşaqlar mütaliəyə maraq göstərirlər. Biz indi yüksək tərtibatla nəşr olunan gözəl uşaq kitabları əldə edə bilirik. Ona görə də biz uşaqlara kitab təqdim etməkdə çətinlik çəkmirik”.

Uşaq yazıçısı Sevinc Nuruqızı da balacalarda kitaba marağın artmasından söz açdı: «Bunu müxtəlif nəşriyyatların uşaq kitabları işinə maraq göstərmələri ilə əlaqələndirərdim. İndi mütaliə etməyi sevən və bacaran hər kəs kitab mağazalarında çox maraqlı uşaq ədəbiyyatı nümunələrini əldə edə bilər. Köçərli adına Uşaq Kitabxanasının da bu sahədə gözəl ənənəsi var, kitabxana müxtəlif kitab bayramları keçirir və bununla da çox xeyirxah iş görülür. Belə bayramların mütaliəni sevən uşaqların həyatında rolu böyükdür».

Tədbirdə daha sonra uşaqlar arasında «Boxçadan suallar» adlı viktorina keçirildi, qaliblərə hədiyyələr təqdim olundu.

Gülər

Mədəniyyət.- 2011.- 6 aprel.- S. 13.