Qara Qarayevin musiqisi dünya mədəniyyəti xəzinəsinə
töhfədir
Bakıda böyük bəstəkarın xatirəsinə
həsr olunmuş IV Beynəlxalq müasir musiqi festivalı
keçirilir
Aprelin
2-də Bakıda Qara Qarayev adına IV Beynəlxalq müasir
musiqi festivalı işə başladı. Bir həftə
davam edəcək festivalda dünyanın bir sıra
tanınmış musiqiçiləri iştirak edir.
Beynəlxalq musiqi forumu ilə
bağlı aprelin 1-də Milli Kitabxanada keçirilən mətbuat
konfransında festivalın bədii rəhbəri, bəstəkar,
Əməkdar incəsənət xadimi Fərəc Qarayev, Mədəniyyət
və Turizm Nazirliyi İncəsənət şöbəsinin
müdiri Fərəh Əliyeva tədbirin miqyası,
iştirakçıları barədə məlumat verdilər.
F.Əliyeva festivalın musiqisevərlərin
böyük marağına səbəb olacağını
bildirdi: “Festivala dünyanın 10 ölkəsindən
tanınmış musiqiçilər gəliblər. Konsert
proqramları olduqca maraqlıdır. Bu festival indiyədək
adət etdiyimiz ənənələrdən kənara
çıxaraq bir sıra maraqlı tədbirlərlə yadda
qalacaq. Məsələn, Gənc Tamaşaçılar
Teatrında XX əsrin əvvəllərində filmlərə
yazılan musiqi təqdim olunacaq. Bu musiqi hər zaman solo
pianinonun müşayiətində ifa olunub. Ancaq bu dəfə
musiqini Almaniyadan gələn ansambl xüsusi olaraq yenidən
hazırlayıb və onunla bir sıra Avropa ölkələrində
uğurla çıxış ediblər. İndi Azərbaycan
musiqisevərləri də bunu dinləmək imkanı
qazanacaqlar”.
Qeyd edək ki, festivalın
işini işıqlandırmaq üçün Polşa,
Ukrayna və Almaniyadan jurnalistlər gəliblər.
* * *
Aprelin 2-də Azərbaycan Dövlət
Filarmoniyasında Qara Qarayev adına IV Beynəlxalq müasir
musiqi festivalının açılış mərasimi
keçirildi. Tədbiri giriş sözü ilə açan Mədəniyyət
və Turizm Nazirliyinin incəsənət şöbəsinin
müdiri Fərəh Əliyeva Qara Qarayevin adını
daşıyan müasir musiqi festivalının ilk dəfə
Bakıda, 1986-ci ildə dirijor Rauf Adullayev, bəstəkarlar
Qleq Felzer və Fərəc Qarayevin təşəbbüsü
ilə təşkil edildiyini bildirdi. Daha sonra festival 1988-ci və
1990-cı illərdə keçirilib. İndi 20 illik fasilədən
sonra festival yenidən bərpa edilir.
Qeyd olundu ki, festivalın zəngin
proqramına elmi konfransın keçirilməsi,
dünyanın tanınmış musiqiçilərinin konsertlərinin
təşkili daxil edilib. Festivalın əsas məqsədi isə
müasir musiqinin səsləndirilməsinə geniş yer
ayırmaqdır.
Sonra gecədə Ü.Hacıbəyli
adına Azərbaycan Dövlət Simfonik Orkestrinin konserti oldu.
Orkestrin bədii
rəhbəri və baş dirijoru Xalq artisti, professor
Rauf Abdullayevdir. Solistləri Nino Jvania (Gürcüstan) və Aleksandr İvaşkin (Böyük Britaniya) olan konsertdə Anton Vebernin, Arif Məlikovun, Olivier Messiaenin,
Vladimir Tarnopolskinin və
Vitold Lutoslavskinin əsərləri səsləndirildi.
* * *
Qara Qarayev adına
IV Beynəlxalq müasir
musiqi festivalı işini aprelin 3-də R.Mustafayev adına Azərbaycan Dövlət İncəsənət Muzeyində
konsert proqramı ilə davam etdirib. Konsertdə gənc gürcü
pianoçu Nino Jvania böyük alman bəstəkarı Karlhayns
Ştokhauzenin əsərlərindən
parçalar ifa edib.
Beynəlxalq müasir musiqi
festivalı çərçivəsində
daha bir konsert Dövlət Kamera və Orqan Musiqisi zalında oldu. Orkestrin dirijoru Roland Frayzitser, solistləri Fəridə Məmmədova, saksafonda
Tomas Şön, violində
Bojidara Kouzmanovadır.
Aprelin 4-də Almaniyanın “Ensemble Ascolta”
ansamblı Qara Qarayev adına
IV Beynəlxalq müasir
musiqi festivalı çərçivəsində Dövlət Gənc Tamaşaçılar Teatrında
konsert proqramı ilə çıxış
edib.
* * *
Festival çərçivəsində
Üzeyir Hacıbəyli
adına Azərbaycan Dövlət Simfonik Orkestri, Qara Qarayev adına Dövlət Kamera Orkestri, Ensemble Reconsil Wien (Avstriya), Freiburg Percussion Ensemble (Almaniya),
Con tempo (Azərbaycan) solo proqramla
- gürcü pianoçusu
Nino Jvania və alman fleyta ifaçısı
Beatrix Vaqnerin çıxışları nəzərdə
tutulub.
Qara Qarayev adına IV Beynəlxalq musiqi festivalında musiqisevərlər
XX əsr klassiklərindən
Avstriya Yeni Vyana Məktəbi nümayəndələrinin - A.Schönberq,
A.Webern, A.Berqin əsərlərini yenidən
eşitmək, ötən
əsr avanqard cərəyanının görkəmli
nümayəndəsi K.Stockhausen,
fransız bəstəkarlarından
müasir Avropa musiqisinin yaranmasına təkan verən E.Satie və
Avropa musiqisində keçən
əsrin sonunun aparıcı bəstəkarları
olan macar G.Ligeti və polyak V.Lutoslavskinin əsərləri də konsert proqramına daxil edilib. Bakıda ilk dəfə olaraq “spektral” məktəbin nümayəndəsi
G.Grisey, Avropa konsert səhnələrində
layiqincə təmsil olunan iki rus
bəstəkarı V.Tarnopolski
və A.Raskatov, eləcə də yaradıcılığı ilə
yeni və müasir musiqi anlamı daşıyan bir çox bəstəkarların əsərlərinin
səslənməsi nəzərdə
tutulub. Festival proqramında müasir Azərbaycan musiqisinə də yer ayrılıb.
Ümumilikdə konsert proqramlarına
Azərbaycanla yanaşı
Almaniya, Fransa, Rusiya və digər ölkələrdən
50-dək bəstəkarın əsəri daxil edilib. Bu bəstəkarların
sırasında sənətdə
ilk addımlarını atan
gənclər də
var.
Festival aprelin 8-dək davam edəcək.
Yeganə Cansail
Mədəniyyət.-
2011.- 6 aprel.- S. 9.