Azərbaycanın birinci xanımı Forumun qonaqları ilə görüşüb

Aprelin 8-də “Gülüstan” sarayında Azərbaycanın birinci xanımı, Heydər Əliyev Fondunun prezidenti, UNESCO-nun və İSESCO-nun xoşməramlı səfiri, Milli Məclisin deputatı Mehriban xanım Əliyeva Dünya Mədəniyyətlərarası Dialoq Forumunda iştirak edən İSESCO-nun baş direktoru Əbdüləziz bin Osman əl-Tüveycri ilə görüşüb.

Mədəniyyətlərarası dialoqa dair müzakirələrin vacibliyini qeyd edən qonaq forumun yüksək səviyyədə təşkilini vurğulayıb. Görüşdə Azərbaycan ilə İSESCO arasında əlaqələrdən söz açılıb.

Həmin gün Heydər Əliyev Fondunun prezidenti Mehriban xanım Əliyeva Bakı Forumunun iştirakçısı olan Rusiya Federasiyası Federasiya Şurasının sədr müavini Svetlana Orlova ilə görüşüb. Forumun yüksək səviyyədə təşkil edildiyini vurğulayan S.Orlova keçirilmiş müzakirələrin böyük maraq doğurduğunu deyib.

Heydər Əliyev Fondunun prezidenti Mehriban xanım Əliyeva Rumıniyanın mədəniyyət nazirinin müavini İrina Calal Marin ilə də görüşüb. Mehriban xanım Əliyeva Azərbaycan-Rumıniya əlaqələrindən danışıb, Rumıniyada Heydər Əliyev Fondunun nümayəndəliyinin fəaliyyət göstərdiyini bildirib. Öz növbəsində rumıniyalı nazir müavini Heydər Əliyev Fondunun Rumıniya nümayəndəliyinin fəaliyyətini yüksək qiymətləndirib.

Azərbaycanın birinci xanımı Mehriban Əliyeva Paris şəhərinin 7-ci rayonunun meri, Fransanın sabiq ədliyyə naziri, Avropa Parlamentinin üzvü Rəşidə Dati ilə görüşüb. Azərbaycana dəvətə görə minnətdarlığını bildirən Rəşidə Dati Bakı Forumunda keçirilən müzakirələrdə iştirak etməkdən məmnun olduğunu vurğulayıb.

Azərbaycanın birinci xanımı Mehriban Əliyeva Gürcüstan prezidenti Mixeil Saakaşvilinin anası, “Gürcüstan-Azərbaycan Dostluq Evi”nin rəhbəri Giuli Alasaniya ilə görüşüb. Bakıya tez-tez səfər etdiyini deyən Giuli Alasaniya ölkələrimiz arasında münasibətlərin qarşılıqlı etimad və hörmətə söykəndiyini bildirib.

Azərbaycanın birinci xanımı Mehriban xanım Əliyeva Belçika Parlamentinin fəxri prezidenti Anna Marie Lizin, UNESCO-nun keçmiş baş direktoru Koişiro Matsuura, Rusiya Federasiyası Tatarıstan Respublikasının Baş nazirinin birinci müavini Zilya Valeyeva ilə də görüşüb.

Mədəniyyət.- 2011.- 15 aprel.- S. 5.