Mədəniyyətlərarası dialoq konkret layihələrlə dəstəklənməlidir
Mehmət Kalpakçı, UNESCO üzrə Türkiyə
Milli Komissiyasının Mədəniyyətlər
İttifaqı Komitəsinin sədri
- Azərbaycan hökumətinin təşəbbüsü
ilə Bakıda keçirilən Dünya Mədəniyyətlərarası
Dialoq Forumu Türkiyədə böyük maraq doğurub. Məlum
olduğu kimi, Türkiyə İspaniya ilə birlikdə Mədəniyyətlər
İttifaqı (Sivilizasiyalar Alyansı) təşəbbüsünün
həmsədridir. Bu barədə UNESCO üzrə Türkiyə
Milli Komissiyasının Mədəniyyətlər
İttifaqı Komitəsinin sədri, professor Mehmət
Kalpakçı bildirib.
O vurğulayıb ki, mədəniyyətlərarası
dialoqda fəal iştirak edən və Avropa Şurası ilə
UNESCO arasında mədəniyyətlər ittifaqı
sazişinə hökumət səviyyəsində imza
atmış, bütün dünyada müasir, dini
tolerantlığı yüksək səviyyədə olan
ölkə kimi tanınan Azərbaycanda bu cür mötəbər
tədbirin keçirilməsi təsadüfi deyil. Avropa və
Asiya sivilizasiyalarının qovuşduğu mühüm şəhər
olan Bakıda bu cür vacib tədbirin keçirilməsini əlamətdar
hadisə adlandıran M.Kalpakçı belə təşəbbüslərin
dini radikalizmin qarşısının alınması, din,
vicdan və ifadə azadlığının təmin
olunması sahələrində beynəlxalq əməkdaşlığa
töhfə verəcəyini vurğulayıb. Onun sözlərinə
görə, Bakı Forumu BMT-nin Sivilizasiyalar Alyansı və
Avropa Şurasının keçən il Lissabonda
keçirdikləri forumun davamı olacaq.
Mədəniyyət.-
2011.- 6 aprel.- S. 6.